Online Bible

2 SAMUƐLI 9 - Bisã Bible 2005

Dauda gbɛ̃kɛkɛna Mɛfibosɛnɛ

¹ Dauda gbɛ̃nɔ là: Solu buri ke dí gɔ̃roo? Má ye mà gbɛ̃kɛ kɛnɛ Yonatã yãi.

² Solu bɛ zĩkɛri ke kun, a tɔ́n Ziba, akũ ò a sìsi kína Daudanɛ. À a là à pì: Mɔkɔ̃mmɛ Ziba ũ yá? À wèa à pì: Ee, n zɔ̀bleriin ma ũ.

³ Akũ kína pì a là à pì: Solu buri ke kun ari tera yá? Má ye mà gbɛ̃kɛ kũ Luda vĩ kɛnɛmɛ. Akũ Ziba wèa à pì: Yonatã nɛ́ ke kun ari tera. Ɛrɛɛmɛ.

⁴ Akũ kína a là à pì: À kú mámɛɛ? Ziba wèa à pì: À kú Amiɛli nɛ́ Maki bɛa zaa Lodɛba.

⁵ Kína Dauda gbɛ̃nɔ zĩ̀, akũ ò sù kãao.

⁶ Kũ Yonatã nɛ́ Mɛfibosɛ, Solu daikore kà Dauda kĩnaa, à kùtɛnɛ à wùtɛ zĩtɛ. Akũ Dauda pì: Mɛfibosɛ! À wèa à pì: N zɔ̀bleriimɛ ma ũ.

⁷ Akũ Dauda pìnɛ: Ǹsun tó vĩna n kũro, zaakũ mani gbɛ̃kɛ kɛnnɛ n de Yonatã yãi. Mani n dizi Solu buranɔ sukpannɛ pínki, ĩnigɔ̃ su pɔ́ ble kũmao gɔrɔ sĩnda pínki.

⁸ Mɛfibosɛ kùtɛnɛ à pì: Bɔ́n makũ n zɔ̀bleri ũ kũ ĩni ma wɛ̃nda gwaa? Má de lán gbɛ̃nda gɛ̀ɛ bàroo?

⁹ Akũ kína Dauda Solu zĩkɛri Ziba sìsi à pìnɛ: Pɔ́ kũ à de Solu pɔ́ ũ kũ a bedenɔ pɔ́o pínki, ma kpà n dikiri daikorea.

¹⁰ Mɔkɔ̃n kũ n nɛ́nɔ kũ n zĩkɛrinɔ, àgɔ̃ a zĩtɛ zĩ kɛnɛ, à a pɔ́nɔ kɛkɛ, de à le àgɔ̃ zàna vĩ. N dikiri daikore Mɛfibosɛ nigɔ̃ pɔ́ ble kũmao gɔrɔ sĩnda pínki. Ziba sɔ̃ à nɛ́gɔ̃gbɛ̃nɔ vĩ gbɛ̃nɔn gɛ̃ro kũ zĩkɛrinɔ gbɛ̃nɔn baro.

¹¹ Akũ Ziba pì kínanɛ: Yã kũ ma dikiri kína ò makũ a zɔ̀bleriinɛ, mani kɛ pínkimɛ. Akũ Mɛfibosɛ dìgɔ̃ pɔ́ ble kũ kínao, à gɔ̃̀ lán kína nɛ́nɔ doke bà.

¹² Mɛfibosɛ nɛ́gɔ̃gbɛ̃ vĩ, a tɔ́n Mika, akũsɔ̃ Ziba bedenɔ gɔ̃̀ Mɛfibosɛ zĩkɛrinɔ ũ ń pínki.

¹³ À kú Yurusalɛmu, zaakũ àdigɔ̃ pɔ́ ble kũ kínao gɔrɔ sĩnda pínkimɛ. Àkũsɔ̃ ɛrɛɛmɛ.

« Previous