Roma 2 - Bible bil 3arabe App

Deynounet ALLAH

¹ Kermel hek ma 3endak 3ezr meen ma kent, enta yalle bitdeen el-ãkharin w-bta3mil a3melon, li2annak lamma bitdeenon bitdeen 7alak.

² W-ne7na mna3rif enno ALLAH bideen bel-3adl yalle bya3mil metl hal-a3mel.

³ W-enta, yalle bideen yalle bya3emlouwa w-bta3mil metlon, mfakkar ennak ra7 teflat min deynounet ALLAH?

⁴ Aw ennak 3am te7te2ir ra7mto w-tibto, w-toul belo, w-enta mish 3arif enno ALLAH baddo bi-ra7mto y2oudak lal-tawbe?

⁵ Bass bi-2asewet 2albak w-3nedak bitjamme3 la-nafsak ghadab la-yawm el-ghadab, wa2et yalle btenkeshef deynounet ALLAH el-3adle,

⁶ w-bi7aseb kell wa7ad 7asab a3melo,

⁷ w-bitkoun el-7ayet el-abadiyye la-yalle biwãzbo 3al-3amal el-sale7 w-byes3o lal-majd wel-karame wel-khouloud,

⁸ aw bikoun el-ghadab wel-sakht lal-metmarrdin yalle byerefdo el-7a2 w-byel7a2o el-batel.

⁹ Wel-weyl wel-3azèb la-kell 2ensen bya3mil el-sharr min el-Yahoud awwal shi w-min ba3da el-Youneniyyin,

¹⁰ wel-majd wel-karame wel-salem la-kell meen bya3mil el-kheyr min el-Yahoud awwal shi w-min ba3da el-Youneniyyin,

¹¹ li2anno ALLAH ma biseyer 7ada.

¹² W-yalle khetyo w-ma 3endon shari3a, bidoun shari3a bile2o el-halek. W-yalle khetyo w-3endon shari3et Moussa, bi-shari3et Moussa byendeno.

¹³ Mish yalle byesma3o kalem el-shari3a henne el-abrar 3end ALLAH, yalle byemsho 3al-shari3a henne yalle byetbarraro.

¹⁴ Ye3ne el-mish Yahoud, yalle ma 3endon shari3a, eza 3emlo bel-tabi3a yalle bte2mor fih el-shari3a, keno shari3a la-7alon, ma3 enno ma 3endon shari3a.

¹⁵ W-bikouno barhano enno yalle bte2mor fih el-shari3a maktoub bi-2loubon w-btesh'hadlon damayeron w-afkaron, w-hiye marra btettehemon w-marra bitdefe3 3annon.

¹⁶ W-ra7 yezhar hayda kello, metl ma 3am basherkon fih, yawm yalle bideen ALLAH bel-MASI7 YASOU3 khafeya el-2loub.

El-Yahoud wel-shari3a

¹⁷ W-enta, yalle bitsamme 7alak Yahoude, w-btettekil 3al-shari3a, w-bteftekhir bi-ALLAH

¹⁸ w-bta3rif iradto, w-bitmayyiz shou houe el-afdal bi-yalle t3allamto min el-shari3a,

¹⁹ w-bte3te2id ennak ka2ed lal-3emyen w-nour la-yalle bel-3atme

²⁰ w-mou2addeb lal-aghbiya w-mou3allim lal-bousata, li2anno elak bel-shari3a kell el-ma3rife wel-7a2i2a.

²¹ Enta, yalle bit3allim ghayrak, ma bit3allim 7alak? Bitnede: ma tesro2, w-enta btesro2?

²² Bit2oul: ma tezne, w-btezne? Bte7te2ir el-asnam w-btesro2 hayekelon?

²³ Bteftekhir bel-shari3a w-bit'hin ALLAH bi-moukhaliftak la-shari3to?

²⁴ El-kteb bi2oul: "bi-sababkon byestahino el-nes bi-esm ALLAH bayn el-oumam."

²⁵ Eza btemshe 3al-shari3a ken khatnak byenfa3, bass eza khelafet el-shari3a sert metl yalle mish makhtounin.

²⁶ W-eza keno yalle mish makhtounin byemsho 3al-shari3a, ma bye3teberon ALLAH makhtounin?

²⁷ W-yalle byemshe 3al-shari3a, w-houe mish makhtoun bel-jesm, ma bye7kom 3lek enta el-Yahoude yalle bitkhelef el-shari3a w-3endak a7kem el-shari3a wel-khatn?

²⁸ El-Yahoude mish yalle bikoun Yahoude bel-zaher, wala el-khatn houe yalle byezhar bel-jesm,

²⁹ el-Yahoude houe el-Yahoude min jouwwa, wel-khatn houe khatn el-2alb bel-Rou7 mish bi-7rouf el-shari3a. Hayda houe el-2ensen yalle byenmada7 min ALLAH mish min el-bashar.