ESTHE GREK 3 - Kalate Zambe Nnomo a Mfefe Mfefé Nkôñelan

Haman a fem Beyude

¹ E mvuse mam mete, ane njôô nlam Artazerzes a nga ve Haman Bugayôs mone Hamadatôs, beta éto; a nga bete nye nkôñ, a ve nye éto e nsamba bôte ya ôsu e zañe bemvôé be njôô bôt.

² Bebo bisaé bese ya jale be njôô nlam be mbe be lu'une nye minlô e si, aval ane njôô bôt a nga telé abendé. Ve Mardôsé nye teke luune Haman nlô e si.

³ E nde bebo bisaé ya jale njôô bôt be nga jô Mardôsé na: Amu jé ô nji ve njôane njôô bôt mewôk'

⁴ Môs ôse be kobô'ô nye ajô té, ve nye teke vô'ôlô. Eyoñe te ñhe be nga kate Haman na Mardôsé a ben a bo'ok aval njôô nlam a nga jô. E nde Mardôsé a kate be ôte'ete'e na a ne mone Yude.

⁵ Eyoñe ñhe Haman a wô'ôya na Mardôsé nye a ne te luune nye nlô e si,

⁶ ane a nga yaa a tyi'i na e Beyude bese ya éjôé be Artazerzes a zu bo na be mane jañ ékok.

⁷ A telé ñhe abendé, e mbu awôm a baa ya éjôé Artazerzes a bo fe *asimba na be yem *môs, a ngon ya été, ndemben e mvoñe bôt Mardôsé ése ja ye jañ ékok ve môse wua wua. E nde *asimba e nga tob *môs awôm a nyiini ya ngon Adaa.

⁸ Ane Haman a nga jô Artazerzes na: «Ayoñ éziñ e ne *mmialan e zañe *meyoñ, e bifase bi si bise wo jôé. Metiñe map, me te funan a metiñe meyoñe mese mevok, a be be ne te bisi metiñe ya éjôé. Ajô te njôô bôt a nji bi mfi éziñ na a jô'é be be to ne mieeññ.

⁹ Nge njôô nlam a yene nalé mvaé a tyi'i ñhe fo'o na bôte bete be jañ ékok. Ve mfa'a wome kik, ma tili asu nkob moné njôô bôt tañe bemoné toyini awôm.»

¹⁰ Ane njôô bôt a nga vaa élondo jé ya ônyu a futi je Haman e wo été na a ke lume *sitam e bekalate ba kobô ajô Beyude.

¹¹ E nde fe njôô nlam a zu jô Haman na: Ba'ale'e moné wôé! Ve ayoñe dina ki, bo'o de avale ane *nlem wo jô wo.

¹² Ane be nga bañete betili bekalate be njôô bôt e ngon ôsu é to melu awôm a mela. E nde, e mam mese Haman a nga tyik, e jôé njôô nlam Artazerzes, be nga tili me bengovina benen a minlô mi bôte ya éjôé, éfase si ése ataté si ya India akekui Ethiopia, e tañe bifase bi si ntet a mewôm mebaé a zamgbwa, be tili fe minlô mi bôte ya meyoñe biku, aval ane *minkobô miab mi né.

¹³ E nde ñhe be nga lôme bôt ba ke ba kab bekalate e si éjôé Artazerzes na be dimilii ayoñe Yude ve môse wua ya ngon awôm a baa, e ngon Adaa, be mane fe sa akum dap.

¹⁴ Ane bekalate be nga mane ke ba miaseban a mialan éfase si ése, njôan ô veebane fe e meyoñe mese na me tabee nkômesan asu môse be nga jôô wô. Jam e nga bobane ñhe ébam ébam, ja'ane e Suza émien. Njôô bôt baa Haman be be loba'an bilam biap, tisone ki jé nga bôlé.