Online Bible

BONAA 9 - Bisã Bible 2005

Pɔ́kãdenɔ gaganaa

¹ Dikiri pì Musanɛ: Ǹ gɛ́ ǹ Firi'auna le ǹ onɛ Dikiri Eberunɔ Luda pì, à ma gbɛ̃nɔ gbarɛ ò gɛ́ donyĩ kɛmɛnɛ.

² Tó à gì ń gbarɛi, tó à kpɛ́ ń kũna ari tera,

³ mani ɔ tɔ̃ a pɔ́kãdenɔa a buran. Mani gagagyã pãsĩ ká a sɔ̃nɔn kũ a zaakinɔ kũ a lakuminɔ kũ a zùnɔ kũ a sãnɔ kũ a blènɔ.

⁴ Mani Isaraila pɔ́kãdenɔ dɔ̃kɔ̃nɛ kũ Misilanɔ pɔ́nɔo. Isarailanɔ pɔ́kãdenɔ ke ni garo.

⁵ Makũ Dikiri ma a gɔrɔ dìtɛ. Zian mani abire kɛ bùsun la.

⁶ Kũ gu dɔ̀, akũ Dikiri kɛ̀ lɛ. Misilanɔ pɔ́kãdenɔ gàga pínki, ama Isarailanɔ pɔ́kãdenɔ ke dí garo.

⁷ Firi'auna yã kũ à kɛ̀ pìi gbɛ̀ka, à mà Isarailanɔ pɔ́kãdenɔ ke dí garo, ama a sã kpɛ́ gbãna, à gì gbɛ̃ pìnɔ gbarɛi.

Bɔ̀bũnu kana Misilanɔgu

⁸ Dikiri pì Musanɛ kũ Harunao: À tãmakpɛ túbu dã okũ dodo, Musa fã Firi'auna arɛ.

⁹ Ani da Misila bùsula pínki lán lukutɛ̃ bà, ani kɛ bisãsirinɔnɛ kũ nɔ̀bɔnɔ bɔ̀bũnu ũ gu sĩnda pínkia.

¹⁰ Akũ ò tãmakpɛ túbu sɛ̀tɛ ò gɛ̀ɛo Firi'auna kĩnaa. Kũ Musa túbu pìi fã̀ musu, akũ à kɛ̀ bisãsirinɔnɛ kũ nɔ̀bɔnɔ bɔ̀bũnu ũ.

¹¹ Ɛzɛdenɔ dí fɔ̃ ò gɛ̀ɛ Musa kĩnaaro bɔ̀bũnu pìnɔ yãi, zaakũ à dàńla kũ Misilanɔ ń pínki.

¹² Akũ Dikiri Firi'auna kùu kɛ̀ gbãna, lákũ à ò Musanɛ nà, akũ à gì ń yã mai.

Legũgbɛ manaa

¹³ Dikiri pì Musanɛ: Ǹ futɛ kɔnkɔkɔnkɔ ǹ gɛ́ ǹ Firi'auna le, ǹ onɛ makũ Dikiri Eberunɔ Luda ma pì, à ma gbɛ̃nɔ gbarɛ ò gɛ́ donyĩ kɛmɛnɛ.

¹⁴ Tera sà mani yã pãsĩ pínki daala kũ a ìbanɔ kũ a gbɛ̃nɔ, de àgɔ̃ dɔ̃ kũ andunia gũn pínki gbɛ̃ke de lán ma bàro.

¹⁵ Zaakũ tó ma ɔ tɔ̃̀ḿma ma gagagyã kàńgu yã, de àkũ kũ a gbɛ̃nɔ làka andunia gũn.

¹⁶ Ma a kà kpatan de mà a gbãna mɔnɛ, ò ma tɔ́ kpá andunia gũn pínki.

¹⁷ Lákũ àtɛni a zĩda bi, à gì ma gbɛ̃nɔ gbarɛi ari tera,

¹⁸ zia mandara'i mani tó legũgbɛ pãsĩ ma manamana, legũgbɛ kũ a taka buri dí ma Misila zikiro zaa lákũ ò a kàtɛ nà ari kũ a gbãrao.

¹⁹ Ǹ onɛ à gbɛ̃nɔ zĩ ò a pɔ́kãdenɔ kũ pɔ́ kũ à vĩ buranɔ sɛ́tɛ ò káka kpɛ́n pínki. Bisãsirinɔ kũ pɔ́ kũ ò kú bàainɔ, tó òdi gɛ̃ kũńwo kpɛ́nlo, legũgbɛ ni maḿma oni gagamɛ.

²⁰ Firi'auna ìba kenɔ vĩna kɛ̀ Dikiri yãnɛ, ò ń zĩkɛrinɔ kũ ń pɔ́kãdenɔ kàka kpɛ́n.

²¹ Ama gbɛ̃ kũ odi Dikiri yã daronɔ ń zĩkɛrinɔ kũ ń pɔ́kãdenɔ tò bàai.

²² Akũ Dikiri pì Musanɛ: Ǹ ɔ sɛ́ musu, legũgbɛ ni ma bisãsirinɔ kũ pɔ́kãdenɔ kũ burapɔnɔa Misila bùsu gu sĩnda pínkia.

²³ Kũ Musa a gòo dɔ̀ musu, Dikiri tò legũ tɛn pũtã, àtɛn ma kũ gbɛ̀ɛo, àtɛn pí, akũ sura tɛn kipa zĩtɛ. Dikiri legũgbɛ kà Misilanɔgu.

²⁴ Legũgbɛ tɛn ma, legũ tɛn pí. Legũgbɛ pì pãsĩ. Zaa lákũ Misila bùsu kun nà, legũ dí taka buri dí ma zikiro.

²⁵ Legũgbɛɛ pì pɔ́ kũ ò kú bàai Misila bùsu gũnnɔ ásaru kɛ̀ pínki, bisãsirinɔ kũ pɔ́kãdenɔ kũ burapɔnɔ pínki. À sɛ̃̀ntɛ línɔ ɛ̀'ɛ pínki.

²⁶ Gosɛ̃ bùsu gu kũ Isarailanɔn kunn legũgbɛɛ pì dí kánlo ado.

²⁷ Firi'auna Musa kũ Harunao sìsi à pìńnɛ: Tera sà ma durunna kɛ̀. Dikiri yã mɛ́ à nna, makũ kũ ma gbɛ̃nɔ taaridenɔn ó ũ.

²⁸ À kútɛ kɛnɛ. Legũpũtãna kũ legũgbɛ díkĩnao mɔ̀ lɛ. Mani á gbarɛ sa, mani gíárɛ doro.

²⁹ Musa pìnɛ: Tó ma bo wɛ̃tɛ kpɛ, mani ma ɔnɔ sɛ́ lei gɛna Dikiri kĩnaa, legũpũtãna ni zɛ, legũgbɛ ni láka, de ǹgɔ̃ dɔ̃ kũ zĩtɛ bi Dikiri pɔ́mɛ.

³⁰ Ama má dɔ̃ kũ mɔkɔ̃n kũ n ìbanɔ, átɛn vĩna kɛ Dikiri Ludanɛro ari tera.

³¹ Nagã kũ gbadoo yàka, zaakũ nagã gĩnakɛ à pìa, gbado mure bò.

³² Ése kũ werao dí yakaro, kũ òdi ma kpɛkpɛ yãi.

³³ Musa bò Firi'auna kĩnaa à gɛ̀ɛ wɛ̃tɛ kpɛ, à a ɔnɔ sɛ̀ lei gɛna Dikiri kĩnaa, akũ legũpũtãna kũ legũgbɛɛo zɛ̀, legũ dí ma doro.

³⁴ Kũ Firi'auna è legũ kũ legũgbɛɛo kũ legũpũtãnaao zɛ̀, akũ à kpɛ́ àtɛn durunna kɛ, a sã kpɛ́ gbãna, àkũ kũ a ìbanɔ.

³⁵ A kù kpɛ́ gbãna à gì Isarailanɔ gbarɛi, lákũ Luda dà Musanɛ à ònɛ nà.

« Previous