Online Bible

2 SAMUƐLI 17 - Bisã Bible 2005

Usai ɔ̃ndɔ̃kɛna Abusalomunɛ

¹ Aitofɛli pì Abusalomunɛ: Tó makũmɛ, mani zĩ̀karinɔ sɛ́ gbɛ̃nɔn dúbu kuri awɛɛpla mà pɛ́tɛ Daudai kũńwo gwãaniala.

² Mani lɛ́tɛa gɔrɔ kũ à kpàsa a ɔ bùsa, mani a fu. A gbɛ̃nɔ ni bàa lɛ́ ń pínki, mani a dɛ ado,

³ mani sunnɛ kũ gbɛ̃ pìnɔ ń pínki. Gbɛ̃ kũ ntɛn wɛtɛ ǹ dɛ ganan gbɛ̃ pìnɔ suna ũ ń pínki. Tó à gà, gbɛ̃ kparanɔ ni gɔ̃ aafia ń pínki.

⁴ Yã pìi kɛ̀ Abusalomunɛ nna kũ Isaraila gbɛ̃ zɔ̃kɔ̃nɔ ń pínki.

⁵ Akũ Abusalomu pì: Ò Aki gbɛ̃ Usai sísi dɔ ò ma lákũ ani o nà se.

⁶ Kũ Usai kà, Abusalomu pìnɛ: Lákũ Aitofɛli ò nàn dí. Ò kɛ lákũ à ò nàn yá? Ke òsun kɛ lɛro. N è deramɛɛ?

⁷ Usai wèa à pì: Lɛ́ kũ Aitofɛli dàáwa gbãra manaro.

⁸ Ń n de dɔ̃ kũ a gbɛ̃nɔ. Zĩ̀kari mananɔmɛ ń ũ, ò pãsĩ lán músu nɛ́rande kũ ò a nɛ́nɔ sìaa bàmɛ. N de bi zĩ̀kariimɛ, ani we à i gu dokɔ̃nɔ kũ a gbɛ̃nɔoro.

⁹ Gu kũ à kun tera, anigɔ̃ utɛna gbɛ̀wɛɛɛ gũn ke gukea. Tó à sù à lɛ̀tɛ ó gbɛ̃nɔa káaku sɔ̃, gbɛ̃ kũ à a baaruu mà ni pi, ò zĩ̀i blè Abusalomu zĩ̀karinɔamɛ.

¹⁰ Bee gɔ̃sa gbãna kũ à wɔ́rɔgɔ vĩ lán músuu bànɔ swɛ̃̀ ni kɛ̃ńgumɛ, zaakũ Isarailanɔ dɔ̃ ń pínki kũ n de bi zĩ̀kari manamɛ, akũsɔ̃ gɔ̃sa gbãnanɔn kú kãao.

¹¹ Abire yãi lɛ́damma yã kũ má vĩn dí. Ǹ Isarailanɔ kakaranyĩ ń pínki zaa Dani ari gɛna Bɛsɛba, ògɔ̃ dasi lán ísiralɛ bùsu'atɛ̃ bà, ǹ dońnɛ arɛ zĩ̀lan.

¹² Óni a le gu kũ à kun pínki, óni lɛ́tɛa lán plí dì kɔ́tɛ zĩtɛa nà. Àpi kũ gbɛ̃ kũ ò kú kãaonɔ ń pínki, ń gbɛ̃ke ni boro.

¹³ Tó à sù à gɛ̃̀ wɛ̃tɛ ke gũmmɛ sɔ̃, Isaraila gbɛ̃ sĩnda pínki ni bà sɛ́ à gɛ́o gwe, oni wɛ̃tɛ pì kátɛbɔnɔ gátɛ ò táo guvutɛn. Bee a gbɛ̀ kaso ke, oni e gwe doro.

¹⁴ Akũ Abusalomu kũ Isarailanɔ pì ń pínki: Usai lɛ́damma mana de Aitofɛli pɔ́la. Dikiri mɛ́ à zɛ̀o à Aitofɛli lɛ́damma mana pìi gboro, de à le à Abusalomu ásaru kɛ yãi.

¹⁵ Akũ Usai ò sa'ori Zadɔkinɛ kũ sa'ori Abiatao à pì: Aitofɛli lɛ́ dà Abusalomua kũ Isaraila gbɛ̃ zɔ̃kɔ̃nɔ à pì à kɛ lán dí bà, akũ ma lɛ́ dàḿma ma pì ò kɛ lán dí bà.

¹⁶ À gbɛ̃nɔ zĩ likalika ò gɛ́ ò o Daudanɛ àsun i swabikũkiaro, à bikũ likalika, de òsun àpii kũ gbɛ̃ kũ ò kú kãaonɔ dúgu zɔ̃ro yãi.

¹⁷ Yonatã kũ Aimazao kú Ɛnlogɛli, zaakũ oni fɔ̃ ò bo gupuraa Yurusalɛmuro. Akũ nɔkpare zĩkɛri ke gɛ̀ɛ à òńnɛ ò gɛ́ baaruu pìi kpá kína Daudanɛ.

¹⁸ Akũsɔ̃ kɛfɛnna ke ń é, akũ à gɛ̀ɛ à ò Abusalomunɛ. Gbɛ̃nɔn pla pìnɔ dà zɛ́n gɔ̃̀nɔ, ò gɛ̀ɛ gbɛ̃ke bɛa Bahurimu. Lɔ̀gɔ kú ɔnn gwe, akũ ò gɛ̃̀n.

¹⁹ Akũ bede pì nanɔ lɔ̀gɔɔ pì nɛ́ kpàalɛ à pɔ́blewɛ fã̀tɛa, gbɛ̃ke a yã dɔ̃ro.

²⁰ Kũ Abusalomu gbɛ̃nɔ sù nɔgbɛ̃ pì bɛa ò pì: Aimaza kũ Yonatão kú mámɛɛ? À wèḿma à pì: Ò bikũ̀ swa'ɔnɛa. Ò ń wɛ́tɛ, odi ń ero, akũ ò ɛ̀ra ò tà Yurusalɛmu.

²¹ Kũ ò tà, akũ gbɛ̃nɔn pla pìnɔ bɔ̀tɛ lɔ̀gɔɔ pìi gũn, ò gɛ̀ɛ ò pì kína Daudanɛ: Ǹ bikũ swaa likalika, zaakũ Aitofɛli n kpakpa kũ yã vãniomɛ.

²² Dauda dà zɛ́n kũ gbɛ̃ kũ ò kú kãaonɔ ń pínki, ò bikũ̀ Yodaa. Kũ gu dɔ̀, ń gbɛ̃ke dí gɔ̃ro, ò bikũ̀ ń pínki.

²³ Kũ Aitofɛli è òdi zĩ kɛ a lɛ́damma yãaro, à fùtɛ à gàarii yĩ̀ a zaakinɛ à tà a bɛ wɛ̃tɛn. À a bɛ pɔ́nɔ nàkɔ̃a, akũ à a zĩda lòko à gà, akũ ò a vĩ̀ a de mirawɛɛn.

²⁴ Dauda gɛ̀ɛ Manaimu, akũ Abusalomu bikũ̀ Yodaa kũ Isarailanɔ ń pínki.

²⁵ Abusalomu Amasa dìtɛ zĩ̀karinɔ gbɛ̃ zɔ̃kɔ̃ ũ Yoabu gɛ̃nɛ ũ. Amasa bi Sumaila buri Yɛta nɛ́mɛ. A dan Naasa nɛ́ Abigaili ũ, Yoabu da Zeruya dakũnamɛ.

²⁶ Isarailanɔ kũ Abusalomuo bùraa kɛ̀ Giliada bùsun.

²⁷ Kũ Dauda kà Manaimu, Naasa nɛ́ Sobi, Raba wɛ̃tɛ kũ à kú Amɔninɔ bùsun gbɛ̃ sù kũ Lodɛba gbɛ̃ Amiɛli nɛ́ Makio kũ Rogɛlimu kũ à kú Giliada bùsun gbɛ̃ Bazilaio.

²⁸ Ò sù kũ wutɛbɔnɔ kũ tanɔ kũ oronɔ kũ éseo kũ nagão kũ wísitio kũ pɔ́blewɛ kpatanaao kũ bláo kũ dò pɔ́nɔ

²⁹ kũ zɔ́o kũ vĩfãaniio kũ sã nɔ̀bɔɔo kũ gàsiio, ò kpà Daudaa kũ gbɛ̃ kũ ò kú kãaonɔ ò ble, zaakũ ò pì: Nà kũ ímio gbɛ̃ pìnɔ dɛ̀ gbárannan, ò kpàsa.

« Previous