Online Bible

EBERUNƆ 8 - Bisã Bible 2005

Yesumɛ ó Sa'oriki ũ

¹ Yã kũ ótɛn o mìin dí: Ó sa'oriki bire taka vĩ vutɛna kíblegbaaa musu Luda zɔ̃kɔ̃de ɔplai.

² Àdi zĩ kɛ Ludakukia, bizakuta yãpura kũ Dikiri dɔ̀n, adi kɛ pɔ́ kũ bisãsirinɔ dɔ̀nlo.

³ Zaakũ suna kũ gbanɔ kũ sa'onaao yãin òdi sa'oriki sĩnda pínki kái, à mana àpii gɔ̃ pɔ́ vĩ à kpá se.

⁴ Tó à kú andunia gũn, anigɔ̃ de sa'ori ũro, zaakũ sa'ori kũ òdi su kũ gbanɔ lákũ doka dìtɛ nànɔ kun kɔ̀.

⁵ Zĩ kũ òtɛn kɛ bi pɔ́ kũ à kú musu takamɛ, a ninimɛ. Abire yãi kũ Musa ye à bizakuta dɔ, Luda pìnɛ à laakari kɛ à pɔ́ kũ a a taka mɔ̀nɛ kpi musu kɛ lákũ à de nà pínki.

⁶ Yesu mɛ́ à Luda bàka kunna kũoo yãkɛkɛri ũ. Zaakũ Luda bàka kunna kũooo pì de a bàka kunna kũńwo zĩla, zĩ kũ ò dànɛ de sa'oriki pìnɔ pɔ́la. Luda bàka kunna kũooo pìi lɛ́sɛna de a zĩla dɔ.

⁷ Tó Luda bàka kunna kũńwo zĩ pì papanamɛ yã, de a plade zɛ́ vĩro.

⁸ Kũ Dikiri Isarailanɔ taari lè à pì: A gɔrɔ tɛn su kũ mani ma bàka kunna kũ Isarailanɔ kũ Yudanɔ dufu kɛ.

⁹ Anigɔ̃ de lán ma bàka kunna kũ ń dizinɔo gɔrɔ kũ ma ń kũ ń ɔa ma ń bɔ́tɛ Misila bàro. Zaakũ odi zɛ kũ ma bàka kunna kũńwoooro, akũ ma ń tón.

¹⁰ Ma bàka kunna kũ Isarailanɔ gɔrɔ birenɔ gbɛra yãn dí: Mani ma dokayãnɔ dańnɛ ń nɛ̀sɛn, mani kɛ̃ ń swɛ̃̀ɛa. Manigɔ̃ de ń Luda ũ, onigɔ̃ de ma gbɛ̃nɔ ũ.

¹¹ Ń gbɛ̃ke ni yã dada a dakenɛro, ń gbɛ̃ke ni ma dɔ̃na da a gbɛ̃nɛro, zaakũ ń pínki nigɔ̃ ma dɔ̃mɛ, nɛ́ fíti gbɛ̃ zɔ̃kɔ̃ ń pínki.

¹² Mani sùru kɛ kũńwo kũ ń taarinɔ, mani ń durunnanɔ yã da doro.

¹³ Kũ Luda bàka kunna kũńwo dufu pì yã ò, à a káakupɔ zĩ bò. Pɔ́ kũ à zĩ kũ̀ à bùsa, a kpana gui zã̀ro.