2 TIMƆTI 2 - Bisã Bible 2005

Kirisi Yesu zĩ̀kari mana

¹ Mɔkɔ̃n sɔ̃ ma nɛ́, ǹgɔ̃ gbãna kũ gbɛ̃kɛ kũ Luda vĩ kũoo Kirisi Yesu gũnwo.

² Yã kũ n mà ma ò pari wára, ǹ na gbɛ̃ náanidenɔnɛ ń ɔĩ, kũ oni fɔ̃ ò dada gbɛ̃ pãndenɔnɛ.

³ Ǹ warikɛna fɔ̃ kũoo Kirisi Yesu zĩ̀kari mana ũ.

⁴ Andunia yã bɔkɔtɛnaa dì do zĩ̀kari kũ à kú zĩ̀lannɛ arɛro, de a yã ká a dikirigu yãi.

⁵ Bàkpakũsũri sɔ̃, tó adi bàa lɛ́ a zɛ́aro, ani zĩ̀blena fùra lero.

⁶ À kũ̀ búbari kũ à zĩ gbãna kɛ̀ a baka sɛ́ káaku.

⁷ Ǹ laasun lɛ́ yã kũ ma òo pìnɔa, zaakũ Dikiri ni n gba ɔ̃ndɔ̃ a pínki gũn.

⁸ Ǹ dɔn kũ Yesu Kirisi bi Dauda burimɛ, akũsɔ̃ à vù bona gan. Baaru nna kũ madì kpán gwe.

⁹ Abire yãin matɛn wari kɛ. Ò mɔ̀ɔ kàma lán dàkɛrii bà, ama Luda yã dí sí mɔ̀ káaro.

¹⁰ Abire yãi madì yã sĩnda pínki fɔ̃ gbɛ̃ kũ Luda ń sɛ́nɔ yãi, de mɔ́kɔ̃nɔ se Luda ń sura ba, ò gakuri kũ àdi lákaro le kunna Kirisi Yesu gũn.

¹¹ Yã díkĩna bi yãpuramɛ: Tó o ga kãao, ónigɔ̃ kú kãao.

¹² Tó o mɛna fɔ̃̀, óni kí ble kãao. Tó o ledi kpài, ani ledi kpáwái se.

¹³ Tó ó náani vĩro, à kpɛ́ náani vĩ, zaakũ ani we à ledi kpá a zĩdairo.

Dikiri zĩkɛri mana kũ lɛ́kpakɔ̃anaaoro

¹⁴ Ǹ yã pìnɔ dɔ n gbɛ̃nɔgu, ǹ nańnɛ Ludai òsun lɛ́kpakɔ̃ana kɛ yãnɔ musuro. À àre vĩro, àdi gbɛ̃ kũ òtɛn manɔ yakamɛ.

¹⁵ Ǹ kokari kɛ de Luda n sáabu kpá, zĩkɛri kũ àdi yã yãpura wɛ̃kɔ̃ańnɛ súsu ũ, kũ wé'i dì a kũ a zĩ yã musuro.

¹⁶ Ǹ pã yãbɔtɛna pã kũ àdi kɔ̃ sɛ́ kũ Luda yãoronɛ. Àdi gbɛ̃nɔ ludayãdanasari karańnɛmɛ,

¹⁷ akũ yã kũ òdi dańnɛ dì dańla lán fɔ̃nna bà. Imɛnɛu kũ Filɛtuo kú ń tɛ́.

¹⁸ Ò kɛ̃̀ yãpuraa, òdi pi ò fùtɛ bona gan kɔ̀, òdi gbɛ̃kenɔ ludanaanikɛnaa yakańnɛ.

¹⁹ Bee kũ abireo ɛ̃ kũ Luda kpàtɛ zɛna gbãna, ò yã díkĩna kɛ̃̀a: Dikiri gbɛ̃ kũ ò de a pɔ́ ũnɔ dɔ̃. Gbɛ̃ kũ àdi Dikiri sísi mì kɛ̃ yã vãnia.

²⁰ Ɔn da dìgɔ̃ pɔ́nɔ vĩ dasi. Ò a kenɔ kɛ̀ kũ wuraao kũ andurufuuo yãtikisikɛbɔ ũ, akũsɔ̃ ò a kenɔ kɛ̀ kũ lío kũ gbĩ̀io yãfitikɛbɔ ũ.

²¹ Tó gbɛ̃ ɔ bɔ̀tɛ yã bɛ̀ɛrɛsari gũn, ani gɔ̃ yãtikisikɛbɔ ũ, anigɔ̃ anfãni vĩ Dikirinɛ, anigɔ̃ kú adona yãmanakɛna pínki soru gũn.

²² Ǹ bàa sí kɛfɛnna pɔ́nidɛnanɔnɛ, ǹ tó manakɛna kũ ludanaanikɛnaao kũ yenyĩo kũ kunna kũ kɔ̃o nnao donnɛ arɛ lɛɛlɛ kũ gbɛ̃ kũ òdi Dikiri sísi kũ nɛ̀sɛpuraonɔ.

²³ Ǹ ɔ bɔtɛ mìsari lɛ́kpakɔ̃ana kũ à dɔ̃na ke vĩron. Ń dɔ̃ kũ àdi fìti da.

²⁴ À mana Dikiri zɔ̀bleri gɔ̃ fìti vĩro. A nɛ̀sɛ gɔ̃ do kũ gbɛ̃ sĩnda pínkio, yãdannɛri mana kũ àdi gbɛ̃ fɔ̃ ũ,

²⁵ à gbɛ̃ kũ òdi a yã síronɔ gba laakari busɛbusɛ. Òdigɔ̃ dɔ̃ro ke Luda ni fɔ̃ à ń gba zɛ́ ò nɛ̀sɛ litɛ ò yãpura sí,

²⁶ ò bo Ibilisi kũ à ń kũ à ń dá a pɔyenyĩnaa gũn bàn, ń laakari suḿma.