Online Bible

2 SAMUƐLI 16 - Bisã Bible 2005

Dauda kũ Zibao kũ Simɛio

¹ Kũ Dauda vĩ̀ sĩ̀sĩ mìdangurala fíti, à è Mɛfibosɛ bɛgwari Ziba gàarii yĩ̀ zaakinɔnɛ mɛ̀n pla, àtɛn su daalɛ. Ò burodi sɛna mɛ̀n wàa do kũ geepi kàraao mɛ̀n basɔɔro kũ kaka nɛ́ kàraao mɛ̀n basɔɔro kũ sèwɛ̃o tùru do.

² Akũ Dauda Ziba là à pì: Bɔ́ mɛ́ à tò n su kũ abireoo? Ziba wèa à pì: Kína, zaakinɔ bi n bedenɔ pɔ́mɛ ò dia. Burodi kũ kàranɔ bi n gbɛ̃nɔ pɔ́blemɛ. Wɛ̃ sɔ̃, gbɛ̃ kũ ò kpàsa gbáranna gũnnɔ pɔ́minaamɛ.

³ Kína a là à pì: N dikiri kũ à kɛ̀ sari daikore kú mámɛ? Ziba wèa à pì: À gɔ̃̀ Yurusalɛmu, zaakũ àtɛn da Isarailanɔ a ká a dizi kpatan gbãramɛ.

⁴ Akũ kína pìnɛ: Pɔ́ kũ Mɛfibosɛ vĩ pínki gɔ̃̀ n pɔ́ ũ. Akũ Ziba pì: Má kútɛ dí! Ma dikiri kína, ǹ tó màgɔ̃ n pɔnna le lɛ.

⁵ Kũ kína Dauda nà Bahurimui, à è gɔ̃gbɛ̃ ke bò. A tɔ́n Simɛi, Gera nɛ́mɛ. Àkũmɛ buri dokɔ̃nɔ kũ Solu bedenɔ. À bò wɛ̃tɛ gũn, àtɛn Dauda ká.

⁶ Àtɛn gbɛ̀ zuzu kína Daudai kũ a gbɛ̃nɔ, bee kũ a zĩ̀karinɔ kũ a dogarinɔn kú a ɔplai kũ a ɔzɛio ń pínki.

⁷ Àtɛni a sɔ̃sɔ̃ àtɛn pi: Ǹ gɛ́! Ǹ gɛ́! Gbɛ̃dɛri! Pɔ́ pã!

⁸ Dikiri fĩna bònnɛ Solu kũ n kí blè a gɛ̃nɛ ũ bedenɔ dɛdɛna yã yãi. Dikiri n bo kpatan à n nɛ́ Abusalomu kàn. Ásaru kɛ̀mma sà, zaakũ gbɛ̃dɛriimɛ n ũ.

⁹ Akũ Zeruya nɛ́ Abisai pì kínanɛ: Ma dikiri kína, à mana gbɛ̃da gɛ̀ dí gɔ̃ n sɔ̃sɔ̃ro. Ǹ tó mà gɛ́ mà a mì zɔ̃.

¹⁰ Akũ kína pì: Zeruya nɛ́nɔ, bɔ́ mɛ́ à ó kakaraa? Tó Dikiri mɛ́ à ònɛ à ma sɔ̃sɔ̃, akũ àtɛni ma sɔ̃sɔ̃, dí mɛ́ ani fɔ̃ à a la à pi, bɔ́yãi àtɛn kɛ lɛɛ?

¹¹ Akũ Dauda ò Abisainɛ kũ a ìbanɔ ń pínki à pì: À gwa, ma zĩda nɛ́'ina mɛ́ àtɛn wɛtɛ à ma dɛ. Oni Biliaminu buri díkĩna pɔ́ o dɔ yá? À a tó gwe. Tó Dikiri mɛ́ à pìnɛ à ma sɔ̃sɔ̃, à manamɛ.

¹² Òdigɔ̃ dɔ̃ro ke Dikiri ni ma wari dɔ̃ à fĩna bomɛnɛ kũ yã manao sɔ̃sɔ̃ kũ òtɛn kɛmɛnɛ gbãra yãi.

¹³ Kũ Dauda tɛ́ zɛ́n kũ a gbɛ̃nɔ, Simɛi tɛ́ sĩ̀sĩ pãnde kpadoi, àtɛni a sɔ̃sɔ̃ àtɛni gbɛ̀ zuzui àtɛn bùsu fã.

¹⁴ Kũ kína kũ a gbɛ̃ kũ ò kú kãaonɔ kà swai, ò kpàsa, akũ ò kámma bò gwe.

Abusalomu kana Yurusalɛmu

¹⁵ Abusalomu kà Yurusalɛmu kũ Isarailanɔ ń pínki. Aitofɛli kú kãao.

¹⁶ Akũ Dauda gbɛ̃nna Usai, Aki gbɛ̃ gɛ̀ɛ à Abusalomu lè à pìnɛ: Luda n dɔ̃ kũ aafiaao Zaaki! Luda n dɔ̃ kũ aafiaao Zaaki!

¹⁷ Abusalomu a là à pì: Gbɛ̃kɛ kũ ń vĩ kũ n gbɛ̃nnaon gwe yá? Bɔ́yãi ńdi gɛ́ kũ n gbɛ̃nnaoroo?

¹⁸ Usai wèa à pì: Lɛnlo! Gbɛ̃ kũ Dikiri kũ gbɛ̃ díkĩnanɔ sɛ̀ pɔ́n ma ũ. Ma zɛ kũ kína kũ Isarailanɔ kàa pìio.

¹⁹ Abire gbɛra dɔ, dí mɛ́ à mana mà zɔ̀ blenɛ, n baasii? Lákũ ma zɔ̀ɔ blè n denɛ nà, lɛn mà blennɛ lɛ.

²⁰ Abusalomu pì Aitofɛlinɛ: À lɛ́ dawá. Bɔ́n óni kɛɛ?

²¹ Akũ Aitofɛli wèa à pì: Ǹ gɛ́ ǹ wútɛ kũ n de nɔ yìgisaride kũ à ń tó la òtɛn bɛ gwanɔo, de Isarailanɔ le ò dɔ̃ ń pínki kũ n tò n de ye n kãiro, gbɛ̃ kũ ò kú kũnwonɔ gbãna ni kara.

²² Akũ ò bizakuta dɔ̀ Abusalomunɛ kpɛ́ musu, akũ à gɛ̀ɛ à wùtɛ kũ a de nɔ pìnɔ gwe Isarailanɔ pínki wára.

²³ Gɔrɔ birenɔa lɛ́ kũ Aitofɛli dì daḿma de lán gbɛ̃ kũ à yã gbɛ̀ka Ludaa yã bàmɛ. Lɛn Aitofɛli lɛ́damma de lɛ Daudanɛ kũ Abusalomuo ń pínki.

« Previous