2 TƐSALONIKADENƆ 3 - Bisã Bible 2005

À adua kɛwɛrɛ

¹ Yã kũ à gɔ̃̀n dí, ó gbɛ̃nɔ, à adua kɛwɛrɛ, de Dikiri yã le à dagula likalika, àgɔ̃ bɛ̀ɛrɛ vĩńnɛ lákũ à vĩ á kĩnaa nà.

² À adua kɛwɛrɛ de à ó bo gbɛ̃ vãni dɔ̀rɔsaridenɔ ɔĩ, zaakũ adi kɛ gbɛ̃ sĩnda pínki mɛ́ à Luda yã sìro.

³ Dikiri náani vĩ, ani á gba gbãna, ani á sí a vãnia.

⁴ O á náani kɛ̀ Dikiri gũn kũ átɛn yã kũ o òárɛnɔ kɛ, akũsɔ̃ ánigɔ̃ kɛ.

⁵ Dikiri tó à Luda yenyĩ kũ Kirisi mɛnao gbázɛ dɔ̃ á swɛ̃̀n.

Òsun ma'ã kɛro

⁶ Ó gbɛ̃nɔ, o naárɛ Dikiri Yesu Kirisii, à kɛ̃ ó gbɛ̃ kũ ò ma'ã vĩnɔa, kũ òdi zĩ kɛ kũ yã kũ o dàńnɛoronɔ.

⁷ Á dɔ̃ kũ á zĩdao, kũ à mana àgɔ̃ tɛ́ ó ágbai, zaakũ ma'ãdenɔn ó ũ gɔrɔ kũ ó kú á tɛ́ro.

⁸ Ódi gbɛ̃ke pɔ́ble sí o blè fĩnabonaa sariro, o zĩ kɛ̀ gwãani kũ fãnantɛ̃o, o wari kɛ̀ ari í sìwá, de òsun gɔ̃ á gbɛ̃kenɛ aso ũro yãi.

⁹ Ó a zɛ́ vĩ à kpáwái, ama o kɛ̀ lɛ de à ó ágba sɛ́ yãimɛ.

¹⁰ Gɔrɔ kũ ó kú kãáo, o dìtɛ kũ gbɛ̃ kũ à ye zĩkɛnaairo ni pɔ́ blero.

¹¹ O mà kũ á gbɛ̃kenɔ ma'ã vĩ, òdi pɔ́ke kopiro, séde gudɛ.

¹² O dìtɛ gbɛ̃ bire takanɔnɛ, o nańnɛ Dikiri Yesu Kirisii, ò vutɛki kũ ò zĩ kɛ ò ń zĩda gwa.

¹³ Ákɔ̃nɔ sɔ̃ ó gbɛ̃nɔ, àsun kpasa kũ yãmanakɛnaaoro.

¹⁴ Tó gbɛ̃ke dí yã kũ o òárɛ takada dí gũn daro, à a yã bo à dítɛ. Àsun kakara kãaoro, de wé'i le à a kũ yãi.

¹⁵ Ama àsun a sɛ́ á ibɛrɛ ũro, à lɛ́ daa á gbɛ̃ndo ũ.

¹⁶ Dikiri Aafiade á gba aafia gɔrɔ sĩnda pínki yã sĩnda pínki gũn. Dikiri gɔ̃ kú kãáo á pínki.

¹⁷ Makũ Pɔlu makũ mɛ́ ma fɔkpammana díkĩna kɛ̃̀ kũ ma zĩda ɔo. Abirekũmɛ ma takada pínki sèeda ũ, lɛn madì kɛ̃ lɛ.

¹⁸ Ó Dikiri Yesu Kirisi gbɛ̃kɛ kɛárɛ á pínki.