Yoane 2 - Bokanda Bona Yakomba Bon’ototo

¹ En’ina bon’esaso, baofumb’elambedya ena nsongana ena Kana, ecimo emoi ena Ngalilaya; ko nyango ena Yesu ayaaki meho;

² ko baelela Yesu nkoho, ende l’akili’anande, en’elambedya eho.

³ Eneki vina osilaka, nyango ena Yesu amosumola, ate, Bafana nko le vina.

⁴ Ko Yesu amokutwela, ate, Boyoto, emi l’e tond’oya? Esike enami etayele.

⁵ Nyango enande aosumola basali, ate, Yoi lin’etaketaka linalingi’nd’okosumol’ino, bila nko liho.

⁶ Mpoke botoa inay’okolo ina baufe iyaaki meho, nko lacin’ena bokotua bona Ba-Yuda bon’esongwelo, ko mpoke la mpoke ekoli la litres ntuku inei.

⁷ Yesu amasumola, ate, Bolodya basi ena mpoke nko to. Ko baolody’iho nko to.

⁸ Ko amasumola, ate, Botokol’isanga, ko botoela iyome ina elambedya.

⁹ Ko bamotoela. Ko eneki iyome in’elambedya omekaka basi banahalingwaka vina, ko ateya eneki vina eho oyaka (kanga basali banatokolaki basi baeyaki), iyome in’elambedya aelala nsongi ena booli,

¹⁰ ko amolokwela, ate, Boto l’oto aambedy’ato en’oso nko vina en’olotsi, koko enengi bato omela bike, amaambedy’eho enefan’olotsi bik’ike; koko e omomonya vina en’olotsi yengoko esik’ene.

¹¹ Yesu akambaki ndembi ene, nko ndembi enande en’oso, ena Kana en’onyanga bona Ngalilaya, ko aenyanya mpamba enande, ko bakili’anande bamimedya.

¹² Ena mbusa en’aoyi’aho, aokita ena Kapalanauma, ende la nyango enande, l’akune ko l’akili’anande. Koko batayala meho beco bike.

¹³ Koko elambedya en’Etelo ena Ba-Yuda eolama, ko Yesu aocoa ena Yelusalema.

¹⁴ Ko aosungya en’otumba bona Yakomba iy’anatekyaki ngombo, la mpate, la bikoso, ko l’iy’anengisolaki francs baokisase nko meho.

¹⁵ Aoloha mpimbo la besinga, ko amafodya iyatu en’otumba bona Yakomba, le mpate le ngombo nkoho; ko aofafanza francs iniyo banengisolaki, ko aokalimola mesa iniyo;

¹⁶ ko aosumol’iy’anatekyaki bikoso, ate, Umola biho mendo: botilake botumba bon’afango’onami botumba bona baongwa.

¹⁷ Ko bakili’anande baokanedy’oka yoi litengamaki’ale: Mposa mene en’otumb’one emonkadya.

¹⁸ Koko Ba-Yuda baotenda l’ende, bamufola, Mbo ndembi enatotum’e eka nai? lacina okamba baoyi’ane.

¹⁹ Yesu amautodya, ate, Bofakola botumb’one bona Yakomba, ko nongofaka boho lakina ena bekol’esaso.

²⁰ Lacin’eho, Ba-Yuda baila, iy’ate, Efakelo en’otumb’one eyaaki mbula ntuk’inei la mbula botoa, ko e ongut’ofaka boho en’in’esaso?

²¹ Ohonde aotenda lacin’ena botumb’onande bon’oeka, nko yonge linandamene.

²² Koko eneki’nd’oetwaka en’ewedi, bakili’anande baofwaki’oka atendaki yoi line, ko baimedya Bitengelo bina Yakomba, ko la yoi linaliki Yesu otendaka.

²³ Koko eneyal’ende ena Yelusalema en’elambedya en’Etelo, bike bon’ato bimedya ena lina linande, enek’iy’oenaka ndembi iniki’nd’okambaka.

²⁴ Ko Yesu atimedy’oka ail’otema eneyal’iyo lacin’oka aeyaki bato bahatu;

²⁵ ko atalela boto onomosumola bokotua bon’oto, lacin’oka endamene aeyaki betema ben’ato.