EBERUNƆ 2 - Bisã Bible 2005

Surabana zɔ̃kɔ̃ɔ

¹ Abire yãi ò yãpura kũ o mà kũ ɔplapla gíngin, de òsun kɛ̃ zɛ́aro yãi.

² Zaakũ yã kũ Luda dìtɛ malaikanɔ gãi bi tilasimɛ, akũ ò fĩnaa bò gbɛ̃ kũ ò gì mai ò pã̀nɛnɔnɛ a zɛ́a,

³ tó ódi surabana zɔ̃kɔ̃ɔ pì yã da sɔ̃ro, óni bo yá? Surabana yã pìi bò Dikiri kĩnaamɛ, akũ gbɛ̃ kũ ò mànɔ yãpura kpàawɛrɛ.

⁴ Luda ɛ̀ra à yãpura kpà yã pìia kũ sèedanɔ kũ yãbonsarɛnɔ kũ daboyã dasi kɛnanɔ kũ a Nini gba kũ à kpàatɛtɛńnɛnɔ a pɔyenyĩnaaa.

Yesu gɔ̃na bisãsiri ũ lán ó bà

⁵ Adi kɛ malaikanɔn Luda andunia zia kũ ótɛni a yã o nàńnɛ ń ɔĩro.

⁶ À kú Luda yãn gukea ò pì: Bɔ́n bisãsiri ũ kũ a yã dìgɔ̃ dɔnguu? Bɔ́n a ũ kũ ndì laakari dɔaa?

⁷ N a kɛ̀ kĩana malaikanɔi féte, n a kà kpatan kũ gakurio kũ bɛ̀ɛrɛɛo,

⁸ n tò pɔ́ sĩnda pínki mìi nàtɛnɛ. Kũ Luda tò pɔ́ sĩnda pínki mìi nàtɛnɛ, adi a ke tó mìnatɛnanɛɛ sariro. Tera lán dí bà, ódi e kũ pɔ́ sĩnda pínki mìi nàtɛnɛ gĩaro,

⁹ ama o è kũ Yesun ò tɛ́a. Luda a kĩ̀a malaikanɔi ari gɔrɔ pla, de Luda gbɛ̃kɛ gũn à ga gbɛ̃ sĩnda pínki gɛ̃nɛ ũ, akũ à a kà kpatan kũ gakurio kũ bɛ̀ɛrɛɛo ga wari kũ à kɛ̀ yãi.

¹⁰ Lákũ pɔ́ sĩnda pínki bò Luda kĩnaa nà, akũsɔ̃ pɔ́ sĩnda pínki de a pɔ́ ũ, kũ à ye à gɛ̃ kũ gbɛ̃nɔ dasi a gakuri gũn a nɛ́nɔ ũ, à kɔ̃ sì kãao à gbɛ̃ kũ à surabana zɛ́ bóńnɛ papa warikɛnaa gũn.

¹¹ Gbɛ̃ kũ ò gɔ̃̀ Luda gbɛ̃nɔ ũ kũ gbɛ̃ kũ àdi ń kɛ Luda gbɛ̃nɔ ũo, ń pínki de dokɔ̃nɔmɛ. Abire yãi ń sísina a gbɛ̃nɔ ũ dì a wé'i kũro.

¹² À pì: Mani n tɔ́ bo ma gbɛ̃nɔ tɛ́, mani n sáabu kpá kɔ̃kakaranaa gũn.

¹³ À pì dɔ: Mani a náani kɛ. À pì dɔ: Makũmɛ la kũ nɛ́ kũ Luda kpàmanɔ.

¹⁴ Zaakũ nɛ́ pìnɔ bi bisãsirinɔmɛ, akãa se à gɔ̃̀ bisãsiri ũ lán ń bà, de à ga à Ibilisi kũ àdi su kũ gao kakatɛ,

¹⁵ à gbɛ̃ kũ òtɛn vĩna kɛ ganɛ òtɛn zɔ̀ ble ari ń wɛ̃̀ndi lɛ́nnɔ bo.

¹⁶ Yãpura gũn malaikanɔn àtɛn ɔ daḿmaro, Ibrahĩ burinɔmɛ.

¹⁷ À kɔ̃ sìo à gɔ̃ lán a dakũnanɔ bà yã sĩnda pínki gũn, de à gɔ̃ Sa'oriki sùrude náanide ũ Luda zĩ gũn, gbɛ̃nɔ durunna kútɛkɛbɔ ũ dɔ.

¹⁸ Lákũ à wari kɛ̀ à yɔ̃ogwanaa fɔ̃̀ nà, ani fɔ̃ à gbɛ̃ kũ òtɛni ń yɔ̃ ò ń gwanɔ faaba kɛ.