ƐFESUDENƆ 5 - Bisã Bible 2005

Kunna gupuran

¹ Lákũ á de Luda nɛ́ yenyĩdenɔ ũ nà, à a ágba sɛ́.

² Lákũ Kirisi yewái nà à gì a wɛ̃̀ndiii ó yãi sa'obɔ kũ a gbĩ nna Ludanɛ ũ, à tó yekɔ̃i doárɛ arɛ lɛ se.

³ Lákũ á de Luda gbɛ̃nɔ ũ nà, adi kũ ò pãpãkɛna ke dà vãni buri sĩnda pínki ke wãkũ yã ma á tɛ́ sero.

⁴ Wé'isariyã'ona kũ yã dɔ̀rɔ sari onaao kũ fàai bɛ̃̀nɛ bonaao mana kãáoro dɔ, sé sáabukɛna yã.

⁵ Àgɔ̃ dɔ̃ sãnsãn kũ pãpãkɛri ke kesɔ̃ dàvãnide ke kesɔ̃ wãkũde ke ni kpata kũ à bò Luda kĩnaa ble lɛɛlɛ kũ Kirisioro. Pɔ́ kũ gbɛ̃ dì a wãkũ kɛ gɔ̃̀ a dikiri ũmɛ.

⁶ Àsun tó gbɛ̃ke á sãtɛ kũ yã pã korioro. Yã bire takanɔ mɛ́ ani tó Luda pɔfɛ̃ kipa a yãdarisarinɔa.

⁷ Àsun tó á bàka gɔ̃ kú kũńworo.

⁸ Á kú gusiran yã, tera sà Dikiri gũn á kú gupuran. Àgɔ̃ kun gupura gbɛ̃nɔ ũ,

⁹ zaakũ gupura dì mana buri sĩnda pínki ińnɛ kũ yãzɛdeo kũ yãpurao.

¹⁰ À yã kũ àdi ká Dikirigu dada.

¹¹ Á bàka súngɔ̃ kú kũ gusira yãkɛna kũ à karana vĩrooro. À yã birenɔ bobo gupurai.

¹² Bee yã kũ gbɛ̃ pìnɔ dì kɛ asiri gũn ona bi wé'iyãmɛ.

¹³ Tó ò bò kũ yão gupurai, òdi a súsu dɔ̃,

¹⁴ zaakũ gupura dì tó ò pɔ́ sĩnda pínki e. Abire yãi òdi pi: I'ori ǹ vu ǹ futɛ bona gan, Kirisi ni gu punnɛ.

¹⁵ Àgɔ̃ á táa'ona dɔ̃ manamana. Àsungɔ̃ de yɔ̃nkɔnɔ ũro, sé ɔ̃ndɔ̃rinɔ.

¹⁶ Àgɔ̃ yã kũ Luda a zɛ́ bòárɛ kɛ, zaakũ gɔrɔ díkĩnanɔn vãni.

¹⁷ Abire yãi àsungɔ̃ de yɔ̃nkɔnɔ ũro, àgɔ̃ dɔ̃ lákũ Dikiri pɔyenyĩna de nà.

¹⁸ Àsungɔ̃ kú kũ wɛ̃dɛkɛnaaoro, àdi pãpã zĩḿmamɛ, ama à tó Luda Nini gɔ̃ zĩ kɛ á guu papana,

¹⁹ gbasa à fàai bo kũ kɔ̃o kũ zaburao kũ Luda tɔ́kpanaao kũ lɛ̀ kũ Luda Nini dì daárɛo. À lɛ̀ sí, à Dikiri tɔ́ kpá á swɛ̃̀ɛ gũn,

²⁰ àgɔ̃ De Luda sáabu kɛ gɔrɔ sĩnda pínki yã sĩnda pínki gũn kũ ó Dikiri Yesu Kirisi tɔ́o.

²¹ À mì natɛkɔ̃nɛ Kirisi vĩna kũ á vĩ yãi.

Gɔ̃gbɛ̃ kunna kũ a nanɔo

²² Ákɔ̃nɔ nɔgbɛ̃nɔ, á baadi gɔ̃ mì natɛ a zãnɛ lákũ Dikirin átɛn kɛnɛ bà.

²³ Zaakũ gɔ̃gbɛ̃mɛ nɔgbɛ̃ mì ũ, lákũ Kirisi de sɔsi gbɛ̃ kũ ò de a mɛ̀ ũnɔ mì ũ nà kũ ń Surabariio.

²⁴ Lákũ sɔsi gbɛ̃nɔ dì mì natɛ Kirisinɛ nà, lɛmɛ se nɔgbɛ̃nɔ gɔ̃ mì natɛ ń zãnɔnɛ lɛ yã sĩnda pínki gũn.

²⁵ Ákɔ̃nɔ gɔ̃gbɛ̃nɔ sɔ̃, á baadi gɔ̃ ye a nanɔi lákũ Kirisi ye sɔsi gbɛ̃nɔi nà, à gì a wɛ̃̀ndiii a yãi.

²⁶ À gbã̀ bònɛ kũ ío a yã gãi de àgɔ̃ de a pɔ́ ũ,

²⁷ de à ń kpan'arɛ kɛ kũ gakurio sãa sari yitorokũnaa sari mamberu sari gbãsĩ sari taari sari.

²⁸ Lɛn à kũ̀ gɔ̃gbɛ̃ sĩnda pínki gɔ̃ ye a nanɔi lɛ lán a zĩda mɛ̀ɛ bà. Gbɛ̃ kũ à ye a nanɔi ye a zĩdaimɛ.

²⁹ Gbɛ̃ke dì gí a zĩda mɛ̀ɛiro. Àdi pɔ́ble kpáa, àdi laakari dɔa lákũ Kirisi dì kɛ sɔsi gbɛ̃nɔnɛ nà,

³⁰ kũ ó de a mɛ̀gunɔ ũ yãi.

³¹ Abire yãi gɔ̃gbɛ̃ ni bo a de kũ a dao bɛa, oni nakɔ̃a kũ a nanɔo, ń gbɛ̃nɔn pla ni gɔ̃ mɛ̀ do ũ.

³² Asiri zɔ̃kɔ̃ kú yã pìi gũn, ma è à de lɛ Kirisi dagura kũ sɔsi gbɛ̃ɔo.

³³ Bee kũ abireo à de á yã ũ se dɔ. Á baadi gɔ̃ ye a nanɔi lán a zĩda bà. Nɔgbɛ̃ sɔ̃, à a zã yã da.