Online Bible

2 SAMUƐLI 20 - Bisã Bible 2005

Sɛba bona Dauda kpɛ

¹ Gaavude ke mɛ́ à kú gwe, a tɔ́n Sɛba, Bikiri nɛ́, Biliaminu burimɛ. Akũ à kuru pɛ̀ à pì: Ó baka kú kũ Daudaoro, ó bàka kú kũ Yɛsɛ nɛ́oro, ákɔ̃nɔ Isarailanɔ, á baadi tá a bɛa.

² Akũ Isarailanɔ kɛ̃̀ Daudaa ń pínki ò gɛ̀ɛ ò nà Bikiri nɛ́ Sɛbaa, ama Yudanɔ zɛ̀ kũ ń kínao bona zaa Yodai ari Yurusalɛmu.

³ Kũ Dauda sù a bɛa Yurusalɛmu, à a nɔ yìgisaride gbɛ̃nɔn kuri kũ à tò òtɛn bɛ gwanɔ sɛ̀ à ń ká bɛ ken ògɔ̃ ń dãkpã. Dauda ń gwá, ama adi wútɛ kũńwo doro. Ò ń káka kpɛ́n gyaanɔnɔ ũmɛ ari ò gɛ̀ɛ ò gàgao.

⁴ Akũ kína pì Amasanɛ: Ǹ Yuda zĩ̀karinɔ sísi ò kakaramai gɔrɔ aakɔ̃ dagura. Mɔkɔ̃n sɔ̃, ĩnigɔ̃ kú lamɛ.

⁵ Amasa gɛ̀ɛ à Yudanɔ sìsi, ama à gìi kɛ̀ de gɔrɔ kũ kína dìtɛnɛla.

⁶ Akũ Dauda pì Abisainɛ: Bikiri nɛ́ Sɛba ni wari dɔwá tera de wari kũ Abusalomu dɔ̀wála. Ǹ ma gbɛ̃nɔ sɛ́tɛ à pɛ́tɛi, de àsun sí wɛ̃tɛ bĩniden à piti ó ɔĩro yãi.

⁷ Akũ Yoabu gbɛ̃nɔ kũ kína dãkpãrinɔ kũ zĩ̀karinɔ ń pínki ò bɔ̀tɛ Yurusalɛmu ò pɛ̀tɛ Bikiri nɛ́ Sɛbai.

⁸ Gɔrɔ kũ ò kú gbɛ̀ gbɛ̃̀ntɛ̃ kũ à kú Gibiɔ̃ sarɛ, akũ Amasa sù dańlɛ. Yoabu zĩ̀ka'uta dana, a fɛ̃nɛ dɔna a pi. Kũ à nà Amasai, à fɛ̃nɛ pìi wòto a plɛn

⁹ à pìnɛ: Ma gbɛ̃, ń aafia yá? Akũ à Amasa kũ̀ a lɛ́kãsãa kũ a ɔ plao lákũ à ye à lɛ́ pɛ́aa bà.

¹⁰ Amasa dí fɛ̃nɛ kũ à kú Yoabu ɔn tàasi káro, akũ Yoabu a zɔ̃̀o a gbɛrɛn, a nukãninɔ bɔ̀tɛ à kàtɛ zĩtɛ. Yoabu dí ɛra à a plade zɔ̃̀ doro, zaakũ à gà kɔ̀. Akũ Yoabu kũ a dakũna Abisaio pɛ̀tɛ Bikiri nɛ́ Sɛbai.

¹¹ Yoabu ìbanɔ do gɔ̃̀ zɛna Amasala à pì: Gbɛ̃ kũ à zɛ̀ kũ Yoabuo kũ Daudao, à do Yoabui.

¹² Aru dana Amasa gɛ̀la zɛ́dan, akũ zĩ̀kari kũ òtɛn sunɔ zɛ̀ òtɛn gwa ń pínki. Kũ Yoabu ìbaa pìi è gbɛ̃ kũ òtɛn su gwenɔ ń pínki ò zɛ̀ òtɛn gwa, akũ à Amasa gɛ̀ɛ gàtɛ à gòo zɛ́n à dìtɛ sɛ̃̀n, akũ à uta kùala.

¹³ Kũ à gàtɛ à gòo zɛ́n lɛ, gbɛ̃ sĩnda pínki bò à tɛ̀ Yoabui, akũ ò Bikiri nɛ́ Sɛba gbɛ̀sɛ.

¹⁴ Sɛba lìka Isaraila burinɔ bùsuui pínki ari Abɛli Bɛtɛmaka, akũ Bɛri burinɔ sù ò kàkara ò tɛ̀i gwe.

¹⁵ Yoabunɔ sù ò lìkai zaa Abɛli Bɛtɛmaka. Ò bùsuu kàtɛkatɛ wɛ̃tɛ bĩni sarɛ, akũ òtɛn wɛtɛ ò bĩni pìi gboro.

¹⁶ Akũ nɔgbɛ̃ ɔ̃ndɔ̃de ke lɛ́ zù zaa wɛ̃tɛ gũn à pì: À sã kpá! À sã kpá! Ǹ o Yoabunɛ à su la, mà yã onɛ.

¹⁷ Kũ Yoabu nà nɔgbɛ̃ pìii, akũ à a là à pì: Mɔkɔ̃mmɛ Yoabu ũ yá? À wèa à pì: Makũmɛ! Akũ à pìnɛ: Ǹ sã kpá makũ n zɔ̀bleri yãi. À pì: Ma sã kpà.

¹⁸ Akũ nɔgbɛ̃ pìi pì: Òdi pi yã, ǹ yã gbɛka Abɛlidenɔa, yã le à mì dɛ.

¹⁹ Ó kun yãkete sari Isaraila gbɛ̃ náanidenɔ ũ, akũ ntɛn wɛtɛ ǹ Isaraila wɛ̃tɛ tɔ́de dí kakatɛ yá? Bɔ́yãi ń ye ǹ Dikiri wɛ̃tɛ dɛɛ?

²⁰ Yoabu wèa à pì: Gyam! Oi! Má ye mà á dɛdɛro. Má ye mà á wɛ̃tɛ kakatɛro.

²¹ Lɛnlo! Gbɛ̃ kũ òdi pinɛ Bikiri nɛ́ Sɛba, Ɛflaimu burinɔ bùsu sĩ̀sĩde gbɛ̃ mɛ́ à fùtɛ kína Daudai. À gbɛ̃ mɛ̀n do pì kpáma, mani go á wɛ̃tɛla. Akũ nɔgbɛ̃ pìi pìnɛ: Ǹ ma! Oni a mì zunnɛ zaa bĩni musu.

²² Nɔgbɛ̃ pìi gɛ̀ɛ à a gbɛ̃nɔ lè kũ a ɔ̃ndɔ̃kɛo, akũ ò Bikiri nɛ́ Sɛba mìi zɔ̃̀ ò zù Yoabunɛ. Yoabu kuru pɛ̀, akũ ò fã̀kɔ̃a, ò wɛ̃tɛ pìi tò gwe. Baadi tà a bɛa, akũ Yoabu pìi tà kína kĩnaa Yurusalɛmu.

Dauda ìbanɔ

²³ Yoabumɛ Isaraila zĩ̀karinɔ pínki gbɛ̃ zɔ̃kɔ̃ ũ. Yoyada nɛ́ Bɛnayamɛ dogarinɔ gbɛ̃ zɔ̃kɔ̃ ũ.

²⁴ Adoniramumɛ zɔ̀nɔ gbɛ̃ zɔ̃kɔ̃ ũ. Ailudi nɛ́ Yosafatamɛ baarukpari ũ.

²⁵ Sevamɛ takadakɛ̃ri ũ. Zadɔki kũ Abiataoomɛ sa'orikinɔ ũ.

²⁶ Yairi gbɛ̃ Iramɛ Dauda kpàasi ũ.

« Previous