Online Bible

RUTU 2 - Bisã Bible 2005

Rutu dakarɛna kũ Bɔazao

¹ Naomi zã Ɛlimɛlɛki bɛ gɔ̃gbɛ̃ ke kun, gbɛ̃ zɔ̃kɔ̃ aruzɛkɛdemɛ, a tɔ́n Bɔaza.

² Mɔabu nɔgbɛ̃ Rutu pì Naominɛ: Ǹ tó mà gɛ́ bura nagã kɔ̃nɔ wɛ màgɔ̃ tɛ́ gbɛ̃ kũ à ma wɛ̃nda gwà kpɛ. Akũ à pì a nɛ́ gyaanɔ pìinɛ: Ǹ gɛ́!

³ Akũ à fùtɛ à gɛ̀ɛ nagã kɔ̃nɔ wɛ bura, àdigɔ̃ tɛ́ pɔ́kɛ̃rinɔ kpɛ. Akũsɔ̃ bura kũ à gɛ̀ɛn pì bi Ɛlimɛlɛki danɛ Bɔaza buramɛ.

⁴ Akũ Bɔaza bò Bɛtilihamu. Kũ à kà gwe, à fɔ kpà pɔ́kɛ̃rinɔa à pì: Dikiri gɔ̃ kú kãáo! Akũ ò pìnɛ: Dikiri arubarika dangu!

⁵ Bɔaza pì a zĩkɛri kũ à de a pɔ́kɛ̃rinɔ gwàri ũnɛ: Dí mɛ́ à nɔkpare direkũ vĩi?

⁶ Akũ à wèa à pì: Nɔkpare pì bi Mɔabu nɔgbɛ̃ kũ Naomi bò kãao Mɔabunɔ bùsun à sù kãaomɛ.

⁷ À pì mà tó à nagã kɔ̃nɔ wɛ pɔ́kɛ̃rinɔ kpɛ, akũ àtɛn zĩ kɛ zaa kɔnkɔ. Teran à sù kámma bo fíti kuta gũn.

⁸ Akũ Bɔaza gɛ̀ɛ à pì Rutunɛ: Ǹ ma yã ma. Ǹsun gɛ́ nagã kɔ̃nɔ wɛ bura pãnden doro. Ǹsun gɛ̃tɛwálaro. Ǹ gɔ̃ la kũ ma nɔgbɛ̃ zĩkɛrinɔo.

⁹ Ǹ wɛ́ dɔ zĩ kũ òtɛn kɛa ǹgɔ̃ tɛ́ ń kpɛ. Ma ò ma kɛfɛnnanɔnɛ ò su wari dɔmmaro. Tó ími tɛni n dɛ, ǹ gɛ́ ǹ í kũ ò kà orozãnɔn mi.

¹⁰ À kùtɛnɛ à mìi nàtɛ à pì: À kɛ̀ dera makũ kũ buri pãnde nɔgbɛ̃n ma ũ, n laakarii dɔ̀ma, akũ n yã mana kɛ̀mɛnɛɛ?

¹¹ Akũ Bɔaza wèa à pì: Ò yã kũ n kɛ̀ n zã danɛ n zã ga gbɛra òmɛnɛ pínki, lákũ n n de kũ n dao tò nà kũ n bùsuuo, akũ n su n vutɛ gbɛ̃ kũ ń ń dɔ̃ yãronɔ tɛ́.

¹² Dikiri fĩna bonnɛ yã kũ n kɛ̀ɛ musu. Lákũ n su n sɔtɔ Dikiri Isarailanɔ Luda oruu gũn nà, à a fĩna bonnɛ manamana.

¹³ Rutu pì: Baa, n yã mana kɛ̀mɛnɛ fá! N ma laakarii kpàtɛmɛnɛ, n yã nna ò makũ n zĩkɛriinɛ, bee kũ n zĩkɛrinɔ doken ma ũro.

¹⁴ Pɔ́blegɔrɔ Bɔaza pìnɛ: Ǹ mɔ́ ǹ pɔ́ ble la ǹgɔ̃ burodi zɔ̃ dòoa. Akũ à vùtɛ pɔ́kɛ̃rinɔ sarɛ. Bɔaza pɔ́blewɛ kpatanaa kpàa, akũ à pɔ́ blè à kã̀ ari a kpara gɔ̃̀.

¹⁵ Kũ à fùtɛ àtɛn gɛ́ pɔ́ kɔ̃nɔ wɛ, akũ Bɔaza ò kɛfɛnnanɔnɛ à pì: Bee tó àtɛn pɔ́ kɔ̃nɔ wɛ nagã kũ à katɛna tɛ́, àsun wé'i daaro.

¹⁶ À a sà kenɔ bobonɛ nagã gũn à tó à a kɔ̃nɔ wɛ. Àsun pataaro.

¹⁷ Akũ à pɔ́ kɔ̃nɔ wɛ̀ ari ɔkɔsi. Kũ à zɔ̃̀ à a wɛ́ bò, à kà toko lɛ́ do taka bà.

¹⁸ Kũ à sɛ̀ à tào bɛ, akũ à pɔ́ kũ à a kɔ̃nɔ wɛ̀ pìi mɔ̀ a zã danɛ. À pɔ́ble kpara kũ à gɔ̃̀ pìi kpàa dɔ.

¹⁹ Akũ a zã da a là à pì: Mákpan n pɔ́ kɔ̃nɔ wɛ̀n gbãraa? N zĩ kɛ̀ máa? Luda arubarika da gbɛ̃ kũ à laakarii dɔ̀mman. Akũ à gbɛ̃ kũ à zĩ kɛ̀ a bura yã ònɛ à pì: Gbɛ̃ kũ ma zĩ kɛ̀ a bura gbãra tɔ́n Bɔaza.

²⁰ Akũ Naomi pì: Ma Dikiri sáabu kɛ̀! À kpɛ́ àtɛn gbɛ̃kɛ kɛ ókɔ̃nɔ kũ ó bɛ̃nɛnɔnɛ kũ ó gbɛ̃ kũ ò gànɔ. Akũ à ɛ̀ra à pì: Gbɛ̃ pì bi ó danɛ kãni buri mɛ̀n domɛ.

²¹ Akũ Mɔabu nɔgbɛ̃ Rutu pì: À pìmɛnɛ mà na a zĩkɛrinɔa ari ò gɛ́ pɔ́ kɛ̃ ò lákao.

²² Akũ Naomi pì a nɛ́ gyaanɔ pìinɛ: À mana ǹ gɛ́ kũ a nɔgbɛ̃ zĩkɛrinɔ de òsun wari dɔmma bura pãnde gũnlo yãi.

²³ Akũ à nà Bɔaza nɔgbɛ̃ zĩkɛrinɔa. Àdigɔ̃ pɔ́ kɔ̃nɔ wɛ ń kpɛ ari ò gɛ̀ɛ ò nagã kũ gbadoo kɛ̃̀ ò làka. À kú a zã da bɛamɛ.

« Previous