2 SAMUƐLI 22 - Bisã Bible 2005Dauda Dikiri sáabukpana a zĩ̀blena yã musu ( Zab 18 ) 1 Kũ Dikiri kína Dauda bò Solu kũ a ibɛrɛ kparanɔ ɔĩ, à lɛ̀ɛ dà kũ Dikiri tɔ́o 2 à pì: Dikirimɛ ma gbɛ̀si kũ ma zɛki gbãnao ũ, ma surabariimɛ. 3 Ma Ludamɛ ma gbɛ̀si ũ, madì nai. Àkũmɛ ma sɛ̃gbako ũ ma surabari gbãna kũ ma guleio, ma utɛki kũ ma bokio, àdi ma sí gbɛ̃ pãsĩnɔa. 4 Dikiri kà ò a sáabu kpá. Madì a sísi, àdi ma bo ma ibɛrɛnɔ ɔĩ. 5 Gó'itɛ vlɛ̃̀ kũmao, ísɔ̃ kũ àdi ń kakatɛ tɛni ma ble. 6 Mira bànɔ lìkamai, ga tankutɛ kpàkpamɛnɛ ma arɛ. 7 Kũ má kú wari gũn lɛ, ma Dikiri sìsi, ma wiki lɛ̀ ma Ludaa, akũ à ma kòtoo mà zaa a bɛa, ma wiki kà a kĩnaa, à gɛ̃̀ a sãn. 8 Zĩtɛ lùkaluka à yĩ̀gãyĩgã, kpinɔ dègedege ari ń zĩnin. Ò lùkaluka kũ a pɔ fɛ̃̀ yãi. 9 Túsukpɛ bò a yĩn, tɛ́ kũ àdi ń kpata bò a lɛ́n, a yɔ̃̀nɔ tɛn tɛ́ kɛ a arɛ. 10 À musu wɛ̃̀ à kìpa, legũ sìsi a gbá gbáru. 11 Àtɛn vura dina kɛrubu kpɛ, àtɛn yàa kɛ ĩala. 12 À gusira dà a zĩdala, ludambɛ sira kũ̀ a kúkila. 13 Zaa a gakuri tɛ́kɛnaa gũn legũ tɛn pí pãsĩpãsĩ. 14 Dikiri pàta zaa musu, Luda Musude kòto dɔ legũpũtãna ũ. 15 À kàa fã̀ ma ibɛrɛnɔa à ń fãkɔ̃a, à tò legũ pìḿma à pɛ̀ḿma. 16 Kũ Dikiri pàtaḿma, kũ à pɔ́ bò a yĩn, ísira zĩtɛ bò gupuraa, andunia zĩni gɔ̃̀ katɛna pótompo. 17 À ɔ bò zaa musu à ma kũ, à ma bo swada gũn. 18 À ma si ma ibɛrɛ gbãna ɔĩ kũ ma zãnguri kũ ń gbãna demalanɔ. 19 Ò lɛ̀tɛma ma sunyĩkɛgɔrɔa, ama Dikiri zɛ̀ kũmao. 20 À ma bo à ma gba mɛ̀poroki, à ma sura bà kũ à yemai yãi. 21 Dikiri yã kɛ̀mɛnɛ ma nɛ̀sɛmana lɛ́n, à fĩna bòmɛnɛ ma gbãsĩsarikɛ lɛ́n. 22 Zaakũ má Luda yãditɛnanɔ kũna, mádi yã vãni kɛ ma a Luda tònlo. 23 A dokayãnɔ dìgɔ̃ domɛnɛ arɛ pínki, mádi kpɛ li yã kũ à dìtɛnɔnɛro. 24 Má kunna taari vĩ Dikirinɛro, má a zĩda kũna durunna sari. 25 Dikiri fĩna bòmɛnɛ ma nɛ̀sɛmana lɛ́n, zaakũ à è má kun gbãsĩ sari. 26 Náanidemɛ n ũ náanidenɔnɛ, taarisaridemɛ n ũ taarisaridenɔnɛ. 27 Ń swáswa gbɛ̃ swáswanɔnɛ, ama ndì ibɛrɛ kpá kũ gbɛ̃ dɔ̀rɔsaridenɔo. 28 Ndì zĩdabusarinɔ sura ba, ndì zĩdabirinɔ lago. 29 Dikiri, mɔkɔ̃mmɛ ma fitila ũ, Dikiri, ndì ma gusira litɛ gupura ũ. 30 Kũ n gbãnao mani fɔ̃ mà kusi karaaa, ma Luda gãi mani fɔ̃ mà vĩ gbĩ̀la. 31 Luda díkĩna sɔ̃ a yãkɛna papana, Dikiri yã mamberu vĩro, à swáswa, à de sɛ̃gbako ũ gbɛ̃ kũ ò nàinɔnɛ. 32 Dikiri baasiro, dín Luda ũu? Ó Luda baasiro, dín gbɛ̀si ũu? 33 Luda mɛ́ àdi ma gba gbãna, àkũ àdi zɛ́ poromɛnɛ súsu. 34 Àdi tó ma gbá kãi gɔ̃ nna lán zɔ̃ pɔ́ bà, àdi tó màgɔ̃ táa o guleinɔ musu. 35 Àdi zĩ̀kanaa dadamɛnɛ, ari ma gã̀sã ni fɔ̃ à mɔ̀gotɛ̃ sá gá. 36 Ndì n zĩ̀blena sɛ̃gbako kpáma, ndì natɛ ǹ ma tɔ́ bo. 37 Ndì ma zɛ́ yàasa kũmɛnɛ, de ma gbá sún sataro. 38 Ma pɛtɛ ma ibɛrɛnɔi ma ń dúgu zɔ̃̀, mádi ɛra mà suro, sé ma gɛ ma ń dɛdɛ. 39 Ma ń wiwi dúgudugu, odi fɔ̃ ò fùtɛ doro, ò lɛ̀tɛ ò gɔ̃̀ katɛna ma gbá gɛ̃i. 40 N ma gba gbãna ma zĩ̀i kào, n tò ma ibɛrɛnɔ mìi nàtɛmɛnɛ. 41 N tò ma zãngurinɔ kpɛ lì, akũ ma a ibɛrɛ pìnɔ kàkatɛ. 42 Ò wiki lɛ̀, gbɛ̃ke dí ń sura baro, ò lɛ́ zù Dikirii, adi weḿmaro. 43 Ma ń kɛ́ nɛ́kunɛku lán bùsutiti bà, ma táa òḿma lán zɛ́ gũn bɔkɔtɔ bà. 44 N ma bo ma gbɛ̃ kũ ò fùtɛmainɔ ɔĩ, n ma kɛ burinɔ mìde ũ. Buri kũ má ń dɔ̃ronɔ dì zɔ̀ blemɛnɛ, 45 buri zĩ̀tɔnɔ dì kã natɛmɛnɛ. Tó ò ma yã mà, òdi mì natɛmɛnɛ. 46 Ń kã dì ga, òdi bo ń kúki gbãnanɔn kũ lukanaao. 47 Dikiri kun! Arubarikademɛ ma gbɛ̀si ũ! Ò Luda ma gbɛ̀si ma surabari tɔ́ bo! 48 Luda mɛ́ àdi mɔra káḿmamɛnɛ, àdi tó burinɔ mì natɛmɛnɛ, 49 àdi tó mà piti ma ibɛrɛnɔa. N ma gba gbãna de ma zãngurinɔla, n ma bo gbɛ̃ pãsĩnɔ ɔĩ. 50 Abire yãi mani n sáabu kpá burinɔ tɛ́, mani n tɔ́ kpá, Dikiri. 51 Dikiri dì zĩ̀ zɔ̃kɔ̃ ble kína kũ á sɛ̀ɛnɛ, àdi gbɛ̃kɛ kɛ kína kũ á kàanɛ, makũ Dauda kũ ma burinɔ ari gɔrɔ sĩnda pínki. |
Bisã Bible © SIM International, 2005.