MATIU 7 - Bisã Bible 2005

Kɔ̃ taari'enaa

¹ Àsun gbɛ̃ taari ero, Luda ni á taari e sero.

² Zaakũ lákũ ndì gbɛ̃ taari e nà, lɛn Luda ni n taari e lɛ. Zaka kũ n yɔ̃ońnɛ ani yɔ̃onnɛ.

³ Bɔ́yãi ntɛn sɛ̃̀buru kũ à da n gbɛ̃dake wɛ́n ei, akũsɔ̃ ntɛn límukutu kũ à da n wɛ́n yã daroo?

⁴ Kũ límukutu da n wɛ́n, à kɛ̀ dera ĩni pi n gbɛ̃dakenɛ à tó ǹ sɛ̃̀buru kũ à da a wɛ́n bonɛɛ?

⁵ Manafikide! Ǹ límukutu kũ à da n wɛ́n bo gĩa, gbasa ǹ gu e swáswa de ǹ le ǹ sɛ̃̀buru kũ à da n gbɛ̃dake wɛ́n bonɛ.

⁶ Àsun Luda pɔ́ kpá kifirinɔaro, de òsun ɛra ò á kari kɛro yãi. Àsun á gbɛ̀ bɛ̀ɛrɛdenɔ zu alɛdɛnɔnɛro, de òsun táa o'oaro yãi.

Wɛ́kɛnaa

⁷ À wɛ́ kɛ, Luda ni kpááwa. À wɛtɛ, áni le. À gbà lɛ́, Luda ni wɛ̃árɛ.

⁸ Zaakũ gbɛ̃ kũ à wɛ́ kɛ̀ɛn òdi kpáa, gbɛ̃ kũ à wɛ̀tɛ sɔ̃ àdi le, gbɛ̃ kũ à gbàa lɛ̀ɛn oni wɛ̃nɛ.

⁹ Á tɛ́, dí mɛ́ ani gbɛ̀ kpá a nɛ́a, tó à burodi wɛ́ kɛ̀aa?

¹⁰ Tó à kpɔ̀ wɛ́ kɛ̀a sɔ̃, ani mlɛ̃̀ sɛ́ à kpáa yá?

¹¹ Bee kũ á vãnikɛo, á pɔ́ mana kpana á nɛ́nɔa dɔ̃. Oni á De kũ à kú musu pɔ́ mana kpana gbɛ̃ kũ ò wɛ́ kɛ̀anɔa pɔ́ o dɔ yá?

¹² À kɛ gbɛ̃nɔnɛ lákũ á ye ò kɛárɛ nà. Musa doka kũ annabinɔ yãnɔ mìin gwe.

Zɛ́lɛ kpakoto

¹³ À zɛ́lɛ kpakoto sɛ́. Zɛ́ kũ a lɛ́ yàasa akũ à mɛ̀poroki vĩ dì gɛ́ kũńwo kakatɛnaa gũmmɛ. Abirekũn pari tɛn sɛ́.

¹⁴ Zɛ́ kũ àdi gɛ́ kũńwo wɛ̃̀ndii gũn lɛ́ kpakoto à nakɔ̃ana, akũsɔ̃ gbɛ̃ kũ ò lè ò sɛ́nɔn dasiro.

Gbɛ̃ dɔ̃na a yãkɛnaaa

¹⁵ À laakari kɛ annabi ɛ́kɛnɔi. Òdi su á kĩnaa kũ sã bárao dana, ama lɛwanna nàdɛrinɔmɛ ń ũ.

¹⁶ Áni ń dɔ̃ ń yãkɛnaaa. Òdi geepi bo lɛ̀ líaro. Òdi kaka e babare láaro.

¹⁷ Lí mana dì nɛ́ nna i, lí vãni dì nɛ́ gina i.

¹⁸ Lí mana dì fɔ̃ à nɛ́ ginaa ìro, lí vãni dì fɔ̃ à nɛ́ nna ìro.

¹⁹ Òdi lí kũ àdi nɛ́ mana iro zɔ̃ ò zu tɛ́ gũmmɛ.

²⁰ Lɛmɛ áni ń dɔ̃ ń yãkɛnaaa lɛ.

²¹ Adi kɛ gbɛ̃ kũ àdigɔ̃ ma sísi Dikiri, Dikiri, mɛ́ ani gɛ̃ kpata kũ à bò Luda kĩnaa gũnlo, sé gbɛ̃ kũ àdi ma De kũ à kú musu pɔyenyĩna kɛɛ.

²² Yãkpatɛkɛgɔrɔ zĩ pari ni pimɛnɛ: Dikiri, Dikiri, o Luda yã òńnɛ kũ n tɔ́o bi! O tãnanɔ gòḿma kũ n tɔ́o bi! O daboyãnɔ kɛ̀ dasi kũ n tɔ́o bi!

²³ Mani pińnɛ súsu: Má á dɔ̃ zikiro. À gomala yãvãnikɛrinɔ!

Kpɛ́bori gbɛ̃nɔn planɔ

²⁴ Abire yãi gbɛ̃ kũ à ma yã dínɔ mà, akũ à zĩ kɛ̀a de lán gbɛ̃ laakaride kũ à a kpɛ́ bò gbɛ̀ɛa bàmɛ.

²⁵ Kũ legũ mà, í dàgula, ĩa kàka à sù kpɛ́ pìia, akũ adi lɛ́tɛro, kũ ò a ɛ̃ pɛ̀tɛ gbɛ̀ɛa yãi.

²⁶ Gbɛ̃ kũ à ma yã dínɔ mà, akũ adi zĩ kɛaro de lán mìsaride kũ à a kpɛ́ bò bùsu'atɛ̃a bàmɛ.

²⁷ Kũ legũ mà, í dàgula, ĩa kàka à sù kpɛ́ pìia, akũ à gbòro à lɛ̀tɛ gbìrim.

Yesu ikoo

²⁸ Kũ Yesu yã birenɔ ò à làka, a yãdannɛnaa bò pari sarɛ,

²⁹ zaakũ adi yã dańnɛ lán ludayãdannɛrinɔ bàro, à dàńnɛ kũ ikoomɛ.