Markus 16 - Ɓwaatiye New Testament

Yesu maggə taane

¹ Ka fərə kaade ite fərə piyatə pɨrə, yə Maryamu dɨ Magdala ka Maryamu nuwogə Yakubu ɗɨkənə Salomi a wudə a ɗara maare ka shi ɨhɨng-ɨhɨngye gə təna dɨ bəsə wo Yesu.

² Ka haa kɨɗatə dung-dung a fərə tiya lyenta Yawude, mandingɨn a maɗə tan, fəre a fɨlarən a nə tɨfə muttə a taane.

³ Təna shea kangə ta ɗiyəsə atɨ, “Ɓə wonə ɓa mgbəngtənge də faratə a nggəɓəddə gə kwaamɨ taane?”

⁴ Təne a vor byele tən ta maddə diingrən a niyə, mye nggəɓəddə kaɓa faratɨngɨn gə kwaamɨ taane.

⁵ Tən ta pɨrə vor taane, təna naa a nzə-lagba kala shikungye, sɨne nza basa tɨfə zɨme, kala a gərən tən ta ndəli ka ləngɨn.

⁶ Mangɨn a sarən, “Ɓe hwunaa ndələ ka ləngɨn. Yesu a dɨ Nazarat nə hwuna dɨ ɨlə, ndi ma mya gbaltən. Ndi maggə we ka myentə. Ɓə tam ganə. Niyəm naamə haa mya bədə wongɨn də.

⁷ Zə wudəm boyəmə lagbe dan kat ka Bitrus atɨ, ‘Ɓə luwownə kwamətə dɨ muɗi ɓa pɨrə njiya Galili. Də a hangɨn hwun ɓa pan ɓətɨ nda liya boyownə.’ ”

⁸ Ka sɨtɨ waratə ka kala, mandingɨn a dɨmgə taane a gyeɓə. Kwaamɨngrən aa yə mworən byelə gə tən mbərə ka kala.

[Dorshi tikɨshi kwamətə ka takala mya vədən dɨ haka Markus tamdə ka 16.9-20 .] Yesu a dɨma ka myee dɨ koɗən

⁹ Ite Yesu a maggə taane ka myentə ka haa kɨɗatə a fərə tiya lyentɨ da Yawude, metɨ kwaməte nda dɨma kaarə nə Maryamu dɨ Magdala ite nda dɨmərədə pɨle ji-dwatə tukolukpe dɨ sɨsə.

¹⁰ Ngga muɗə a wudə a boyə mbiɗitɨ myee təna gə ka Yesu, ngga parən kat təne a vor vɨne dɨ təwi ta kehee.

¹¹ Ite təna kɨlə atɨ Yesu nee ka myentə baa nggi peyə kan, tənaa mwaka ləngɨn.

¹² Beetɨ angɨn Yesu a dɨma ka imi kpe dɨ vorsərən a itɨ sɨti ite təne dɨ woyi dɨmgə Urshelima dɨ muɗə a haa.

¹³ Mingɨn a mɨnə vor Urshelima asɨ boyə mbiɗisərən ləngɨn. Shezə myee mya boyərən aa mwaka ləngɨn.

¹⁴ Dɨ bee nda dɨma ka lagbe dan bəw a mbiɗi-hiɗə təne nza kat dɨ zɨmshe, nda dɨkarən gəkɨlə mgbɨləha ka ɗongə mwadiyale darən ka ite tənaa mwaka le da myee nan ka myentə.

¹⁵ Nda mɨna sarən atɨ, “Dɨməm pɨrəmə hee kat a vor vɨratə, hiwamə nagi ndo sə kat a Həmɨnpwa ɗarən ka ləmə feme dan.

¹⁶ Ma mwadiyale ke mya ɗan batisɨmatə ka haɓye, ɓa ɗɨm mbətə, ma kwo mwadiyale ke, ɓashitɨ we nee a nəngɨn.

¹⁷ Myee mwadiyale ke tən ɓa ɗɨm gətə a ɗa sɨndəle som-som. A vor kwaka tən ɓa dɨmdə pɨle ji-dwatə gə sɨtɨ ɓwaare. Tən ɓa bwe kwaame som-som,

¹⁸ tən ɓa kət rokonye ka tefingrən rokonyingɨn aa dɨ ɗawtɨrən. Nagi təna sop kyanatə asə aa dɨ gərən. Tən kana ɗa hiwtə a pukə ji-ootə tefingrən, tən ɓa piyagə ootə a nyerə.”

Mya nggur Yesu a muɗə pwa

¹⁹ Ite Yesu Həmɨmiye bwe le kaarən mbəə kat, mya nggutən nda muɗə vor pwa a nza tɨfə zɨməngə Həmɨnpwa.

²⁰ Beetɨ shingɨn kat, lagbe dan a dɨmə a muɗə hee som-som ta hiwa ka le da Həmɨnpwa. Həmɨmiye a ɗa lyentə kaarən, dɨ ha bɨldə diyalə ləməgye dan ka vətə vərən gətɨ dan ite təna ɗa zərgi səkushipe kaarə.