Online Bible

2 SAMUƐLI 13 - Bisã Bible 2005

Aminɔ yena a dãre Tamai

¹ Abire gbɛra Dauda nɛ́ Abusalomu dãre mana vĩ, a tɔ́n Tama, akũ Dauda nɛ́ Aminɔ yei.

² Yã pì tɛn wari dɔ Aminɔ pìia ari à kà gyãkɛna a dãre Tama pì yãi, zaakũ à gɔ̃gbɛ̃ dɔ̃ro, ani fɔ̃ à yãke kɛnɛro.

³ Aminɔ gbɛ̃nna ke vĩ, a tɔ́n Yonadabu, Dauda vĩ̀ni Simɛa nɛ́mɛ. Yonadabu ɔ̃ndɔ̃ gbãna,

⁴ akũ à Aminɔ là à pì: À kɛ̀ dera n kínɛ'ina n mɛ̀ɛ dìgɔ̃ yɔna lákũ gu dìgɔ̃ dɔ nà lɛɛ? Ĩni omɛnɛroo? Akũ Aminɔ wèa à pì: Má ye ma dakũna Abusalomu dãre Tamaimɛ.

⁵ Akũ Yonadabu pìnɛ: Ǹ gɛ́ ǹ wútɛ n gádoa lákũ gyãren n ũ bà. Tó n de sù n gwa, ǹ onɛ ń ye n dãre Tama su à pɔ́ble kpámma. À su à kɛkɛ n wára de ǹgɔ̃ e, gbasa à nannɛ n ɔĩ.

⁶ Akũ Aminɔ wùtɛ lán gyãre bà. Kũ kína sù a gwa, akũ à pìnɛ: Ǹ tó ma dãre Tama su à kàra kɛmɛnɛ ma wára, à namɛnɛ ma ɔĩ.

⁷ Akũ Dauda gbɛ̃ zĩ̀ Tamaa a bɛa à pì: Ǹ gɛ́ n vĩ̀ni Aminɔ kpɛ́n ǹ pɔ́ble kɛnɛ.

⁸ Kũ Tama gɛ̃̀ a kpɛ́n, à a lè wutɛna, akũ à wísiti yà à kàraa kàsao a wára.

⁹ Akũ à ta sɛ̀ à kàraa pìi kànnɛ. Aminɔ gì sói à pì: Ǹ pɛ́ gbɛ̃nɔa ò bɔtɛ ń pínki. Kũ gbɛ̃ kũ ò kú kãaonɔ bɔ̀tɛ ń pínki,

¹⁰ akũ à pì Tamanɛ: Ǹ su kũ pɔ́ble pìio kpɛ́nɛ gũn la ǹ namɛnɛ ma ɔ̃i. Akũ Tama kàra kũ à kɛ̀ɛ sɛ̀ à gɛ̃̀o a vĩ̀ni Aminɔ pì kĩnaa kpɛ́nɛ gũn.

¹¹ Kũ à nài, àtɛn su kpáa à só, akũ à a dãre pìi kũ̀ à pì: Ǹ tó mà wútɛ kũnwo.

¹² Akũ à pì a vĩ̀ni pìinɛ: Oi! Ǹsun gbãna mɔmɛnɛro. Zaakũ ó Isarailanɔ odì yã dí taka kɛro. Ǹsun yã dɔ̀rɔsari bire taka kɛmɛnɛro.

¹³ Makũ, mán mani gɛ̃n kũ wé'iyã dioo? Mɔkɔ̃n sɔ̃, Isarailanɔ ni n ditɛ gbɛ̃ pã ũ. Ǹ sùru kɛ! Ǹ a yã o kínanɛ, ani gí ma kpámmairo.

¹⁴ Adi we à a yã màro. À gbãna mɔ̀nɛ, akũ à kùsia à wùtɛ kãao.

¹⁵ Akũ Aminɔ zã̀agu pãsĩpãsĩ. Zãngu kũ à sɛ̀ kũ Tama pìio de yenyĩ kũ à vĩ kãao yãla. Akũ à pìnɛ: Ǹ futɛ ǹ bo.

¹⁶ Akũ nɔgbɛ̃ pìi pì a vĩ̀ni pìinɛ: Oi! N pɛnama taari zɔ̃kɔ̃ de pɔ́ kũ n kɛ̀mɛnɛla. Kũ abireo adi we à a yã màro.

¹⁷ Akũ Aminɔ a zĩkɛri kɛfɛnna sìsi à pì: Ǹ pɛ́ nɔgbɛ̃ díkĩnaa à bomɛnɛ ma kpɛ́n, ǹ gbà ta ǹ a mɔ̀nɛ dan.

¹⁸ Akũ a zĩkɛrii pì a sɛ̀ à bò kãao bàai, à gbàa tà à a mɔ̀nɛ dàn. Nɔgbɛ̃ pìi uta gbã̀na dana, zaakũ uta bire takan kína nɛ́nɔkpare lésinɔ dìgɔ̃ dana.

¹⁹ Akũ Tama túbu gbɛ̃̀ a mìia, à a uta gbã̀na kũ à danaa pìi gà à kɛ̃̀ à ɔ dì a musu, àtɛn ɔ́ɔ dɔ àtɛn tá.

²⁰ A dãgɔ̃ dadokɔ̃nɔde Abusalomu pìnɛ: N dãgɔ̃ Aminɔ wùtɛ kũnwon yá? Ǹsun o gbɛ̃ke maro, zaakũ n dãgɔ̃mɛ. Ǹsungɔ̃ yã pì kũna n swɛ̃̀ɛ gũnlo. Akũ Tama vùtɛ a dãgɔ̃ Abusalomu bɛa kũ pɔyakao.

²¹ Kũ kína Dauda yã pìi mà, a pɔ fɛ̃̀ manamana.

²² Abusalomu dí yãke o Aminɔnɛro, yã vãni ke a mana. A zã̀agu, kũ à kùsi a dãre Tamaa yãi.

Abusalomu Aminɔ dɛnaa

²³ Wɛ̃̀ pla gbɛra Abusalomu kú Baali Azo, Ɛflaimu bùsu lɛ́n kũ a sãkãkɛ̃rɛrinɔ, akũ à kína nɛ́nɔ sìsi pɔnna pɔ́blea ń pínki.

²⁴ Akũ à gɛ̀ɛ à kína lè à pì: Kína, òtɛni makũ n zɔ̀bleri sãnɔ kã zɔ̃zɔ̃. Mɔkɔ̃n kũ n ìbanɔ áni gɛ́ kũmaoroo?

²⁵ Akũ kína wè a nɛ́ pìia à pì: Oi! Óni fɔ̃ ò gɛ́ ó pínkiro. Óni kɛnnɛ aso ũ. À nàkara kãao, ama adi gɛ́ro, akũ à sa mana ònɛ.

²⁶ Akũ Abusalomu pì: Tó ĩni gɛ́ro, ǹ tó ma vĩ̀ni Aminɔ gɛ́ kũoo. Kína a là à pì: Bɔ́yãi ń ye à gɛ́ kũnwoo?

²⁷ Abusalomu nàkara kãao, akũ kína tò Aminɔ gɛ̀ɛ kãao kũ a nɛ́ kparanɔ ń pínki.

²⁸ Abusalomu yã dìtɛ a gbɛ̃nɔnɛ à pì: À sã kpá! Tó í Aminɔ kũ̀, tó ma òárɛ à a zɔ̃, à a dɛ. Àsun tó vĩna á kũro. Makũ mɛ́ ma á dán! À zɛ gbãna à gɔ̃gbɛ̃kɛ kɛ.

²⁹ Abusalomu gbɛ̃nɔ kɛ̀ lákũ à òńnɛ nà ò a dɛ̀, akũ kína nɛ́ kparanɔ fùtɛ ò dì ń baragbãsɔ̃nɔ kpɛ ò bàa lɛ̀.

³⁰ Gɔrɔ kũ ò kú zɛ́n, Dauda a baaruu mà ò pì: Abusalomu kína nɛ́nɔ dɛ̀dɛ ń pínki, ń gbɛ̃ke dí gɔ̃ro.

³¹ Dauda fùtɛ à a pɔ́kasanɔ gà à kɛ̃̀, akũ à wùtɛ zĩtɛ. A ìbanɔ zɛi kũ ń pɔ́kasanɔ kɛ̃kɛ̃na.

³² Akũ Dauda vĩ̀ni Simɛa nɛ́ Yonadabu pì: Baa, ǹsungɔ̃ da ò n nɛ́ kɛfɛnnanɔ dɛ̀dɛ ń pínkiro, Aminɔ mɛ́ à gà ado. Ò yã pìi dɔ̃̀ Abusalomu wɛ́a zaa gɔrɔ kũ Aminɔ kùsi a dãre Tamaamɛ.

³³ Ma dikiri kína, ǹsungɔ̃ yã pì kũna n nɛ̀sɛɛ gũnlo. N nɛ́gɔ̃gbɛ̃nɔ dí gaga ń pínkiro, séde Aminɔ ado.

³⁴ Abusalomu sɔ̃ à bàa lɛ̀. Kũ kɛfɛnna gudãkpãri wɛ́ zù, à è ò tɛ́ Oronaimu zɛ́n sĩ̀sĩgɛrɛɛi dasidasi. À gɛ̀ɛ à pì kínanɛ: Ma gbɛ̃nɔ è tɛ́ sĩ̀sĩgɛrɛɛi Oronaimu kpa.

³⁵ Akũ Yonadabu pì kínanɛ: N è yá? N nɛ́nɔ mɛ́ òtɛn su gwe lákũ ma ònnɛ nà.

³⁶ Kũ à yã pìi ò à làka, akũ kína nɛ́ pìnɔ kà gɔ̃̀nɔ, òtɛn wɛ̃nda ɔ́ɔ dɔ. Kína kũ a ìbanɔ ɔ́ɔ dɔ̀ ń pínki manamana dɔ.

³⁷ Abusalomu bàa lɛ̀ à tà Amiudu nɛ́ Talamai, Gesuru kína kĩnaa. Kína Dauda sɔ̃ àdigɔ̃ a nɛ́ gana ɔ́ɔ dɔ gɔrɔ sĩnda pínki.

³⁸ Kũ Abusalomu bàa lɛ̀ à tà Gesuru, à kú gwe ari wɛ̃̀ aakɔ̃.

³⁹ Kũ kína Dauda nɛ̀sɛɛ kpàtɛ Aminɔ gana yã musu, akũ àtɛn Abusalomu bɛgɛ kɛ sà.

« Previous