Filipifoɔ nwoma 2 - Apam Foforɔ

Nuadɔ

¹ Ɔnam sɛ Kristo mu nkuranhyɛ, Kristo dɔ awerɛkyekyerɛ, Kristo Honhom mu ayɔnkofa, Kristo mmɔborɔhunu ne tema ya ho mu nti,

² homma m’anigyeɛ nwie pɛyɛ: honnya adwene korɔ ne dɔ korɔ, hontena koroyɛ mu na honya botae korɔ.

³ Honnnyɔ bibiaa pɛsɛmenkomenya ne animuonyamhunupɛ mu, na mmom homfiri ahobrɛaseɛ mu mmu afoforɔ te sɛ bɛkyɛne ho.

⁴ Mmma ho mu biaa nhwɛ nnoɔma a ɔfa ɔno nkoaa ne ho, na mmom honhwɛ nea ɔfa afoforɔ nso ho bi.

⁵ Honnya adwene a ɔya Kristo Yesu mu heaa bi;

⁶ “ɔno ne na ɔya Nyankopɔn tebea mu deɛ, nso wannyina so ketee sɛ ɔne Nyankopɔn yɛ pɛ,

⁷ na mmom ɔtoo ne ho mpan, faa akoa tebea too ne ho so, bɛyɛɛ nipa, na sɛ deɛ ɔyɔɔ n’adeɛ faeɛ he, behuu no sɛ nipa,

⁸ ɔbrɛɛ ne ho ase yɛɛ setie de kosii wuo mu, ɛɛ! asennua so wuo mu mpo.

⁹ Yei nti ne Nyankopɔn ama ne so kɛse, na wama no dini a ɔkyɛne dini nyinaa,

¹⁰ sɛ Yesu dini mu ne nkotodwe, a ɔya soro, asaase so anaa asaase ase nyinaa nkoto,

¹¹ na kɛtrɛma nyinaa mpae mu nka sɛ Yesu Kristo ne Awurade, ahyɛ Agya Nyankopɔn animuonyam.”

Nkwagyeɛ ho mmɔdemmɔ

¹² Saa nti, m’adɔfoɔ, sɛnea hoyɔ setie ma me daa he, ɔnyɛ sɛ berɛ a meya ho nkyɛne nkoaa mu, na mmom seesei a menni ho nkyɛne titire he, homfa suro ne ahopopoɔ nyɔ hoaa ho nkwagyeɛ ho adwuma;

¹³ efiri sɛ, Nyankopɔn ne yɔ ho mu adwuma, na ɔma ho pɛ a hode yɔ n’adwuma ama asɔ n’ani.

¹⁴ Hommfa anwiinwii ne nyiyiano nyɔ bibiaa,

¹⁵ na ho ho amma asɛm biaa, na hoadi bem, sɛ Nyankopɔn mma a nkekaeɛ nni bɛ ho, nnɛ abusua a bɔne ahyɛ bɛ ma na bɛamane afiri wiase a hohyerɛn mu sɛ nsoromma,

¹⁶ berɛ a hokita nkwa nsɛm he mu dene na ama matumi ahoahoa me ho Kristo da he sɛ mantu mirika hunu anaa manyɔ adwuma hunu.

¹⁷ Na mpo, sɛ ɔsɛ sɛ behwie me mogyaa gu sɛ beegu nsa ɔnam ho gyidie ne ho afɔrebɔ nti a, ɔma m’ani gye, na me ne ho nyinaa di ahurusie,

¹⁸ na saa ne ɔsɛ sɛ ho nso ho ani gye na ho ne me di ahurusie.

¹⁹ Mewɔ anidasoɔ Awurade Yesu mu sɛ ɔnkyɛre biaa mɛsoma Timoteo aba ho nkyɛne, na mete ho ho asɛm a ama me anigyeɛ.

²⁰ Menni biaa a ho yiedie hia no nɔkorem sɛ ɔno,

²¹ efiri nnipa a bɛaka he deɛ, bɛhwehwɛ nea ohia bɛ nkoaa, na mmom ɔnyɛ Yesu Kristo deɛ.

²² Na Timoteo mudie deɛ, honim, sɛdeɛ ɔne me asom asɛmpa adwuma he mu sɛ agya ne ne ba.

²³ Saa nti m’ani da so sɛ, sɛ mehu sɛnea nnoɔma ɔɔkɔ ma me pɛ a, mɛsoma no.

²⁴ Na mewɔ ahotɔsoɔ Awurade mu sɛ me ankasa nso ɔnkyɛre, mɛba.

²⁵ Ne nyinaa akyi, mesusuu sɛ, ohia sɛ mesoma Epafrodito, me nua ne me yɔnko dwumayɔni ne me yɔnko sraani a ɔyɛ ho somafoɔ ne somfo ma me he ma no ba ho nkyɛne,

²⁶ efiri sɛ, n’ani agyina ho nyinaa na ɔha no sɛ hotee sɛ ɔyare.

²⁷ Ampa, ɔyare paa sɛ nka oowu. Nso Nyankopɔn huu no mmɔbɔ, na nyɛ ɔno nkoaa me nso waahu me mmɔbɔ bi, sɛ ɔbɛyɛ a menhu awerɛhoɔ ntoa awerɛhoɔ so.

²⁸ Nti ne me ho pre me kɛse sɛ mɛsoma no ho nkyɛne, na sɛ hohu no bio a hoadi ahurusie, na m’adwendwene so ate.

²⁹ Nti homfa anigyeɛ nnye no fɛ so Awurade mu, honni nnipa a bɛte saa he ni,

³⁰ efiri sɛ, oduru wuo ne nkwa nkwanta, Kristo adwuma nti, ɔde ne nkwa bɔɔ afɔdeɛ sɛ obesi ho anane mu asom me.