DANIEL 7 - Kalate Zambe Nnomo a Mfefe Mfefé Nkôñelan

Ñyenan ôsu Daniel a yen: Betite benyin

¹ Mbu ôsu Beltsazar a nga jôô e Babilôn, Daniel a nga yem biyeyem, nsisime wé ô nga jaé a miñyenan mi mam a bôô énoñe jé. A nga su'ulane tili biyeyeme bite. Mbie bi:

² aval a nga kañete bie: A alu, me nga yene évuñulu é so'o meku'u menyine ya vôme mis ma su'u e teme mañ.

³ Nde beta betite benyin be nga vame mañ; tit ése é sela'ane ba bevok.

⁴ Nyô ôsu, é mbe é funa'ane ngbwengbwem, ve é be'e mefap ane ndôé; me ngenane me fombô'ô, nde be nga vaa nye mefap. E nga tebe tetele a mebo mebaé ya mvus ane môt, nde fe be nga ve je fe'e môt.

⁵ Tite baa é mbe é funa'ane Urs; é nga tebe éfase jia, mvaé éla é too nye anyu, e zañe mesôñ; be nga jô je na, é tebe a ke di abui minsôn.

⁶ Me ngenane me kele ôsu a fombô, nde ma yene tite fe é funa'ane ze, mefabe m'ônone menyin me too je mvus, a minlô minyin, é nga nyoñe ngule ya jôô.

⁷ Me ngenan me kele ôsu a yene mam me nga kui me a alu, nde ma yene tite nyini é too ékowoñ, a angôndô, njalan a avale ngul afe; é nga be'e beta mesôñ m'étyé asu ya di, a nyabe biôm a bi, a tibi'i biôm a ne te di a mebo. E nga selane betite bevo'o belale y'ôsu beta nselan; é nga be'e minla'a awôm.

⁸ Me ngenane me fombô'ô minla'a mite, mfefé nlak ô kuik e mi mivo'o zañ, ve ô dañe tyôtyoé, nde wo kpwé minla'a milale y'été. Mfefé nla'a wu ô nga bili mis ane môt, a anyu e mbe e kobô'ô nkobô mebun.

Ntyi'an Zambe a tyi'i ajô

⁹ Me nga ke ôsu a fombô: be nga telé bito bejôô, nde nnôme môt ô nga zu tabe si. Nnôme môte te ô nga be'e bifumulu mengômesan ane sut, a ésile jé ane nya mevule me ntômba. Eto njôane jé, ane nkaba'a nduan é nga bili minka mi faék ane nduan ja yôñ.

¹⁰ Osôé nduan ô mbe ô vamek a sôé nye ôsu. Beakutu, mewôm b'akutu be bôt, be nga tele nye ôsu be saane nye. Eyoñe te aba mejô e nga sulan a bekalate be nga kuiban.

¹¹ Me nga ke ôsu a fombô amu nkobô mebun a zô'é mone nlak a mbe a bo'ok. Me fombô'ô, nde ba wôé tite nyini; be nga jiane mbime wé a ñwuan be nga wua je e nduan été.

¹² Wôna be nga vaa betite bevo'o éjôé jap, ve be nga ndamé ényiñe jap nté éziñ.

¹³ Me nga ke ôsu a fombô miñyenan mi nga kui be ma a alu: vevea jôm a funa'ane môt a nga so minkute yôp été. Nde a nga zu vôme nnôme môt ô mbe, amu be nga zuu nye ôsu vié.

¹⁴ Nde be nga ve nye ndañan, duma, éjôé. Asu ya na bôte ya mesi mese, *meyoñ mese a *minkobô mise mi saane nye. Ndañane wé wo ye tabe nnôm éto, teke man, a njôane wé wo ye bo te tyamban.

Nkôñelane ya nyenan ôsu

¹⁵ Woñ ô nga bi ma Daniel a kui foñ, amu miñyenane mite mi mbe ékowoñ.

¹⁶ Nde me nga subu wua ya bôte be mbe valé bebé, a sili nye atinane ya jam me nga yen. Nde a nga bo na me yem atinan.

¹⁷ Betite bete benyin be ne ndeme ya bijôé binyine ya *si nyô.

¹⁸ Mvuse jap nje *ayoñe Zambe da dañ ôyabe yôp e n'étyi da ye nyoñ éjôé a ba'ale je nnôm éto.

¹⁹ Wôna, me nga dañe kômbô yem ajô tite nyini, nyô é mbe é sela'ane ba bevo'o belaa; é mbe ékowoñ a lôte nné, mesôñ m'étyé mé a biaé bi mvote bié, é mbe é ja'ak a nyabe biôm a bi, a tibi'i ki biôm a ne te di a bebo.

²⁰ Me nga sili fe minsili ajô minla'a awôm mi mbe tite nlô a ajô nla'a ô nga kui a kpwé minla'a milale y'été; nla'a te ô nga bili mis a anyu e nga kobô mebun, ô dañ ayap a mi mivok.

²¹ Me fombô'ô, nde nla'a te ô nga taté na wo wosane ayoñ e n'étyi a dañe de.

²² Ve nnôme môt ô nga zu a tyi'i *ayoñe Zambe da dañ ôyabe yôp e n'étyi ajô. Eyoñ éyoñ é nga kui, nde ayoñ e n'étyi e nga nyoñ éjôé.

²³ Nde me nga nyoñe nye'elane wu: Tite nyini é ne ndeme éjôé nyini ya *si nyô é sela'ane bi bivo'o bise. Ejôé te ja ye kui na é mane mine *si nyô ése, a tibi je a mebo, a nyabe je bifus.

²⁴ Minla'a awôm mi ne ndeme bejô bôt awôm ba ye bo minlô ya éjôé te. Njô bôt awôm a wua, a sela'ane ba y'ôsu, a ye nyoñ éjôé éyoñ a tatéya vaa bejô bôte bevo'o belaa.

²⁵ A ye kobô Zambe a dañ ôyabe yôb ébiasé, a tibili ayoñ e n'étyi, ayoñe te da ye ke éjôé jé si tañe mimbu mila a étun.

²⁶ Mvuse valé nje aba mejô ya yôp da ye sulan a vaa nye ndañane wé; ndañane te wo ye bo zesé a tyambane nnôm éto.

²⁷ Ejôé, ndañan a anene ya bijôé ya *si nyô bia ye veban e be *ayoñe Zambe da dañ ôyabe yôp e n'étyi. Ejôé ya ayoñe te ja ye tabe nnôm éto, a mingungule minjôane mise ya émo ji mia ye wô'ô nye a saane nye.

²⁸ Nkañete ñwô wo mane vana wu. Mfa'a ma Daniel, asimesane dam e nga bo fo'o me na me ko woñ, ajô te me nga bo élumelum, a awolo ese me nga simesane mam mete.