Online Bible

2 SAMUƐLI 7 - Bisã Bible 2005

Luda lɛ́sɛna Daudanɛ

¹ Kũ kína vùtɛ a bɛa, Dikiri a bò ibɛrɛ kũ ò likainɔ ɔĩ à a gbà ĩampaki,

² akũ kína pì annabi Natãnɛ: É'e! Kpɛ́ kũ ò dɔ̀ kũ sida líon manigɔ̃ vutɛn, Luda àkpati gɔ̃ ditɛna bizakutan yá?

³ Natã wèa à pì: Lákũ à kɛ̀nnɛ nà ǹ kɛ, zaakũ Dikiri kú kũnwo.

⁴ Gwãani birea Dikiri yã sù Natãa à pì:

⁵ Ǹ gɛ́ ǹ o ma zɔ̀bleri Daudanɛ kũ ma pì, àkũ mɛ́ ani kpɛ́ kũ manigɔ̃ kun bomɛnɛro.

⁶ Zaa gɔrɔ kũ ma Isarailanɔ bɔ̀tɛ Misila ari gbãra mádi bɛ kũro. Madìgɔ̃ sɔ̃sɔ̃sɔ̃sɔ̃mɛ, bizakutamɛ ma kúki ũ.

⁷ Gu kũ ma sɔ̃sɔ̃n kũ ma gbɛ̃ Isarailanɔ ń pínki madì don'arɛdenɔ ditɛ ò dońnɛ arɛ, ama mádi o ń gbɛ̃kenɛ, bɔ́yãi adi kpɛ́ bomɛnɛ kũ sida líoro.

⁸ Ǹ gɛ́ ǹ o ma zɔ̀bleri Daudanɛ, ma Dikiri Zĩ̀karide ma pì, ma a sɛ̀ sãdãkia de àgɔ̃ de ma gbɛ̃ Isarailanɔ don'arɛde ũ.

⁹ Má kú kãao gu kũ à gɛ̀ɛn pínki, akũ ma a ibɛrɛnɔ dɛ̀dɛnɛ. Mani a tɔ́ bo manamana sà, anigɔ̃ kú andunia tɔ́denɔ tɛ́.

¹⁰ Mani bùsu kpá ma gbɛ̃ Isarailanɔa, mani ń kátɛn, oni vutɛn ń pɔ́ ũ. Ń laakari ni futɛ doro. Gbɛ̃ vãninɔ ni le ò wɛ́ tãḿma lákũ ò wɛ́ tã̀ḿma káaku

¹¹ gɔrɔ kũ ma don'arɛdenɔ dìtɛńnɛ nà doro. Mani a bo a ibɛrɛ pìnɔ ɔĩ ń pínki. Makũ Dikiri matɛn onɛ, makũ mɛ́ mani bɛ kɛnɛ a burinɔ gbãnaleki ũ.

¹² Tó a gɔrɔ pàpa à gà, mani a buri kũ à bò a mɛ̀ɛn ke sɛ́ lei, mani a ká kpatan.

¹³ Àpi mɛ́ ani kpɛ́ bo kũ ma tɔ́ nigɔ̃ kúa, mani a kpatablena gbá pɛ́tɛ, anigɔ̃ kí ble ari gɔrɔ sĩnda pínki.

¹⁴ Manigɔ̃ denɛ De ũ, anigɔ̃ de ma nɛ́ ũ. Tó à taari kɛ̀, mani wɛ́ tãa kũ gòoomɛ, lákũ bisãsiri dì gbɛ̃ gbɛ̃ nà.

¹⁵ Ama ma gbɛ̃kɛ ni kɛ̃kɔ̃a kãao lákũ ma kɛ̃̀kɔ̃a kũ Solu kũ ma a bò Dauda arɛ nàro.

¹⁶ A burinɔ nigɔ̃ kpata ble gɔrɔ sĩnda pínki. A kpata pì nigɔ̃ lakana vĩro.

¹⁷ Akũ Natã yã pìi gbã̀ Daudanɛ lákũ Dikiri òarɛ nà pínki.

Dauda wɛ́kɛna Dikiria

¹⁸ Akũ kína Dauda gɛ̃̀ à vùtɛ Dikiri arɛ à pì: Dikiri Luda, bɔ́n ma ũu? Dínɔn ma bedenɔ ũ kũ n ma ka gwena dí takaaa?

¹⁹ Dikiri Luda, abirekũ bi yã fítimɛ n kĩnaa, akũ n makũ n zɔ̀bleri buri kũ onigɔ̃ kú zianɔ yã ò dɔ yá? Lɛn ndì kɛńnɛ lɛ yá, Dikiri Luda?

²⁰ Dikiri Luda, mani pinnɛ deramɛ dɔɔ? Makũ n zɔ̀bleri ń ma dɔ̃.

²¹ N yã zɔ̃kɔ̃ɔ pìi kɛ̀ lákũ n pɔ yei nà yã kũ n ò yãi, akũ n tò makũ n zɔ̀bleri ma dɔ̃̀.

²² Dikiri Luda, ń zɔ̃kɔ̃ fá! Oni gbɛ̃ke lɛkɔ̃a kũnworo. N baasiro dikiri ke kunlo, lákũ o mà kũ ó são nà.

²³ Dín oni lɛkɔ̃a kũ n gbɛ̃ Isarailanɔɔ? Andunia burinɔ tɛ́ buri mɛ̀n do pìin n bo n gɛ n bò, de ògɔ̃ de n gbɛ̃nɔ ũ. N n zĩda tɔ́ bò, n yã zɔ̃kɔ̃ bonsarɛnɔ kɛ̀ n gbɛ̃ pìnɔnɛ, n pɛ buri kenɔa kũ ń tãnanɔ n gbɛ̃ kũ n ń bó Misilanɔ arɛ.

²⁴ N Isarailanɔ dìtɛ ògɔ̃ de n gbɛ̃nɔ ũ ari gɔrɔ sĩnda pínki. Dikiri, n gɔ̃ ń Luda ũ.

²⁵ Dikiri Luda, lɛ́ kũ n sɛ̀ makũ n zɔ̀bleriinɛ kũ ma burinɔ yã musu, ǹgɔ̃ zĩ kɛa gɔrɔ sĩnda pínki. Ǹ kɛ lákũ n ò nà

²⁶ de ǹ tɔ́ bo manamana ari gɔrɔ sĩnda pínki. Gbɛ̃nɔ ni pi Dikiri Zĩ̀karidemɛ Isarailanɔ Luda ũ. Makũ n zɔ̀bleri Dauda, ĩni ma burinɔ zĩni pɛ́tɛ,

²⁷ zaakũ Dikiri Zĩ̀karide Isarailanɔ Luda, n òmɛnɛ n pì, ĩni ma bɛ kɛmɛnɛ ma burinɔ gbãnaleki ũ. Abire yãi makũ n zɔ̀bleri ma kùgbãna kɛ̀ ma wɛ́kɛ díkĩna kɛ̀mma.

²⁸ Dikiri Luda, mɔkɔ̃mmɛ Luda ũ, n yã náani vĩ, akũ n yã mana dínɔ lɛ́ sɛ̀ makũ n zɔ̀bleriinɛ.

²⁹ Ǹ arubarika da makũ n zɔ̀bleri burinɔgu sà, n wɛ́ nigɔ̃ tɛ́ńyĩ gɔrɔ sĩnda pínki. Dikiri Luda, n yã ò n arubarikaa dà makũ n zɔ̀bleri burinɔgu, onigɔ̃ arubarika vĩ ari gɔrɔ sĩnda pínki.

« Previous