DANIEL 9 - Kalate Zambe Nnomo a Mfefe Mfefé Nkôñelan

Daniel a ye'elane Zambe

¹ Mbu ôsu Darius, e mone Zerzés a nga taté jôô Babilôn a too *nda bôte bejôô ya Beméde,

² ma, Daniel, me nga lañe mimfufube mintilan; éyoñe te nje me nga wô'ô atinane ya jame Nti a nga liti *nkulu mejô Yérémi, ajô mimbu mewôme zamgbwale Yérusalém a nga yiane tabe ntyaman.

³ Me nga taté na ma tyi bidi, me be'e mengômesan nloon a éyé é n'abé mis, asup e too nlô, nde me nga kôñelane be Zambe a ye'elane nye, a liti nye minja'ane miam.

⁴ Me nga liti Nti, e Zambe wom, meye'elane ya mmeman *abé wu: A Nti, e Zambe a n'anen a angôndô, wo ba'ale élate jôé mia be bôt ba bo mebendé môé mewôk, a ô n'avale da e be ba ba nye'e wo.

⁵ Bi maneya bo *abé, bi bili mekua; bi beneya njôane wôé, a lume mebendé môé a metiñe môé mvus.

⁶ Bi nji wô'ô bebo bisaé bôé, bekulu mejô, mbe be nga kobô bejô bôte bangan ajô dôé, nalé fe bivete biangan, bimvame biangan a bôte bese.

⁷ Wo Nti, ô ne te k'ékop! Jam e li'iya bia e ne ve na bi sili biabebiene si aval'ane môse wu; nne e ne nalé mfa'a wongan, bôte be too Yérusalém, bôte ya Yuda, a bôte bevo'o bese y'Israél, ba be ne bebé a ba be n'ôyap, mmialane mesi mesi, vôm ô nga titane be asu dôé amu beyeñeyeñ bap.

⁸ Yaa a Nti, bi ne njalan a ôson, biabebien, bejô bôte bangan, bivete biangan a bimvame biangan, amu bi nga bo wo melo.

⁹ Ve wo, Nti, e Zambe wongan, e mvame jôé été, wo jamé bia, akôsa bo bi nga bene njôane wôé.

¹⁰ Bi nji ke wô'ô wo, éyoñ ô nga sili bia na, bi ve metiñ ô nga kalane bia a bebo bisaé bôé bekulu mejô mewôk.

¹¹ Ayoñ Israél ese e nga tyam atiñe dôé, a yale feñ asu ya bo te vô'ôlô miñye'elane miôé. Ajô te, amu melo mangan, biyo'é bi ne ntilan e metiñ me Môze, mbo ésaé wôé bi kubuya bia nyô.

¹² O tôéya e jam ô nga kat ajô dangane biabebien a bivete bia jôô bia: O kuliya be bia, e Yérusalém, minju'u be ngenane te yene vôme mfe émo ji.

¹³ Aval e ne ntilan e metiñ me Môze, minju'u mise mi, mi kuiya be bia; ve bia, a Nti, e Zambe wongan, bi nji ye'elane wo na ô je'ebe, bi nji li'i *abé dangan, nge bisi ntyi'ane wôé ô ne te k'atyendé.

¹⁴ Ajô te nde ô nji jô'é *môs éziñ ya zuu minjuk e be bia. Yaa, a Nti, e Zambe wongan, ô ne *zôsôô e jam ese wo bo été. Ve bi nji vô'ôlô miñye'elane miôé.

¹⁵ A Nti, e Zambe wongan, éyoñ ô nga vaa bôte bôé Ejipte, amu ngule jôé ja dañ, ô nga bi duma, nde e né a kui môse wu; ve bia, bi nga bo wo melo a bi bili mekua.

¹⁶ A Nti, beta'a vumelan mbamba mimboone miôé, tame vaa ngul ayaa jôé e be Yérusalém tisone jôé nkôle wôé ô n'étyi! Amu na *abé dangan a bikobe b'ésaa bangan mbie Yérusalém be ntoo jôme meta e be bôt ba bômane bia.

¹⁷ Ajô te a Nti, e Zambe wongan, wô'ô ñhe meye'elan a minja'an ma liti wo. Amu ésemé wo semé womien, vôme wôé a n'étyi a nto ndaman, tame yene nye a nleme *mvam.

¹⁸ A Zambe wom, vô'ôlô'ô, tuka'a fombô; yene tisone jangan ane é ntoo ntyaman, tison é ne énjôé. Eyoñ bia ye'elane wo, bi nji buni na, bi ne jôm éziñ, ve bia buni nye'ane wôé ô ne teke'e nné.

¹⁹ A Nti, vô'ôlô'ô bia! A Nti, jamé'é bia! A Nti! A Nti ke'e melo môé! Amu ésemé ô bili mfa'a wôé womien a Zambe wom, bo'o jam éziñ, te yange asu tisone nyô a ayoñe bôte di, mbie bi n'émbiôé.

Biyoñ mewôme zamgbwa

²⁰ Me nga ke ôsu a ye'elan, a meme minkobane miam a mi Israél ayoñe dam, a liti minja'ane miam e be Nti, e Zambe wom, ajô nkôle wé ô n'étyi.

²¹ Me ye'elane nalé, nde Engele Gabriel me nga yene ñyenane wome y'ôsu, a nga yele avô a kui ma bebé awolo ebien ba ve mimveane ya mamengô'é,

²² ve nyiin a jô me na: A Daniel, me zuya éyoñe ji asu ya faé fe'e jôé éfufup.

²³ Eyoñ ebien wo te taté na wo ye'elane Zambe, foé éziñ ja te toteban é so'o be nye, nje ma te zu kate wo, amu Zambe *a nye'e wo. Ajô te, va'a nguleya wô'ô foé éte, a yemelan atinane ya ñyenane te.

²⁴ Mimbu mewôme zamgbwa biyoñe zamgbwa mi ne ntelan asu bôte bôé, a asu tison é n'étyi; éyoñe te ja yiane na melo me man, bikop bi man, a *abé e jamban, ndembene *zôsôô ya nnôm éto a ye yené, ñyenan a nkulane mejô bia ye tôéban, a *nda Zambe é n'étyi ja ye beta teléban étyi.

²⁵ Jam wo yiane yem a wôk nde di: ataté éyoñe foé ya nsoone minkôm ja te toteban, a nyô mfefé nlôñane Yérusalém, a kui nsoone évet é ne *ñwo'one mbon, mimbu mewôm menyin mia ye lôt. Wôna tañe mimbu mewôm mesaman a mibaé biyoñe zamgbwa, tison a aleme dé bia ye beta lôñeban, ve biyoñ bia ye bo ayaé.

²⁶ Eyoñe mimbu mewôm mesaman a mibaé mite mi maneya nyô a ne *ñwo'one mbon a ye vaseban, ve sa ñhe amu émien. Ve mfa'a tison a vôm a n'étyi, bôte be évete ja zu ba ye tyame bie. Ve da ayaa Zambe da ye su'ulane wôé évete te. V'a kui awu dé, a ye bo bita bia tyame mam aval e ne ntilan.

²⁷ Eyoñe ya mimbu zamgbwale mia su'ulan, a ye titi élat e bitule bi bôt abui yôp. Mvuse mimbu mila a étun, a ye telé mboone metuna'a a mimvean. Ntyame mam ate a ye bo b'angôndô mimboone mié avôl avô, akekui asu'ulan e ne ntelan da ye ku nye yôp.