Online Bible

ƐSITA 2 - Bisã Bible 2005

Ɛsita gɔ̃na kína nanɔ ũ

¹ Yã birenɔ gbɛra kũ kína Asueru pɔ kpàtɛ, yã kũ Vasati kɛ̀nɛ kũ yã kũ à dìtɛ a yã musuo dí sãaguro.

² Akũ kína ìbanɔ pìnɛ: Kí, ǹ tó ò nɔkpare mananɔ wɛtɛnnɛ.

³ Ǹ gbɛ̃ zɔ̃kɔ̃nɔ ditɛ n bùsunɔ gũn pínki ò nɔkpare mananɔ kakara ò su ò ń ká n nɔgbɛ̃nɔ tɛ́ Susa la. N nɔgbɛ̃nɔ gwàri Egai kũ ò a fɛ̀rɛɛ kɛ̀ ni ń gwa kũ n nɔnɔ, oni ń kɛkɛ kũ nísidɔkɔnanɔ swáswa.

⁴ Nɔgbɛ̃ kũ à kàngu ni gɔ̃ n nanɔ ũ Vasati gɛ̃nɛ ũ. Yã pìi kɛ̀ kínanɛ nna, akũ à zɛ̀o lɛ.

⁵ Yuda ke kú Susa Biliaminu burimɛ, a tɔ́n Mɔdekai, Yairi nɛ́mɛ. Simɛi kũ Kisio kú a dizinɔ tɛ́.

⁶ À kú zĩ̀zɔnɔ tɛ́ kũ Babilɔnu kína Nɛbukanɛza ń kũkũ Yurusalɛmu kũ Yudanɔ kína Yɛkɔniao à tà kũńwo.

⁷ Àtɛni a disɛ̃ nɛ́ Adasa kũ òdi pinɛ dɔ Ɛsita gwa, zaakũ a de kũ a dao kunlo. Nɔkpare pì kakana mana akũsɔ̃ à mana. Kũ a de kũ a dao gà, Mɔdekai a sɛ̀ a nɛ́ ũ.

⁸ Kũ ò yã kũ kína dìtɛ pìi mà, akũ ò gɛ̀ɛ kũ nɔkparenɔ dasidasi Susa ò ń ná Egainɛ a ɔĩ. Akũ ò Ɛsita sɛ̀ ò gɛ̀ɛ kãao kínabɛa kína nɔgbɛ̃nɔ gwàrii pìinɛ.

⁹ Nɔkpare pìi kɛ̀nɛ mana, akũ à gbɛ̃kɛ kɛ̀nɛ à pì ò a kɛkɛ kũ nísidɔkɔnanɔ swáswa gɔ̃̀nɔ, ò pɔ́ble mana kpáa. À kínabɛa nɔkpare kũ a sɛ̀ gbɛ̃nɔn supplanɔ kpàa, akũ à kpɛ́ mana kpàa kína nɔgbɛ̃nɔ bɛa.

¹⁰ Ɛsita dí a buri ke a bɛ bùsu o gbɛ̃kenɛro, zaakũ Mɔdekai pìnɛ àsun tó gbɛ̃ke dɔ̃ro.

¹¹ Lákũ gu dìgɔ̃ dɔ nà Mɔdekai dìgɔ̃ kína nɔgbɛ̃nɔ bɛ gãnulɛ zɛ́ sɔ, de à le àgɔ̃ Ɛsita kunna dɔ̃ kũ yã kũ àtɛni a leo.

¹² Ari nɔkparenɔ zɛ́ e ògɔ̃ gɛ́ i kũ kína Asueruo, séto ò yã kũ ò dìtɛńnɛ kɛ gĩa ari mɔ kuri awɛɛpla. Òdigɔ̃ nísi kũ ò kɛ̀ kũ lí'ɔ gbĩ nnao dɔkɔḿma ari mɔ suddo, akũ òdigɔ̃ ń kɛkɛ kũ nísi gbĩ nnanɔ kũ nɔgbɛ̃ mɛ̀kɛkɛbɔnɔ ari mɔ suddo.

¹³ Nɔkpare kũ kína pì ina kàa, kína nɔnɔ bɛ pɔ́ kũ à gbɛ̀ka pínki òdi kpáa à gɛ́omɛ.

¹⁴ Àdi gɛ́ ɔkɔsi à su kína nɔnɔ bɛa kɔnkɔ gwàri kũ òdi pinɛ Sasagaza kũ ò a fɛ̀rɛɛ kɛ̀ fárandi. Àkũ mɛ́ àdi ɔ lika kína nɔ yìgisaride pìnɔi. Àdi le à ɛra à gɛ́ kína kĩnaa doro, séto a yã kà kína pìn à a sìsi dɔ baasiro.

¹⁵ Kũ inaa kà Abihaili nɛ́ Ɛsita kũ a disɛ̃ Mɔdekai a sɛ̀ nɛ́ ũ pìia, adi pɔ́ke gbɛkaro, séde pɔ́ kũ kína nɔgbɛ̃nɔ gwàri Egai pìi ònɛ baasiro. Ɛsita yã kà gbɛ̃ kũ ò a ènɔgu ń pínki.

¹⁶ Kína kíblena wɛ̃̀ supplade gũn ò gɛ̀ɛ kãao a bɛa mɔ kuride Tɛbɛ gũn.

¹⁷ Kína ye Ɛsitai de a nɔ kparanɔla ń pínki. A yã kàagu, à kɛ̀nɛ mana de nɔkpare kparanɔla ń pínki, akũ à kína nanɔ fùraa kùnɛ à a dìtɛ a nɔ Vasati gɛ̃nɛ ũ.

¹⁸ Akũ kína pì dikpɛ pɔ́ble kàkara gbãnadenɔnɛ kũ a ìbanɔ Ɛsita sɛna yã musu. À dìtɛ kũ ò dikpɛ zɔ̃kɔ̃ kɛ, akũ ò a kpàkpaa kɛ̀ bùsu kũ bùsuuo, akũ à gba dà gbɛ̃nɔnɛ à gɛ̃̀ ɔla.

Mɔdekai kũ Amanao

¹⁹ Nɔkparenɔ kakarana gɛ̃̀n pladen Mɔdekai vutɛna kínabɛ gãnu gũn.

²⁰ Ɛsita dí a bɛ bùsu ke a buriyã o gbɛ̃ke màro lákũ Mɔdekai ònɛ nà. À tɛ̀ Mɔdekai yãi lákũ àdigɔ̃ kɛ nà zaa gɔrɔ kũ àtɛni a gwa.

²¹ Kũ Mɔdekai vutɛna kínabɛ gãnu gũn lɛ, kína Asueru dogari zɛ́dãkpãri gbɛ̃nɔn planɔ pɔ fɛ̃̀ kínai, akũ ò lɛ́ kpàkũsũi ò a dɛ. Ń tɔ́n dí: Bigitana kũ Tɛrɛsio.

²² Kũ Mɔdekai yã pìi mà kpãni, à ò kína nanɔ Ɛsitanɛ, akũ Ɛsita ò kínanɛ kũ Mɔdekai tɔ́o.

²³ Ò yã pìi gwàgwa ò è yãpuramɛ, akũ ò gbɛ̃nɔn pla pìnɔ lòko lía ò gà. Ò yã pìi kɛ̃̀ bùsu gĩayãkɛna takadan kína wára.

« Previous