ƐFESUDENƆ 6 - Bisã Bible 2005

Nɛ́nɔ yã

¹ Ákɔ̃nɔ nɛ́nɔ, Dikiri gũn àgɔ̃ á de kũ á dao yã ma, zaakũ abire mɛ́ à mana.

^2-3 À bɛ̀ɛrɛ lí á de kũ á daonɛ, de àgɔ̃ aafia à gì kɛ andunia gũn. Yã kũ Luda dìtɛ káaku kũ lɛ́sɛnaaon gwe.

⁴ Ákɔ̃nɔ denɔ sɔ̃, àsun á nɛ́nɔ pɔ yakaro. À ń tùtu kɛ à lɛ́ daḿma Yesude nɛ́gwana ũ.

Zɔ̀nɔ yã

⁵ Ákɔ̃nɔ zɔ̀nɔ, àgɔ̃ á andunia dí dikirinɔ yã ma kũ nɛ̀sɛdoo kũ vĩnao kũ lukanaao lákũ Kirisin átɛn kɛnɛɛ bà.

⁶ Àsun zĩ kɛńnɛ ń wɛ́ yãiro. Àgɔ̃ Luda pɔyenyĩna kɛ kũ yãpurao kũ ákɔ̃nɔmɛ Kirisi zɔ̀nɔ ũ yãi.

⁷ Àgɔ̃ zĩ kɛ kũ kokario lákũ Dikirin átɛn kɛnɛɛ bà, adi kɛ bisãsirinlo.

⁸ Àgɔ̃ dɔ̃ kũ Dikiri ni baadi yãmanakɛna fĩna bonɛ, zɔ̀ kesɔ̃ zĩdade.

⁹ Ákɔ̃nɔ dikirinɔ sɔ̃, àgɔ̃ kɛńnɛ lɛ se. À yã pãsĩ ońnɛna tó. Àgɔ̃ dɔ̃ kũ mɔ́kɔ̃nɔ kũ ákɔ̃nɔo pínki, á Dikiri kú musu, àdi yã kɛ gbɛ̃ke wɛ́ yãiro.

Gɔ̃kɛbɔ kũ Luda kpàwánɔ

¹⁰ Yã kũ à gɔ̃̀n dí: Àgɔ̃ gbãna Dikiri gũn kũ a iko gbãna zɔ̃kɔ̃ɔo.

¹¹ À gɔ̃kɛbɔ kũ Luda kpàáwanɔ da pínki, de à le à zɛ gíngin à Ibilisi ɔ̃ndɔ̃ fɔ̃.

¹² Zaakũ adi kɛ bisãsirinɔn ótɛn ɔsi ká kũńworo, sé nini vãni kũ ò kú musunɔ. Ò de andunia díkĩna gusira kíblerinɔ ũ kũ ń mìdenɔ kũ ń ikodenɔ.

¹³ Abire yãi à gɔ̃kɛbɔɔ pìnɔ sɛ́tɛ à da pínki, de à fɔ̃ à zɛ à gí gɔrɔ vãnia, gbasa à gɔ̃ zɛna gíngin a pínki kɛnaa gbɛra.

¹⁴ Àgɔ̃ zɛna gbãna, à yãpura dɔ á pi asa ũ, à yãzɛdekɛ da mɔ̀ uta ũ.

¹⁵ À kɛna nna kũ Ludao baaru nna kpá kyate ũ, de àgɔ̃ kú kũ soruo.

¹⁶ Àgɔ̃ ludanaanikɛna kũna sɛ̃gbako ũ gɔrɔ sĩnda pínki, de à fɔ̃ à Setan kà tɛ́denɔ dɛ pínki.

¹⁷ À surabana sɛ́ à kú mɔ̀ fùra ũ, àgɔ̃ Luda yã kũ à de a Nini fɛ̃nɛda ũ kũna.

¹⁸ Àgɔ̃ adua kɛ gɔrɔ sĩnda pínki, àgɔ̃ Luda kpányĩ gbɛka yã sĩnda pínki gũn kũ a Nini donnɛna arɛo. Àgɔ̃ itɛ̃ kɛ kũ mɛna zɔ̃kɔ̃ɔo, àgɔ̃ adua kɛ Luda gbɛ̃nɔnɛ ń pínki.

¹⁹ À adua kɛmɛnɛ dɔ, de tó matɛn yã o, Luda ma gba lɛ́ mà a baaru nna asiri ońnɛ vĩna sari.

²⁰ Baaru nna pì yãi má de Luda wɛ́de kũ ò dà kpɛ́siran ũ. Àgɔ̃ adua kɛmɛnɛ, de mà baaru nna kpá vĩna sari lákũ à kũ̀ mà kpá nà.

Lɛ́zammanaa

²¹ Ó gbɛ̃ndo yenyĩde Tikiku, Dikiri zĩkɛri náanide ni ma baaru kpáárɛ pínki, de à le àgɔ̃ ma kunna dɔ̃ kũ pɔ́ kũ matɛn kɛo.

²² Ma a zĩ̀áwa de à ó kunna oárɛmɛ, á nɛ̀sɛ le à yĩda kũ.

²³ Ó gbɛ̃nɔ, De Luda kũ Dikiri Yesu Kirisio á gba aafia, à á yena kɔ̃i karaárɛ kũ á ludanaanikɛnaao.

²⁴ Luda gbɛ̃kɛ kɛ gbɛ̃ kũ ò ye ó Dikiri Yesu Kirisii lakanaa sarinɔnɛ ń pínki.