2 SAMUƐLI 2 - Bisã Bible 2005

Dauda kana Yudanɔ kpatan

¹ Abire gbɛra Dauda Dikiri gbɛ̀ka à pì: Mà gɛ́ Yuda wɛ̃tɛ ke gũn yá? Dikiri pìnɛ à gɛ́, akũ Dauda ɛ̀ra à a là à pì: Mákpan mà gɛ́nn? Dikiri wèa à pì: Ɛblɔnu kpa.

² Akũ Dauda gɛ̀ɛ gwe kũ a nɔ mɛ̀n planɔ, Yɛzɛrili gbɛ̃ Ainɔama kũ Nabala gyaanɔ Abigaili, Kaamɛli gbɛ̃o.

³ Dauda gɛ̀ɛ kũ gbɛ̃ kũ ò kú kãaonɔ dɔ, baadi kũ a bedenɔ, akũ ò vùtɛ Ɛblɔnu kũ a lakutunɔo.

⁴ Akũ Yudanɔ gbɛ̃ zɔ̃kɔ̃nɔ sù ò nísi kù Dauda mìia gwe, ò a kà Yudanɔ kína ũ. Kũ Dauda mà Yabɛsi Giliadadenɔ mɛ́ ò Solu vĩ̀,

⁵ à gbɛ̃nɔ zĩ̀ḿma, ò gɛ̀ɛ ò òńnɛ: Dauda pì, Dikiri arubarika daágu, kũ a gbɛ̃kɛ kɛ̀ Solu á dikiriinɛ a a vĩ̀.

⁶ Dikiri gbɛ̃kɛ yã kũ náani yão kɛárɛ. Makũ sɔ̃ mani yã mana kɛárɛ kũ a yã pìi kɛ̀ yãi.

⁷ Tera sà àgɔ̃ gbãna à kù gbãna kɛ. Á dikiri Solu gà, akũ Yudanɔ ma ka ń kína ũ.

⁸ À sù à lè Nɛrɛ nɛ́ Abana, Solu zĩ̀karinɔ gbɛ̃ zɔ̃kɔ̃ɔ gĩnakɛ à gɛ̀ɛ se kũ Solu nɛ́ Isibosɛo Manaimu.

⁹ Akũ à a kà kína ũ Giliada bùsun kũ Asa burinɔ bùsuuo kũ Yɛzɛrilio kũ Ɛflaimu burinɔ bùsuuo kũ Biliaminu burinɔ bùsuuo kũ Isarailanɔ bùsu kparanɔ pínki.

¹⁰ Solu nɛ́ Isibosɛ wɛ̃̀ buplade gũnn à gɔ̃̀ Isarailanɔ kína ũ. À kí blè wɛ̃̀ pla. Yudanɔ sɔ̃, Daudan ò zɛ̀o.

¹¹ Dauda kí blè Yudanɔa zaa Ɛblɔnu ari wɛ̃̀ suppla kũ mɔ suddoo.

Isarailanɔ zĩ̀kana kũ Yudanɔ

¹² Nɛrɛ nɛ́ Abana kũ Solu nɛ́ Isibosɛ zĩ̀karinɔ bò Manaimu ò gɛ̀ɛ Gibiɔ̃.

¹³ Zeruya nɛ́ Yoabu kũ Dauda zĩ̀karinɔ fùtɛ ò gɛ̀ɛ dańlɛ Gibiɔ̃ íkaki sarɛ. Ń gã̀ do kú í bara la, ń gã̀ do kú í bara dire.

¹⁴ Akũ Abana pì Yoabunɛ: Ǹ tó kɛfɛnna kenɔ futɛkɔ̃i ò gwa. Akũ Yoabu pì: Ò gɛ́.

¹⁵ Akũ Biliaminu zĩ̀karinɔ fùtɛ gbɛ̃nɔn kuri awɛɛpla Isibosɛ pɔ́ ũ, akũ Dauda zĩ̀karinɔ fùtɛ gbɛ̃nɔn kuri awɛɛpla se.

¹⁶ Baadi ɔ kà a ɔsikari dake kɔ̀kɔtɔɔi, akũ ò kɔ̃ zɔ̃̀zɔ̃ kɔ̃ gbã̀ntɛrɛɛa kũ fɛ̃nɛo ò lɛ̀tɛ lɛɛlɛ. Akũ ò tɔ́ kpà Gibiɔ̃ gu pìinɛ Fɛ̃nɛlɛnnabura.

¹⁷ Zĩ̀ kũ ò kà zĩ birea pãsĩ manamana, akũ Dauda zĩ̀karinɔ zĩ̀i blè Abana kũ Isarailanɔa.

¹⁸ Zeruya nɛ́gɔ̃gbɛ̃ gbɛ̃nɔn aakɔ̃nɔn kú gwe, Yoabu kũ Abisaio kũ Asahɛlio. Asahɛli sɔ̃ a bà nna lán zɔ̃ bà.

¹⁹ Akũ à pɛ̀tɛ Abanai, adi litɛ ɔplai ke ɔzɛiro.

²⁰ Kũ Abana a kpɛ gwà à a è, akũ à pì: Asahɛli, mɔkɔ̃mmɛ gwe yá? À wèa à pì: Makũmɛ.

²¹ Akũ Abana pìnɛ: Ǹ litɛ n ɔplai ke n ɔzɛi, ǹ kɛfɛnnanɔ doke kũ ǹ a pɔ́nɔ sía. Ama Asahɛli dí zɛnɛro.

²² Abana ɛ̀ra à pìnɛ dɔ: Ǹsun namairo. Ń ye mà n dɛn yá? Tó ma n dɛ, mani we ó wɛ́ kɛ siikɔ̃ kũ n vĩ̀ni Yoabuo dɔ yá?

²³ Ama Asahɛli gì, adi zɛnɛro, akũ Abana a zɔ̃̀ a gbɛrɛa kũ a sári páo ari à bò a kpɛ kpa. Gwen à lɛ̀tɛn à gà gɔ̃̀nɔ. Kũ gbɛ̃ sĩnda pínki kà gu kũ à lɛ̀tɛ à gà pìn, ò zɛ̀ òtɛn gwa.

²⁴ Akũ Yoabu kũ Abisaio pɛ̀ Abanaa ari ifãntɛ̃ gɛ̀ɛ à gɛ̃̀ kpɛ́n. Ò kà Ama sĩ̀sĩ kũ à kú Gia ifãboki kpa Gibiɔ̃ gbáranna zɛ́n.

²⁵ Biliaminu burinɔ kàkara Abanai gã̀ do, akũ ò gɛ̀ɛ òtɛn gí kũ ń zĩdao sĩ̀sĩi musu.

²⁶ Akũ Abana lɛ́ zù Yoabui à pì: Óni zɛ kɔ̃dɛdɛnaanɛroo? Ń dɔ̃ kũ yã pì ni mì dɛ kũ pɔsiraoroo? Ĩni o n gbɛ̃nɔnɛ ò zɛwɛrɛ ò ɛra ò tároo?

²⁷ Akũ Yoabu wèa à pì: Luda kun! Tó ńdi lɛ́ sí yãro, ma gbɛ̃nɔ ni zɛárɛro ari gu gɛ́ dɔo.

²⁸ Kũ Yoabu kuru pɛ̀, akũ a gbɛ̃nɔ kámma bò, odi gɛ́ Isarailanɔa kũ zĩ̀io doro.

²⁹ Gwãani birea Abana kũ a gbɛ̃nɔ táa ò sɛ̃̀n ò bikũ̀ Yodaa, akũ ò tɛ́ swadɔrɔɔi ari ò gɛ̀ɛ ò kà Manaimu.

³⁰ Kũ Yoabu sù kũ pɛna Abanaaao, akũ à a zĩ̀karinɔ kàkara ń pínki. Dauda gbɛ̃nɔ tɛ́ gbɛ̃nɔn baro donsari mɛ́ ò kunlo, Asahɛli baasi.

³¹ Ò Biliaminu kũ ò kú kũ Abanaonɔ dɛ̀dɛ gbɛ̃nɔn wàa do kũ basɔraakɔ̃o.

³² Ò Asahɛli gɛ̀ɛ sɛ̀ ò vĩ̀ a de miran Bɛtilihamu. Akũ Yoabu kũ a gbɛ̃nɔ táa ò gwãani ò kà Ɛblɔnu gudɔnaao.