Online Bible

2 SAMUƐLI 23 - Bisã Bible 2005

Yã kpɛde kũ Dauda òo

¹ Yã kpɛde kũ Dauda òon dí. Yɛsɛ nɛ́ Dauda yãn dí, gbɛ̃ kũ Luda a gbà gbãna yã'onaamɛ. Yakubu Luda a kà kína ũ, àkũmɛ Isarailanɔ lɛ̀dari mana ũ.

² Dikiri Nini yã dàmɛnɛ, a yã da ma lɛ́n.

³ Isarailanɔ Luda yã ò, Isarailanɔ Gbɛ̀si pìmɛnɛ: Tó gbɛ̃ kí blè gbɛ̃nɔa a zɛ́a, tó à kí blè vĩnakɛna Ludanɛ gũn,

⁴ àdigɔ̃ de lán ifãntɛ̃ bɔtɛna gupura bàmɛ, lán gudɔna gukɛ̃kɔ̃anaa bà, lán legũ kũ àdi tó sɛ̃̀ butɛ bà.

⁵ Ma bedenɔn nna kũ Ludaoroo? A bàka nigɔ̃ kú kũmao ari gɔrɔ sĩnda pínki. À a yã gɔ̃̀gɔ̃ pínki, à sika vĩro. Ani bo kũ ma surabanaaoroo? Ani pɔ́ kũ má a ni vĩ kpáma pínkiroo?

⁶ Gbɛ̃ pãnɔn de lán lɛ̀ɛ bàmɛ, òdi zɔ̃ ò zukũnamɛ, òdi kũ kyáuro.

⁷ Gbɛ̃ kũ à ye à ɔ kɛa, séto àgɔ̃ gɔ̃kɛbɔ ke gò kũna, àdi tɛ́ naa gu kũ à kún.

Dauda gɔ̃sa gbãnanɔ

⁸ Dauda gɔ̃sa gbãnanɔ tɔ́n dí. Takemɔ gbɛ̃ Yasɔbeamumɛ zĩ̀kari tɔ́de gbɛ̃nɔn aakɔ̃nɔ gbɛ̃ zɔ̃kɔ̃ɔ ũ. Àkũ mɛ́ à sári sɛ̀ gbɛ̃nɔn wàa siikɔ̃nɔi à ń zɔ̃zɔ̃o ń pínki gɔrɔ dokɔ̃nɔ zĩ.

⁹ Gbɛ̃ bire gbɛra Dodai nɛ́ Ɛlɛaza, Ahoa gbɛ̃ kú zĩ̀kari gbɛ̃nɔn aakɔ̃ pìnɔ tɛ́ dɔ. À kú kũ Daudao gɔrɔ kũ Isarailanɔ kàkara ò zĩ̀i kà kũ Filisitininɔ zaa Pasadamimu. Isarailanɔ bòru kpɛ kpa,

¹⁰ àkũ mɛ́ à fùtɛ à Filisitininɔ dɛ̀dɛ ari a ɔ wã̀ à gɔ̃̀ fɛ̃nɛda pá kũna. Dikiri tò à zĩ̀i blè manamana zĩ birea. Zĩ̀kari kparanɔ ɛ̀ra ò sù ò a lè, ama pɔ́nɔ porona gɛ̀nɔa yãimɛ.

¹¹ Gbɛ̃ dí gbɛra Age nɛ́ Sama gusĩsĩde gbɛ̃ kun. Kũ Filisitininɔ gã̀a kàkara gu kũ blá bú kún, Isarailanɔ bàa lɛ̀ńnɛ,

¹² àkũ mɛ́ à zɛ̀ à gì bú pì dagura. À bú pìi sìḿma à Filisitininɔ dɛ̀dɛ. Dikiri tò à zĩ̀i blè manamana.

¹³ Pɔ́kɛ̃gɔrɔ wɔ́rɔgɔde gbɛ̃nɔn baraakurinɔ tɛ́, gbɛ̃nɔn aakɔ̃nɔ bò ò gɛ̀ɛ Dauda kĩnaa zaa Adulamu gbɛ̀wɛɛn. Filisitininɔ gã̀a bùra katɛna Rɛfaimu guvutɛn.

¹⁴ Gɔrɔ birea Dauda kú sɛ̃̀ntɛpɔrɔtu, Filisitini gudãkpãrinɔ sɔ̃ ò kú Bɛtilihamu.

¹⁵ Dauda tɛni a bɛ í ni dɛ à pì: Dí mɛ́ ani gɛ́ à Bɛtilihamu bĩnilɛ lɔ̀gɔ'i tɔ́mɛnɛɛ?

¹⁶ Wɔ́rɔgɔde gbɛ̃nɔn aakɔ̃ pìnɔ mɛ́ ò gɛ̀ɛ ò gɛ̃̀ Filisitininɔ bùran, ò Bɛtilihamu bĩnilɛ lɔ̀gɔ'i tɔ̀ ò sùo Daudanɛ. Akũ adi we à mìro, à kɔ̀tɛ Dikiri arɛ sa'o'i ũ.

¹⁷ À pì: Haba Dikiri, mani fɔ̃ mà í díkũ miro. Gbɛ̃ kũ ò gì ń wɛ̃̀ndiiinɔ arumɛ. Adi we à mìro. Wɔ́rɔgɔde gbɛ̃nɔn aakɔ̃ pìnɔ yãkɛnaan gwe.

¹⁸ Zeruya nɛ́ Abisai, Yoabu dakũna mɛ́ à wɔ́rɔgɔde gbɛ̃nɔn baraakurinɔ gbɛ̃ zɔ̃kɔ̃ ũ. Àkũ mɛ́ à sári sɛ̀ gbɛ̃nɔn wàa do kpɛ́ basɔɔronɔi à ń dɛdɛ, akũ à tɔ́ bò gbɛ̃nɔn baraakurii pìnɔ tɛ́.

¹⁹ À tɔ́ bò de wɔ́rɔgɔde gbɛ̃nɔn aakɔ̃ pìnɔla, akũ à gɔ̃̀ ń gbɛ̃ zɔ̃kɔ̃ ũ, ama à kú wɔ́rɔgɔde tɔ́de gbɛ̃nɔn aakɔ̃ pìnɔ tɛ́ro.

²⁰ Yoyada nɛ́ Bɛnaya, Kabazɛli gbɛ̃mɛ zĩ̀kari wɔ́rɔgɔde ũ. A yãkɛnanɔn dasi. À Mɔabu zĩ̀kari tɔ́denɔ dɛ̀dɛ gbɛ̃nɔn pla. À gɛ̃̀ wɛ̀ɛɛ gũn gɔrɔ kũ legũgbɛɛ kɔ̀tɛ, à músuu dɛ̀.

²¹ À Misila gɔ̃sa gbãna kũ à sári kũnaa dɛ̀. À nài kũ gòoo à a sári sìa à a dɛ̀o.

²² Yoyada nɛ́ Bɛnaya mɛ́ à yã pìnɔ kɛ̀, akũ à tɔ́ bò wɔ́rɔgɔde gbɛ̃nɔn baraakurii pìnɔ tɛ́.

²³ À tɔ́ bò de wɔ́rɔgɔde gbɛ̃nɔn baraakurii pìnɔla, ama à kú wɔ́rɔgɔ tɔ́de gbɛ̃nɔn aakɔ̃ pìnɔ tɛ́ro. Akũ Dauda a dìtɛ a dãkpãrinɔ gbɛ̃ zɔ̃kɔ̃ ũ.

²⁴ Gbɛ̃nɔn baraakurii pìnɔ tɔ́n dí: Yoabu dakũna Asahɛli, Dodo nɛ́ Ɛlana Bɛtilihamu gbɛ̃,

²⁵ Arodi gbɛ̃nɔ Sama kũ Ɛlikao,

²⁶ Paliti gbɛ̃ Ɛlɛzi, Tɛkoa gbɛ̃ Ikɛsi nɛ́ Ira,

²⁷ Anato gbɛ̃ Abiɛza, Usa gbɛ̃ Mɛbunai,

²⁸ Ahoa gbɛ̃ Salamɔ, Nɛtofa gbɛ̃ Marai,

²⁹ Nɛtofa gbɛ̃ Baana nɛ́ Ɛlɛbu, Gibɛa kũ à kú Biliaminu bùsun gbɛ̃ Ribai nɛ́ Itai,

³⁰ Piratɔ̃ gbɛ̃ Bɛnaya, Gaasi guvutɛ gbɛ̃ Idai,

³¹ Araba gbɛ̃ Abialabɔ̃, Bahurimu gbɛ̃ Azamavɛ,

³² Salaboni gbɛ̃ Ɛliabu, Yasɛ̃ nɛ́nɔ,

³³ gusĩsĩde gbɛ̃ Sama nɛ́ Yonatã, gusĩsĩde gbɛ̃ Saraa nɛ́ Ahiamu,

³⁴ Maaka gbɛ̃ Asabai nɛ́ Ɛlifɛlɛti, Gilo gbɛ̃ Aitofɛli nɛ́ Ɛliamu,

³⁵ Kaamɛli gbɛ̃ Ɛzɛro, Larubu buri Parai,

³⁶ Zoba gbɛ̃ Natã nɛ́ Igali, Gada buri Bani,

³⁷ Amɔni buri Zɛlɛki, Bero gbɛ̃ Narai, Zeruya nɛ́ Yoabu zĩ̀kapɔnɔsɛrii,

³⁸ Yɛta gbɛ̃nɔ Ira kũ Garɛbuo

³⁹ kũ Iti buri Uriao. Ń pínki ò gbɛ̃nɔn baraakuri awɛɛsupplamɛ.

« Previous