Online Bible

2 SAMUƐLI 3 - Bisã Bible 2005

¹ Zĩ̀ kũ Solu bedenɔ kà kũ Dauda bedenɔ gìi kɛ̀. Dauda gbãna tɛn kara, Solu bedenɔ sɔ̃, ń gbãna tɛn lago.

Dauda nɛ́gɔ̃gbɛ̃nɔ

² Nɛ́gɔ̃gbɛ̃ kũ Dauda ì Ɛblɔnunɔ tɔ́n dí. A káaku tɔ́n Aminɔ. A da tɔ́n Ainɔama, Yɛzɛrili gbɛ̃mɛ.

³ A plade tɔ́n Kiliabu. A da tɔ́n Abigaili, Nabala gyaanɔ Kaamɛli gbɛ̃mɛ. A aakɔ̃de tɔ́n Abusalomu. A da tɔ́n Maaka, Gesuru kína Talamai nɛ́mɛ.

⁴ A siikɔ̃de tɔ́n Adonia. A da tɔ́n Agi. A sɔɔrode tɔ́n Sefatia. A da tɔ́n Abitali.

⁵ A suddode tɔ́n Itiriamu. A da tɔ́n Egela. Dauda nɔnɔ nɛ́ pìnɔ ì Ɛblɔnumɛ.

Abana nana Daudaa

⁶ Gɔrɔ kũ Solu bedenɔ tɛn zĩ̀ ká kũ Dauda bedenɔ, Abana tɛn gbãna kũ Solu bedenɔ gũn.

⁷ Solu nɔ yìgisaride vĩ yã, a tɔ́n Rizipa, Aya nɛ́mɛ. Isibosɛ pì Abananɛ: À kɛ̀ dera n wutɛ kũ ma de nɔoo?

⁸ Abana pɔ fɛ̃̀ manamana Isibosɛ yã pì yãi à pì: Gbɛ̃dan ma ũ Yudanɔ kpa yá? Matɛn gbɛ̃kɛ kɛ n de Solu bedenɔnɛ kũ a dakũnanɔ kũ a gbɛ̃nnanɔ ari kũ a gbãrao. Mádi n na Daudanɛ a ɔĩro, akũ ntɛni ma taari e nɔgbɛ̃ pì yã musu sàa?

⁹ Tó mádi lɛ́ kũ Dikiri sɛ̀ Daudanɛ kɛnɛro, Luda yã kɛmɛnɛ pãsĩpãsĩ.

¹⁰ Mani kpata sí Solu bedenɔa mà tó Dauda gɔ̃ Isarailanɔ kũ Yudanɔ kína ũ sɛna zaa Dani ari à gɛ́ pɛ́o Bɛsɛbaa.

¹¹ Isibosɛ dí we à wè Abanaa doro, kũ àtɛn vĩna kɛnɛ yãi.

¹² Abana gbɛ̃nɔ zĩ̀ Daudaa kũ a tɔ́o à pìnɛ: Dí mɛ́ à bùsu vĩi? Ò lɛ́dokɔ̃nɔ kɛ, mani kpányĩ de Isarailanɔ bàka le àgɔ̃ kú kũnwo ń pínki.

¹³ Akũ Dauda pì: À mana, mani lɛ́dokɔ̃nɔ kɛ kũnwo, ama yã mɛ̀n don matɛn gbɛkamma. Tó ntɛn su ma gwa, tó ńdi sumɛnɛ kũ Solu nɛ́nɔgbɛ̃ Mikalaoro, ǹsun tó ó wɛ́ sikɔ̃lɛro.

¹⁴ Dauda lɛ́gbãzã kɛ̀ Solu nɛ́ Isibosɛnɛ à pì: Ǹ ma nanɔ Mikala sukpamɛnɛ. Ma anzure blè kũ Filisitininɔ gyɔfɔrɔo mɛ̀n basɔɔro.

¹⁵ Akũ Isibosɛ gbɛ̃nɔ zĩ̀, ò nɔgbɛ̃ pìi sì a zã Palatiɛli, Laisi nɛ́a.

¹⁶ Akũ a zã pì tɛn gɛ́ kãao à tɛ́i ari Bahurimu, àtɛn ɔ́ɔ dɔ. Akũ Abana ònɛ à ɛra à tá, akũ à ɛ̀ra.

¹⁷ Abana yã ò kũ Isaraila gbɛ̃ zɔ̃kɔ̃nɔ à pì: Zaa zĩ átɛn wɛtɛ Dauda gɔ̃ de á kína ũ.

¹⁸ À a ká sà, zaakũ Dikiri lɛ́ sɛ̀nɛ à pì, áni a gbɛ̃ Isarailanɔ bo Filisitininɔ kũ ń ibɛrɛnɔ ɔĩ ń pínki a zɔ̀bleri Dauda pìi gãimɛ.

¹⁹ Abana yã pìi dà Biliaminu burinɔnɛ ń sãn dɔ. Akũ à gɛ̀ɛ Ɛblɔnu, de à yã kũ à kɛ̀ Biliaminu burinɔnɛ kũ Isarailanɔoo pì o Daudanɛ.

²⁰ Kũ à kà Dauda kĩnaa zaa Ɛblɔnu kũ gbɛ̃nɔn baro kũ ò kú kãaonɔ, akũ Dauda pɔnna pɔ́ble kɛ̀ńnɛ.

²¹ Akũ Abana pì Daudanɛ: Ma dikiri kína, ǹ tó mà futɛ mà gɛ́ mà Isarailanɔ kakarannɛ ń pínki, de ò lɛ́dokɔ̃nɔ kɛ kũnwo, ĩnigɔ̃ de bùsu kũ n pɔ yei pínki kína ũ. Akũ Dauda Abana gbàrɛ, à tá aafia.

Abana dɛnaa

²² Zĩ birea Yoabu kũ Dauda gbɛ̃nɔ sù kũ lɛ́tɛmmanaao. Ò pɔ́nɔ sì gbɛ̃nɔa manamana ò sùo. Abana kú kũ Daudao gwe doro, zaakũ à a gbàrɛ, à tá aafia.

²³ Kũ Yoabu kũ zĩ̀kari kũ ò kú kãaonɔ kà, ò ònɛ Nɛrɛ nɛ́ Abana sù kína gwa, akũ à a gbàrɛ à tá aafia.

²⁴ Akũ Yoabu gɛ̀ɛ à kína lè à pì: Bɔ́ yãn n kɛ̀ gwee? Kũ Abana sù n kĩnaa, bɔ́yãi n tò à tàa?

²⁵ Ń Nɛrɛ nɛ́ Abana dɔ̃roo? À sù ɔ̃ndɔ̃ kɛnnɛ, de à le àgɔ̃ n gɛ́gɔrɔ kũ n sugɔrɔo dɔ̃ kũ n yãkɛnanɔ pínki.

²⁶ Kũ Yoabu bò Dauda kĩnaa, akũ à gbɛ̃nɔ zĩ̀, ò pɛ̀tɛ Abanai. Ò a lè Sira lɔ̀gɔ kĩnaa, akũ òtɛn su kãao, ama Dauda a yã dɔ̃ro.

²⁷ Kũ ò kà kũ Abanao Ɛblɔnu wɛ̃tɛ bĩnilɛa, akũ Yoabu a sìsi lándɔ̃ à ye à asiriyã onɛ bà, akũ à a zɔ̃̀ a gbɛrɛa à a dɛ̀. A dakũna Asahɛli dɛna fĩnaan à bòa gwe.

²⁸ Abire gbɛra kũ Dauda mà, à pì: Makũ kũ ma kíkɛo, manigɔ̃ taari vĩ Dikirinɛ Nɛrɛ nɛ́ Abana dɛna yã musuro.

²⁹ Yã pì ni wí Yoabu musumɛ kũ a de bedenɔ ń pínki. Yoabu bedenɔ nigɔ̃ kun kɛntude ke kusu ke ɛrɛ ke gbɛ̃ kũ zĩ̀ a blè ke nàdɛrii sariro.

³⁰ Yoabu kũ Abisaio Abana dɛ̀, kũ àkũ mɛ́ à ń dakũna Asahɛli dɛ̀ zĩ̀lan zaa Gibiɔ̃ yãi.

³¹ Akũ Dauda pì Yoabunɛ kũ gbɛ̃ kũ ò kú kãaonɔ ń pínki: À á pɔ́kasanɔ gága à kɛ̃kɛ̃, à uta kasanɔ daála, àgɔ̃ tɛ́ arɛ kũ Abana gɛ̀ɛo kũ ɔ́ɔdɔo. Kína Dauda sɔ̃ à tɛ́ ń kpɛ.

³² Akũ ò a vĩ̀ Ɛblɔnu gwe. Kína wɛ̃nda ɔ́ɔ dɔ̀ gbãnagbãna Abana miraa, akũ gbɛ̃ sĩnda pínki ɔ́ɔ dɔ̀ se.

³³ Akũ kína wɛ̃ndalɛ díkĩna sì Abana yã musu à pì: Abana gana lán mìsaride bà manan gwe yá?

³⁴ Òdi n gã̀ yĩnnɛ n kpɛ kparo, òdi mɔ̀kakɔ̃ana kánnɛro, n ga lán gbɛ̃ kũ à gɛ̃̀ yãvãnikɛrinɔ ɔĩ bà. Akũ gbɛ̃ sĩnda pínki ɛ̀ra ò ɔ́ɔ dɔ̀ dɔ.

³⁵ Gbɛ̃ sĩnda pínki sù ò ò Daudanɛ à pɔ́ ble ari gu gɔ̃ gɛ́ si, ama à la dà à pì: Tó ma burodi ke pɔ́ble ke dà ma lɛ́n ifãntɛ̃ gɛ̃na kpɛ́n sari, Luda yã kɛmɛnɛ pãsĩpãsĩ.

³⁶ Gbɛ̃ sĩnda pínki wɛ́ tɛ̀ yã pìii, akũ à kɛ̀ńnɛ mana. Yã kũ kína tɛn kɛ pínki dì kɛ gbɛ̃nɔnɛ manamɛ.

³⁷ Zĩ birea Dauda gbɛ̃nɔ kũ Isarailanɔ pínki dɔ̃̀ sà kũ kína lɛ́ kú Nɛrɛ nɛ́ Abana dɛna yãnlo.

³⁸ Akũ à pì a gbɛ̃ pìnɔnɛ: Á dɔ̃ kũ Isaraila don'arɛde zɔ̃kɔ̃ɔ gà gbãraroo?

³⁹ Makũ sɔ̃, bee kũ Luda ma ka kína ũ, ma busa gbãra. Zeruya nɛ́ pìnɔ yãkɛna pãsĩ de ma pɔ́la. Dikiri mɛ́ ani fĩna bo vãnikɛriinɛ a vãni lɛ́n.

« Previous