Online Bible

ƐSITA 9 - Bisã Bible 2005

Yudanɔ zĩ̀blena ń ibɛrɛnɔa

¹ Mɔ kuri awɛɛplade Ada gɔrɔ kuri awɛɛ'aakɔ̃de zĩn yã kũ kína dìtɛ kɛgɔrɔ ũ. Zĩ kũ̀a Yudanɔ ibɛrɛnɔ wɛ́ dɔi yã kũ ò gbãna mɔ Yudanɔnɛ, ama yã pìi lìtɛ kpɛdangara, akũ Yudanɔ gbãna mɔ̀ ń ibɛrɛnɔnɛ.

² Kína Asueru bùsunɔ gũn pínki Yudanɔ kɔ̃ kàkara fárandi kũ ò kun de ò lɛ́tɛ gbɛ̃ kũ ò yã vãni kpàkũsũńyĩnɔa. Gbɛ̃ke dí fɔ̃ à ń furo, zaakũ buri pãndenɔ tɛn vĩna kɛńnɛ ń pínki.

³ Bùsu gbãnadenɔ, kína ìbanɔ kũ kínɛnɔ kũ a zĩkɛrinɔ ń pínki zɛ̀ Yudanɔ kpɛ, kũ òtɛn vĩna kɛ Mɔdekainɛ yãi.

⁴ Mɔdekai bɛ̀ɛrɛ vĩ kínabɛa, akũ a tɔ́ dà bùsu sĩnda pínkila, zaakũ a gbãna tɛn karamɛ.

⁵ Yudanɔ ń ibɛrɛnɔ dɛ̀dɛ kũ fɛ̃nɛdao ò láka kũńwo ń pínki ò ń pɔyeinaa kɛ̀ ń zãngurii pìnɔa.

⁶ Ò gɔ̃gbɛ̃nɔ dɛ̀dɛ Susa wɛ́ran gbɛ̃nɔn wàa pla kpɛ́ basɔɔro.

⁷ Ò Pasandata kũ Dalafɔ̃o kũ Asapatao

⁸ kũ Poratao kũ Adaliao kũ Aridatao

⁹ kũ Pamasatao kũ Arisaio kũ Aridaio kũ Vaizatao dɛ̀dɛ dɔ.

¹⁰ Gbɛ̃ pìnɔ bi Amɛdata nɛ́ Amana, Yudanɔ zãnguri nɛ́gɔ̃gbɛ̃ gbɛ̃nɔn kurinɔmɛ. Bee kũ abireo odi ɔ kɛ ń pɔ́kearo.

¹¹ Zĩ dokɔ̃nɔ pìian ò gbɛ̃ kũ ò ń dɛdɛ Susanɔ dasi lɛ́ gbã̀ kínanɛ.

¹² Akũ à pì a nanɔ Ɛsitanɛ: Yudanɔ gɔ̃gbɛ̃nɔ dɛ̀dɛ Susa la gbɛ̃nɔn wàa pla kpɛ́ basɔɔro kũ Amana nɛ́gɔ̃gbɛ̃ gbɛ̃nɔn kurinɔ. Bɔ́n ò kɛ̀ ma bùsu kparanɔ gũn sɛ́ɛ! Yã kpaten ntɛn wɛ́ kɛma dɔɔ? Mani kɛnnɛ. Bɔ́ yãn ntɛn gbɛkamaa? Mani kpámma.

¹³ Ɛsita wèa à pì: Kína, tó à kɛ̀nnɛ mana, ǹ Yuda kũ ò kú Susa lanɔ gba zɛ́ ò yã kũ n dìtɛ ò kɛ gbãra kɛ zia dɔ, ò Amana nɛ́gɔ̃gbɛ̃ gbɛ̃nɔn kurii pìnɔ loko lía.

¹⁴ Kína pì, ò kɛ lɛ. Ò a kpàkpaa kɛ̀ Susa, akũ ò Amana nɛ́ pìnɔ gɛ̀ɛ lòkoloko.

¹⁵ Yuda kũ ò kú Susanɔ kɔ̃ kàkara Ada gɔrɔ gɛ̃ro donsaride zĩ, akũ ò gɔ̃gbɛ̃nɔ dɛ̀dɛ dɔ gbɛ̃nɔn wàa do kpɛ́ basɔɔro. Bee kũ abireo odi ɔ kɛ ń pɔ́kearo.

¹⁶ Yuda kpara kũ ò kú kína búsunɔ gũnnɔ ń pínki kɔ̃ kàkara de ò gí kũ ń zĩdao ò bo ń ibɛrɛnɔ yãn, akũ ò ń zãngurii pìnɔ dɛ̀dɛ gbɛ̃nɔn dúbu basiikɔ̃ sɔɔro sari. Bee kũ abireo odi ɔ kɛ ń pɔ́kearo.

¹⁷ Ò yã pìi kɛ̀ Ada gɔrɔ kuri awɛɛ'aakɔ̃de zĩmɛ, a gɔrɔ gɛ̃ro donsaride zĩn ò kámma bò. Ò gɔrɔ pìi dìtɛ dikpɛ ũ de ò dikpɛ pɔ́ble kɛ ò pɔnna kɛ gɔrɔ pìia.

¹⁸ Yuda kũ ò kú Susanɔ kɔ̃ kàkara a gɔrɔ kuri awɛɛ'aakɔ̃de zĩ kũ a gɔrɔ gɛ̃ro donsaride zĩo, akũ ò kámma bò a gɔrɔ gɛ̃rode zĩ. Ò gɔrɔ pìi dìtɛ dikpɛ ũ de ò dikpɛ pɔ́ble kɛ ò pɔnna kɛ gɔrɔ pìiĩ.

¹⁹ Abire yãin Yuda búbari kũ ò kú lakutu gũnnɔ dì dikpɛ pì kɛ Ada gɔrɔ gɛ̃ro donsaride zĩ ò dikpɛ pɔ́ble kɛ ò pɔnna kɛ òdi pɔ́ble dakɔ̃nɛ.

Purimu dikpɛ ditɛnaa

²⁰ Mɔdekai yã pìnɔ kɛ̃̀ takada gũn, akũ à kpã̀zã Yuda kũ ò kú kína Asueru bùsuu gũnnɔnɛ ń pínki, gbɛ̃ kũ ò kú kãninɔ kũ gbɛ̃ kũ ò kú zã̀nɔ ń pínki.

²¹ À dìtɛńnɛ kũ ògɔ̃ dikpɛ pì kɛ wɛ̃̀ kũ wɛ̃̀ɛo Ada gɔrɔ gɛ̃ro donsaride zĩ kũ a gɔrɔ gɛ̃rode zĩo.

²² Gɔrɔ pìnɔmɛ Yudanɔ bona ń ibɛrɛnɔ ɔĩ dikpɛ ũ. Mɔ pìi gũn ń pɔsira lìtɛ pɔnna ũ, ń wɛ̃ndakɛnaa lìtɛ dikpɛkɛna ũ. Ògɔ̃ dikpɛ pì kɛ gɔrɔ pìnɔ zĩ, ògɔ̃ dikpɛ pɔ́ble kɛ ògɔ̃ pɔnna kɛ, ògɔ̃ pɔ́ble dakɔ̃nɛ, ògɔ̃ gba da takasidenɔnɛ.

²³ Yudanɔ zɛ̀ kũ yã kũ Mɔdekai kɛ̃̀ńnɛo, akũ dikpɛ kũ ò kɛ̀ pìi gɔ̃̀ńnɛ futɛokarayã ũ.

²⁴ Amɛdata nɛ́ Amana, Agaga buri Yudanɔ pínki zãnguri yã vãni kpàkũsũńyĩ kũ à ń dɛdɛ, akũ à gbɛ̀ kũ òdi pi purimu zù à a gu gwà de à le à ń fu à ń dɛdɛ.

²⁵ Ama kũ kína yã pìi mà kpãni, à yã dìtɛ takada gũn, de yã vãni kũ à a lɛ́ kpàkũsũ Yudanɔii pì ɛra a musu. Akũ ò a lòko lía kũ a nɛ́gɔ̃gbɛ̃nɔ lɛɛlɛ.

²⁶ A yã mɛ́ à tò òdi gɔrɔ pìnɔ sísi Purimu, zaakũ gbɛ̀ kũ à zù à a gu gwà tɔ́n gwe. Yã kũ Mɔdekai kɛ̃̀ takada pìi gũn kũ yã kũ à ń lénɔ yãin

²⁷ ò sì kũ ò dikpɛ kɛ gɔrɔ pla pìnɔ gũn wɛ̃̀ kũ wɛ̃̀ɛo. Ò pì mɔ́kɔ̃nɔ kũ ń nɛ́nɔ kũ gbɛ̃ kũ ò nàḿmanɔ ni gí dikpɛ pì kɛiro, ògɔ̃ kɛ a gɔrɔa lákũ ò kɛ̃̀ takadan nà.

²⁸ Wɛ̃̀ kũ wɛ̃̀ɛo gɔrɔ pìnɔ yã gɔ̃ dɔńgu, ògɔ̃ a dikpɛ kɛ ɔn kũ ɔnnwo wɛ̃tɛ kũ wɛ̃tɛo bùsu kũ bùsuuo, de Purimu dikpɛ pì sún láka Yudanɔ kĩnaaro yãi, a kɛgɔrɔ sún mì dɛ ń burinɔaro.

²⁹ Kína nanɔ Ɛsita, Abihaili nɛ́ takada plade kɛ̃̀ kũ a ikooo pínki Purimu yã musu, à gbãna kpào takada kũ Yuda buri Mɔdekai kɛ̃̀a.

³⁰ Mɔdekai takada pìi kpã̀zã Yuda kũ ò kú kína Asueru bùsu mɛ̀n basuddo awɛɛsuppla gũnnɔnɛ. À kunna aafia kũ laakarikpatɛnaao yã òńnɛ,

³¹ akũ à Purimu dikpɛ pìi dìtɛ a gɔrɔa, lákũ àpii kũ kína nanɔ Ɛsitao dìtɛńnɛ nà, lákũ mɔ́kɔ̃nɔ sɔ̃ ò sì ò kɛ nà kũ ń burinɔ ń kpɛ kũ lɛ́yĩnaao kũ ɔ́ɔdɔo.

³² Yã kũ Ɛsita dìtɛ pì gbãna kpà Purimu doka pìnɔa, akũ ò kɛ̃̀ takadan.

« Previous