Markus 2 - Ɓwaatiye New Testament

Yesu a gwadə ama ka ootɨ ndongtə

¹ Aa ɗɨm bətə ite Yesu a mɨna pɨrə Kafanawum ɓə, ɓwaare a kɨlə atɨ ɓə mɨna a hwoɗye.

² Ɓwaare hananang a peyə, vənye ka haa bwange a naa, taa haa də mbiɗi, də nda hiwarən ka le da Həmɨnpwa.

³ Imi a shi tən ka i moryi fwat 'ye nggura ama ka ootɨ ndongtə a shikan a haka Yesu.

⁴ Shezə gə fure da ɓwaare tənaa ɗɨm haa pɨrtə. Təna ɓə nggɨrə a wunhaa a nə vɨna Yesu a gə vorsən, a jengdə ma ka ootɨ ndongtɨngɨn a nə kpəkləkye dan a waka ɓwaare gbyel a humwa Yesu.

⁵ Ite Yesu ɓe naa mwadiyale darən, nda sa ma ka ootɨ ndongtɨngɨn atɨ, “Nze, mye nggurugə səhase dəw.”

⁶ Də imi dɨ vor ji-lee kəndə ɓashita Musa 'ye a hangɨn ɓe kɨl la Yesu a boyo, təna ɗyengle ta ɗiyəsə,

⁷ “Wonə nda ma ka byelə waka, ka kɨɗa kwakɨ Həmɨnpwa? Gəkɨlə taa ama də ɓa ngguro ɓwaara gə səhase a pɨrgə Həmɨnpwa ɓəmbə.”

⁸ A hangɨn Yesu kɨlə a sɨsən lee mbali ləməgyee təna dɨ boyə hubosərən, nda ɓə sarən, “Ɓə ya hwuna nza a dɨ ndələ ka ləməngɨn a hubosəwna?

⁹ Ɓə ndoɗi pɨri, mya sa ma ka ootɨ ndongtə, ‘Mye nggurugə səhase dəw,’ naasə mgban mya san atɨ, ‘Maɗi nggur sɨbətɨ dəw woyi muɗi’?

¹⁰ Gə hwuna leyə atɨ hɨn Nze da Ɓwaara nee ka gətɨ nggurgə səhase ganə a vor vɨratə.” Nda ɓə sa ma ka ootɨ ndongtɨngɨn atɨ,

¹¹ “Hɨnə dɨ səw, maɗi nggur sɨbətɨ dəw muɗə hwoɗye.”

¹² Nda maɗə tan-tan a kangə a nggur sɨbətɨ dan dɨsərən a woyo humwaasərən a dɨmə a muɗə. Tən kat təna ɗa ndəle, tən ta ndukodə Həmɨnpwa, tən ta sa atɨ, “Hinaa ndaga naa wule se ɓətɨgə anə.”

Yesu wa Levi

¹³ Yesu a mɨna mɨnə kwaka gərə Galili. Ɓwaare a paya a hakan hananang, nda tiya kəntə kənərən shee.

¹⁴ Beetɨ angɨn Yesu woyo dɨ pɨri, nda naa a nzə-luu taa shemti nze da Alfiyus a mya dɨ wa atɨ Levi sɨne nza kwaamɨ lyentɨ dan. Nda san atɨ, “Kwaɗe.” Levi a maɗə a koɗən a gəə lagba dan.

¹⁵ Beetɨ angɨn, Yesu a pɨrə hwoda Levi a nza ɓɨdɨmə a dɨ zɨmshe. Ji-luu taa shemtə ka i tataryi ɓwaare a shi a nza a ɓɨdɨmə mgban a dɨ zɨmshe ka Yesu ka lagbe dan, gəkɨlə wule mingɨn hananang koɗə Yesu.

¹⁶ Ite Farise ka i ji-lee kəndə ɓashita Musa 'ye a vorsəngrən ɓe naa ləngɨn, təna nggwonə lagbe da Yesu shee a sa, “Gə mɨnə hwuna dɨ zɨmshe ka ji-luu taa shemtə ka i tataryi ɓwaare?”

¹⁷ Yesu ɓe kɨl ləngɨn, nda luwa a sarən, “Myee dwat aa dɨ zə haka nzə-ɓwatə, ji-ootə nə ɓəmbə dɨ zə mgba nggume. Hɨn taa shi vɨratə gə na waga myee dɨ nggur nəngrən ɓətɨ tən ji-ɗa səfemə, na shi gə ji-ɗa səhase.”

Mya ɗiyə Yesu le a nə nggur gone

¹⁸ A fərə lagbe da Yohana a dɨ gonə, sə mgban Farise a dɨ gonə. Imi asɨ ɗiyə Yesu le atɨ, “Ɓə ya lagbe da Yohana ka hɨnggə Farise a duwa gonə, mɨnə ɗa lagbe dəw aawa gona?”

¹⁹ Yesu a luwa a sarən, “Ɓə ya omyee shi hwoɗi ləke ɓa mɨna gona? Tənaa dɨ gonə anda ngaja nee nza ɓwaa kaarən.

²⁰ Di fəra mya kɨr ngajangɨn, a fərəngɨn tən ɓa gona.

²¹ “Taa ndəng ama ɓa nggur sɨ baasə hwele a mbaka a nə rukutə iire. Kwaamɨ baasə hwele ɓa nggəl rukutə iirəngɨn a sɨran nda tawo, sɨrtɨngɨn ɓa mɨna hasə.

²² Sə mgban, myaa dɨ nggur mbul-mbulə vwa dɨ huba a pukə vor səgyee iira, mye kana ɗaasə, vwe ɓa huba a fala səgye, vwe a kəji. Mya dɨ puk vwe a vor səgi hwelye.”

Həmɨ fərə piyatə

²³ A mɨni a fərə piyatɨ da Yawude, Yesu a woyo ka lagbe dan a koɗə dɨ vor i gaashi, lagbe dan a sər gyelkətɨ zumwe a posə ta tuuli.

²⁴ Imi dɨ vor Farise a ɗiyə Yesu atɨ, “Niyi mɨnə ɗa lagbe dəw a dɨ ɗa sa ɓashita Musa a kərdən a nə fərə piyata?”

²⁵ Yesu a luwa a sarən, “Hwunaa ndaga bəlshe a nə sa Dawuda a ɗa ka myee nda gə kaarən kat a ite myatə a gərən?

²⁶ Ite Abiyata nə Kɨsahəmə kpane, Dawuda a pɨrə vor hwoda Həmɨnpwa a nggur buroditɨ ɗəmɗəmte mya ɗa gə le da kɨsehəmyee dɨ lyenə vor hwoɗingɨn ɓəmbə, nda zɨmə ɓwaa ka myee nda woyo kaarən.”

²⁷ Nda mɨna sarən atɨ, “Myaa ɗa ɓwaara gə fərə piyatə, mya ɗa fərə piyatə gə le da ɓwaara.

²⁸ Hɨn Nze da Ɓwaara, hɨnə həmɨ fərə piyatə.”