ƐFESUDENƆ 4 - Bisã Bible 2005

Mɛ̀dokɔ̃nɔkɛnaa

¹ Makũ kũ má de purusuna ũ Dikirinɛ, ma wɛ́ kɛ̀áwa, á kunna gɔ̃ de lákũ Luda á sísi àgɔ̃ de nà.

² À kɔ̃ fɔ̃, àgɔ̃ yekɔ̃i zĩdabusanaa gũn kũ nɛ̀sɛyĩdao kũ mɛnao.

³ À wɛ́ tã àgɔ̃ lɛ́dokɔ̃nɔ kũ à bò Luda Nini kĩnaa vĩ bà kũ àdi á dɔkɔ̃a ũ.

⁴ Mɛ̀ mɛ̀n domɛ, akũsɔ̃ Nini pìi mɛ̀n domɛ. Lɛn tãmaa kũ Luda á sísiaa mɛ̀n do lɛ se.

⁵ Dikiri mɛ̀n do, akũsɔ̃ donyĩzɛ mɛ̀n do kũ da'itɛkɛna mɛ̀n doo.

⁶ Luda mɛ̀n domɛ ó pínki De ũ. Àkũ mɛ́ à iko vĩ ó baadia, àdigɔ̃ zĩ kɛ ó gbɛ̃ sĩnda pínki gũn, à kú kũ ó gbɛ̃ sĩnda pínkio.

⁷ Kirisi gbɛ̃kɛ kɛ̀ ó baadinɛ, lákũ à gba dàwɛrɛ nà lɛ́n.

⁸ Abire yãi à kɛ̃na Luda yãn ò pì: Kũ à fùtɛ à tà musu, à dò zĩ̀zɔnɔnɛ arɛ, à gba dà gbɛ̃nɔnɛ.

⁹ A futɛ à tana musu bire de deramɛɛ? Abire pì à kìpa ari zĩtɛ gɛ̃i gĩa.

¹⁰ Gbɛ̃ kũ à kìpaa pìimɛ gbɛ̃ kũ à fùtɛ à tà ludambɛ musumusu ũ, de à gu sĩnda pínki pa.

¹¹ Àkũ mɛ́ à gbɛ̃kenɔ gbà zɛ́ ògɔ̃ de zĩ̀rinɔ ũ, gbɛ̃kenɔ annabinɔ, gbɛ̃kenɔ baarunnakparinɔ, gbɛ̃kenɔ pasutonɔ ke yãdannɛrinɔ,

¹² de Luda gbɛ̃nɔ gɔ̃ kú a zĩ soru gũn, de Kirisi mɛ̀ gbãna kũ,

¹³ ari ó pínki ògɔ̃ gɛ́ ká Luda Nɛ́ náani dokɔ̃nɔ kɛnaaa a dɔ̃na dokɔ̃nɔ gũn, de ò gɔ̃ gbɛ̃ papananɔ ũ Kirisi kũ pɔ́ sĩnda pínki pɛ̀kɛrɛa zɔ̃kɔ̃ lɛ́n.

¹⁴ Tó lɛmɛ ónigɔ̃ de nɛ́ fíti kũ òdi ɔ̃ndɔ̃ kũ manafikio kɛńnɛ ò ń sãtɛnɔ ũ doro, kũ yã dufu dannɛna dì ń sɛ́ lán ĩa ke ísɔ̃ bà.

¹⁵ Oi, óni yãpura o kũ yenyĩo, ò gbã yã sĩnda pínki musu Kirisi kũ à de a mì ũ gũn.

¹⁶ A gũnn mɛ̀gu sĩnda pínki dì kɔ̃ kũn ò nakɔ̃a kũ tĩnɔ gbãnao, akũ mɛ̀gunɔ dì zĩ kɛ a zɛ́a, mɛ̀ɛ dìgɔ̃ gbã àgɔ̃ kara kũ yenyĩo.

Kunna zĩ kũ kunna dufuo

¹⁷ Abire yãi matɛn yã oárɛ kũ Dikiri tɔ́o, matɛni á gbao laakarii. Àsungɔ̃ kun lán kifiri kũ ń nɛ̀sɛfutakɛ dońnɛ arɛnɔ bàro.

¹⁸ Ń laasun ń kɛ́ yɔ̃nkɔ, ò zã̀ kũ wɛ̃̀ndi kũ Luda dì kpáḿmao, kũ ń wɛ́ sira, akũsɔ̃ ń sã gbãna yãi.

¹⁹ Ò nɛ̀sɛ vĩro, ò ń zĩda kpà wé'isariyãa, ò dà vãni buri sĩnda pínki kɛna ni vĩ.

²⁰ Ákɔ̃nɔ sɔ̃, ádi Kirisi yã dada lɛro.

²¹ Yesu gũn a a yã mà, a yãpura kũ à vĩ dàda.

²² Ò òárɛ à ɔ gbarɛ á dà zĩ kũ à doárɛ arɛi, kũ à yàka á pɔ́nidɛna vãninɔ yãi.

²³ Ò òárɛ à á nɛ̀sɛ litɛ á laasun gɔ̃ dufu,

²⁴ áni dà dufu kũ Luda kɛ̀ lán a pɔ́ bà sɛ́, á kunna nigɔ̃ adona kunna yãpurade ũ yãzɛdekɛ gũn.

²⁵ Abire yãi à ɔ gbarɛ manafiki yãi, á baadi gɔ̃ yãpura o a gbɛ̃dakenɛ, zaakũ mɛ̀dokɔ̃nɔdenɔmɛ ó ũ.

²⁶ Tó á pɔ fɛ̃̀, àsun durunna kɛro. Àsun tó ifãntɛ̃ gɛ̃ kpɛ́n àgɔ̃ kpɛ́ pɔfɛ̃naro,

²⁷ de àsun Ibilisi gba zɛ́ro yãi.

²⁸ Gbɛ̃ kũ àdi kpãni o yã à kpãni tó. À wɛ́ tã à zĩ mana kɛ kũ a ɔo, de à pɔ́ le à bo takasidenɔnɛ.

²⁹ Àsun tó yã vãni ke bo á lɛ́nlo, séde a zɛ́de kũ ani gbɛ̃ kara, à kɛ àre ũ gbɛ̃ kũ òtɛn manɔnɛ.

³⁰ Àsun Luda Nini kũ à kú adona da pɔsiranlo. À de sèeda kũ Luda kɛ̀áwa ari á bona gɔrɔ zĩ ũ.

³¹ Àsun kɛ ĩni kũ gbɛ̃keoro. À pɔfɛ̃ tó kũ pɛ̃tɛ̃o kũ patana gbãnao kũ gbɛ̃sɔ̃sɔ̃naao kũ pãsĩkɛna buri sĩnda pínkio.

³² Àgɔ̃ gbɛ̃kɛ kɛ kũ kɔ̃o. Àgɔ̃ kɔ̃ wɛ̃nda gwa. À sùru kɛ kũ kɔ̃o lákũ Luda sùruu kɛ̀ kãáo nà Kirisi gũn.