MATIU 22 - Bisã Bible 2005

Nɔsɛ pɔnnakɛnaa

¹ Yesu ɛ̀ra à yã lɛ̀kɔ̃ańnɛ à pì:

² Lákũ kpata kũ à bò Luda kĩnaa de nàn dí dɔ. Kína ke mɛ́ àtɛn nɔsɛ pɔnna kɛ a nɛ́nɛ,

³ akũ à a zĩ̀rinɔ zĩ̀ ò o gbɛ̃ kũ à ń sísi ò mɔ́ pɔ́ blenɔnɛ ò mɔ́, ama ò ye ò suro.

⁴ Akũ à ɛ̀ra à zĩ̀ri pãndenɔ zĩ̀ à pìńnɛ: À gɛ́ à o gbɛ̃ kũ ma ń sísinɔnɛ ma sorumii mà, ma zùsanɔ kũ pɔ́kãde mɛ̀kpananɔ dɛ̀ ma kɛ̀kɛ kɔ̀. Ò mɔ́ nɔsɛpɔblekia.

⁵ Akũ odi laakari dɔ yã pìiaro, ń baadi gɛ̀ɛ a bɔkɔtɛ kɛ̀. Gbɛ̃kenɔ gɛ̀ɛ ń bura, gbɛ̃kenɔ gɛ̀ɛ laga tá.

⁶ Gbɛ̃ kparanɔ zĩ̀rii pìnɔ kũ̀kũ, ò wé'i dàḿma, ò ń dɛdɛ.

⁷ Akũ kína pì pɔ fɛ̃̀, à a sozanɔ gbàrɛ, ò gɛ̀ɛ ò gbɛ̃dɛrii pìnɔ dɛ̀dɛ, akũ ò tɛ́ sɔ̃̀ ń wɛ̃tɛa.

⁸ Akũ kína pìi pì a zĩ̀rinɔnɛ: Nɔsɛpɔble mà, ama gbɛ̃ kũ ma ń sísinɔ dí kɔ̃ síoro.

⁹ À gɛ́ zɛ́rankpakɔ̃anɔ gũn, à gbɛ̃ kũ a lè sĩnda pínki sísi nɔsɛpɔblea.

¹⁰ Akũ zĩ̀rii pìnɔ fùtɛ ò gɛ̀ɛ zɛ́nɔ gũn, ò gbɛ̃ kũ ò ń lénɔ kàkara, gbɛ̃ vãninɔ kũ gbɛ̃ mananɔ ń pínki. Lɛn nɔsɛ pɔnnakɛrinɔ gu pà lɛ.

¹¹ Kũ kína pìi gɛ̃̀ à pɔnnakɛrii pìnɔ gwa, à gɔ̃gbɛ̃ ke è gwe, à nɔsɛ pɔnna uta danaro,

¹² akũ à pìnɛ: Ma gbɛ̃, à kɛ̀ dera n gɛ̃ la nɔsɛ pɔnna uta danaa sarii? Akũ à yĩtɛna kítikiti.

¹³ Akũ kína pì a dogarinɔnɛ: À a ɔnɔ yĩ kũ a gbánɔ, à a zu bàai gusiran. Gwen oni ɔ́ɔ dɔn ò ɔ di ń mìia.

¹⁴ Zaakũ gbɛ̃ kũ Luda ń sísinɔn dasi, ama gbɛ̃ kũ à ń sɛ́nɔn dasiro.

Bɛ'ɔgɔkpana Sizaa yã

¹⁵ Abire gbɛran Farisinɔ bò ò gɛ̀ɛ ò yã gɔ̃̀gɔ̃ lákũ oni kɛ nà ò Yesu kũ a yã'onaa gũn.

¹⁶ Akũ ò ń ìbanɔ zĩ̀a kũ Hɛrɔdu gbɛ̃nɔ ò pì: Dannɛri, ó dɔ̃ kũ gbɛ̃ yãpurademɛ n ũ. Ndì Luda zɛ́ dańnɛ súsu, ndì gbɛ̃ wɛ́ gwaro, ndì gbɛ̃ gwena gwaro.

¹⁷ Lákũ n è nà ǹ owɛrɛ. À zɛ́ vĩ ò bɛ'ɔgɔ kpá Sizaa yá, ke à zɛ́ vĩro?

¹⁸ Yesu ń nɛ̀sɛ vãni dɔ̃̀ḿma, akũ à pì: Manafikidenɔ! Bɔ́yãi átɛni ma yɔ̃ à gwaa?

¹⁹ À ɔgɔ kũ òdi bɛ'ɔgɔ kpáo mɔmɛnɛ. Akũ ò ɔgɔ pì do kpàa.

²⁰ Akũ à ń lá à pì: Dí mì wãnzãn dí kũ a tɔ́oo?

²¹ Ò wèa ò pì: Siza pɔ́mɛ. Akũ à pìńnɛ: Ɛ̃hɛ̃ à pɔ́ kũ à de Siza pɔ́ ũ kpá Sizaa, á pɔ́ kũ à de Luda pɔ́ ũ kpá Ludaa.

²² Kũ ò yã pìi mà, à bò ń sarɛ, akũ ò tà ò a tò gwe.

Gɛ̀nɔ vuna yã

²³ Gɔrɔ dokɔ̃nɔ pì zĩ Sadusi kũ òdi pi gɛ̀nɔ dì ga à vuronɔ sù Yesu kĩnaa., akũ ò a gbɛ̀ka ò pì:

²⁴ Dannɛri, Musa òwɛrɛ tó gɔ̃gbɛ̃ gà nɛ́'isari, a dakũna a vĩ̀ni gyaanɔ sɛ́ de à nɛ́ buri dato a vĩ̀ninɛ.

²⁵ Tɔ̀. Dedokɔ̃nɔdenɔn kú ó tɛ́ yã gbɛ̃nɔn suppla. Woru nɔ sɛ̀, akũ à gà à nɔ pìi tò nɛ́'isari, akũ gyaanɔ gɔ̃̀ Sabinɛ.

²⁶ À kɛ̀ Sabinɛ lɛ dɔ kũ Biɔo ari à gɛ̀ɛ pɛ́ ń suppladea.

²⁷ Ń pínki gbɛran nɔ pìi gà se.

²⁸ Tɔ̀! Gɛ̀nɔ vuna gɔrɔ zĩ ń gbɛ̃nɔn suppla pìnɔ tɛ́ dí mɛ́ anigɔ̃ nɔ pì vĩi? Zaakũ ń pínki ò a dɔ̃̀ nɔ ũ.

²⁹ Akũ Yesu wèḿma à pì: A sãtɛ á Luda takada kũ a gbãnao dɔ̃naa sari yãi.

³⁰ Tó gɛ̀nɔ vù, ò nɔ sɛ́ro, ò zã kɛro, onigɔ̃ kun lán malaikanɔn kun nà ludambɛmɛ.

³¹ Gɛ̀nɔ vuna yã musu ádi yã kũ Luda òárɛ kyó kɛroo? À pì

³² akãamɛ Ibrahĩ kũ Isaakuo kũ Yakubuo Luda ũ. Luda dì kɛ gɛ̀nɔ Luda ũro, gbɛ̃ bɛ̃nɛnɔ Ludamɛ.

³³ Kũ gbɛ̃nɔ yã pìi mà, a yãdannɛnaa bò ń sarɛ.

Dokayã kũ à deńla

³⁴ Kũ Farisinɔ mà Yesu Sadusinɔ fù, ò kɔ̃ kàkara.

³⁵ Akũ ń dokadɔ̃rinɔ do a yɔ̃̀ à gwa, à a là à pì:

³⁶ Dannɛri, dokayã kpate mɛ́ à de a kparanɔlaa?

³⁷ Yesu wèa à pì: Ǹgɔ̃ ye Dikiri n Ludai kũ nɛ̀sɛ mɛ̀n doo kũ n ninio pínki kũ n laasunnwo pínki.

³⁸ Dokayã kũ à bɛ̀ɛrɛ vĩ de a kparanɔlan gwe.

³⁹ A plade kũ à bòkɔ̃aon dí: Ǹgɔ̃ ye n gbɛ̃dakei lán n zĩda wɛ̃̀ndii bà.

⁴⁰ Musa doka pínki kũ annabinɔ yãoo lokona dokayã mɛ̀n pla dínɔamɛ.

Arumasihu buri yã

⁴¹ Lákũ Farisinɔ kakarana nà, Yesu ń lá à pì:

⁴² A è dera Arumasihu yã musuu? Dí burin a ũu? Ò wèa ò pì: Dauda burimɛ.

⁴³ Akũ Yesu pìńnɛ: À kɛ̀ dera Luda Nini dìdi Daudaa, akũ Dauda Arumasihu sìsi Dikirii? À pì,

⁴⁴ Dikiri pì ma dikirinɛ à vutɛ a ɔplai ari àgɔ̃ a ibɛrɛnɔ kátɛnɛ a gbá gbáru.

⁴⁵ Kũ Dauda pìnɛ Dikiri, à kɛ̀ dera anigɔ̃ de a buri ũ dɔɔ?

⁴⁶ Gbɛ̃ke dí fɔ̃ à wèaro. Zaa gɔrɔ birea gbɛ̃ke dí sù à yãke laa doro.