Online Bible

2 SAMUƐLI 24 - Bisã Bible 2005

Dauda a zĩ̀karinɔ naronaa

¹ Dikiri ɛ̀ra à pɔ fɛ̃̀ Isarailanɔi, akũ à Dauda dà à ɔ kà yãi à pì: Ǹ gɛ́ ǹ Isarailanɔ kũ Yudanɔ naro.

² Akũ kína pì Yoabunɛ kũ zĩ̀kari gbɛ̃ zɔ̃kɔ̃ kũ ò kú kãaonɔ à pì: À Isaraila burinɔ bùsu para sɛna zaa Dani ari à gɛ́ pɛ́ Bɛsɛbaa, à zĩ̀karinɔ naro de mà le mà ń dasi lɛ́ dɔ̃.

³ Akũ Yoabu pì kínanɛ: Ma dikiri kína, Dikiri n Luda n gbɛ̃nɔ karannɛ lɛu basɔɔro ǹ wɛ́ sialɛ, ama ma dikiri kína, À kɛ̀ dera ń ye ǹ kɛ lɛɛ?

⁴ Bee kũ abireo kína yã Yoabu kũ zĩ̀kari gbɛ̃ zɔ̃kɔ̃nɔ blè, akũ ò bɔ̀tɛ kína kĩnaa ò gɛ̀ɛ Isarailanɔ naro.

⁵ Kũ ò bikũ̀ Yodaa, akũ ò bùraa kàtɛ Aroa sarɛ. Wɛ̃tɛ pì kú guvutɛmmɛ. Akũ ò kurè Gada bùsun ari Yaza.

⁶ Ò kurè Giliada bùsun ò gɛ̀ɛ Kadɛsi, Iti bùsun ari Daniyani, akũ ò gɛ̀ɛ Sidɔ̃ kpa.

⁷ Ò gɛ̀ɛ Taya wɛ̃tɛ bĩniden kũ Ivi wɛ̃tɛnɔ kũ Kanaa wɛ̃tɛnɔ pínki, akũ ò gɛ̀ɛ Yudanɔ bùsu gɛ̀nɔmidɔki kpa ari Bɛsɛba.

⁸ Ò kurè bùsu pì gũn pínki. Mɔ kɛ̃ndo kũ gɔrɔ baroo gbɛra ò ɛ̀ra ò sù Yurusalɛmu.

⁹ Akũ Yoabu gbɛ̃ kũ à ń naronɔ lɛ́ ò kínanɛ. Isaraila gɔ̃gbɛ̃ kũ ò fɛ̃nɛda dɔ̃nɔ gbɛ̃nɔn dúbu wàa siikɔ̃. Yudanɔ sɔ̃ gbɛ̃nɔn dúbu wàa pla kpɛ́ basɔɔro.

¹⁰ Gbɛ̃ pìnɔ naronaa gbɛra Dauda kú tómadɔ̃yã gũn, akũ à pì Dikirinɛ: Ma durunna kɛ̀ yã pì kɛnaa gũn manamana. Dikiri, makũ n zɔ̀bleri, ǹ ma taari kɛ̃ma sà, zaakũ ma yɔ̃nkɔ yã kɛ̀.

¹¹ Ari Dauda gɔ̃ gɛ́ futɛ kɔnkɔ, Dikiri yã dìdi annabi Gada, Dauda wɛ́gupu'eriia à pì:

¹² Ǹ gɛ́ ǹ o Daudanɛ ma pì, mani yã mɛ̀n aakɔ̃ kátɛnɛ. À yã pìnɔ do gwa à sɛ́, mani kɛnɛ.

¹³ Akũ Gada gɛ̀ɛ à Dauda lè à pìnɛ: Nà kana n bùsun wɛ̃̀ suppla ke n ibɛrɛnɔ pɛtɛnanyĩ ǹ bàa lɛ́ńnɛ mɔ aakɔ̃ ke gagagyã gɛ̃na n bùsun gɔrɔ aakɔ̃, a kpaten n sɛ̀ɛ? Ǹ laasun lɛ́a ǹ gwa, mani gɛ́ mà o Luda kũ à ma zĩnɛ.

¹⁴ Akũ Dauda pì Gadanɛ: Má kú warikɛna zɔ̃kɔ̃ɔ gũn. Ma sì ò lɛ́tɛ ò da Dikiri ɔĩ, zaakũ à wɛ̃nda vĩ manamana. Àsun tó mà lɛ́tɛ mà da bisãsiri ɔĩro.

¹⁵ Akũ Dikiri tò gagagyã gɛ̃̀ Isarailanɔgu zaa kɔnkɔ birea ari gɔrɔ kũ à zɛ̀o. Sɛna zaa Dani ari à gɛ̀ɛ pɛ́ Bɛsɛbaa Isarailanɔ gàga gbɛ̃nɔn dúbu baaakɔ̃ akuri.

¹⁶ Kũ malaika ɔ bò à Yurusalɛmudenɔ kakatɛ, Dikiri a nɛ̀sɛɛ lìtɛ yã pìi musu, akũ à pì malaika kũ àtɛni ń kakatɛ pìinɛ: Ǹ zɛ lɛ! Ǹ n ɔ ɛra sà. Yebusi buri Arauna pɔ́wɛgbɛ̃kin Dikiri malaikaa pì kún.

¹⁷ Gɔrɔ kũ Dauda malaika pìi è àtɛni ń dɛdɛ, à pì Dikirinɛ: Makũ mɛ́ ma durunna kɛ̀ ma taari kɛ̀. Gbɛ̃ pìnɔ bi ma kpàsa sãnɔmɛ, odi yãke kɛro. Ǹ tó n ɔ su makũ kũ ma de bedenɔa.

¹⁸ Zĩ birea Gada gɛ̀ɛ à Dauda lè à pìnɛ: Ǹ gɛ́ Dikiri gbagbaki bo Yebusi buri Arauna pɔ́wɛgbɛ̃kia.

¹⁹ Akũ Dauda gɛ̀ɛ lákũ Dikiri a yã ò Gadanɛ nà.

²⁰ Kũ Arauna wɛ́ zù, à è kína kũ a gbɛ̃nɔ tɛn su a kĩnaa, akũ à gɛ̀ɛ à kùtɛnɛ à wùtɛ a gbɛrɛa

²¹ à pì: Ma dikiri kína, À kɛ̀ dera ntɛn su makũ n zɔ̀bleri kĩnaa lɛɛ? Dauda wèa à pì: Ma su mà n pɔ́wɛgbɛ̃ki lúmma mà Dikiri gbagbaki bon, de gagagyã pì le à go gbɛ̃nɔa yãi.

²² Akũ Arauna pì Daudanɛ: Ma dikiri kína, ǹ pɔ́ kũ à kɛ̀nnɛ mana sɛ́ ǹ sa oo. Ǹ zùnɔ gwa sa'opɔ ũ. Ǹ pɔ́wɛgbɛ̃gonɔ kũ gbãngonɔ sɛ́tɛ yàka ũ.

²³ Kína, ma n gba pínki. Arauna ɛ̀ra à pìnɛ dɔ: Dikiri n Luda sí kũnwo.

²⁴ Akũ kína pìnɛ: Oi! Mani lúmma, mani a fĩna bonnɛ. Mani sa o Dikiri ma Ludaa pã fĩnabonaa sariro. Akũ à pɔ́wɛgbɛ̃ki pì kũ zùnɔ lùa andurufu bupla akuri.

²⁵ Akũ à Dikiri gbagbaki bò gwe à sa'opɔ kũ òdi ká tɛ́n à tɛ́ kũ òa kũ kɛnnakũkɔ̃o sa'opɔnɔ. Dikiri sì kãao a bùsu yã musu, akũ gagagyã pìi zɛ̀.

« Previous