2 SAMUƐLI 10 - Bisã Bible 2005

Dauda zĩ̀blena Amɔninɔa

¹ Abire gbɛra Amɔni kína gà, akũ a nɛ́ Anuni vùtɛ a gɛ̃nɛ ũ.

² Dauda pì: Mani gbɛ̃kɛ kɛ Naasa nɛ́ Anuninɛ lákũ a de gbɛ̃kɛ kɛ̀mɛnɛ yã nà. Akũ Dauda a ìba kenɔ zĩ̀a, de ò gɛ́ Amɔninɔ bùsun ò a laakari kpátɛnɛ a de gana yã musu. Kũ Dauda ìbaa pìnɔ kà gwe,

³ Amɔni kínɛnɔ pì ń dikiri Anuninɛ: Ntɛn da Dauda gbɛ̃nɔ zĩ̀mma n de gɛ̀ kpetana yãi de à n laakari kpátɛnnɛn yá? À ń zĩ de ò su ó wɛ̃tɛ asiri gwamɛ, de ò ɛra ò su ò wɛ̃tɛ ble kũ zĩ̀io.

⁴ Akũ Anuni Dauda ìbaa pìnɔ kũ̀kũ à ń lɛ́kãsã kpadonɔ bò, à ń pɔ́kasanɔ zɔ̃̀zɔ̃ ń pɔ̀rɔnɔ dagura, akũ à ń gbárɛ.

⁵ Kũ ò ò Daudanɛ, akũ à gbɛ̃nɔ zĩ̀ ò gɛ́ dańlɛ, zaakũ wé'i ń kũ manamana. Ò pìńnɛ: Kína pì, à vutɛ Yɛriko ari á lɛ́kãsã kã kú gbasa à su.

⁶ Kũ Amɔninɔ è Dauda ye ń kãi doro, akũ ò fĩna bò gbɛ̃nɔnɛ de ò zĩ̀ káńnɛ: Siria kũ ò kú Bɛtɛreobu kũ Zobao kũ ò tɛ́ gɛ̀sɛnɔ gbɛ̃nɔn dúbu baro kũ kína Maaka zĩ̀karinɔ gbɛ̃nɔn wàa sɔɔro kũ Tobudenɔ gbɛ̃nɔn dúbu kuri awɛɛpla.

⁷ Kũ Dauda a baaruu mà, akũ à Yoabu gbàrɛḿma kũ zĩ̀karinɔ ń pínki.

⁸ Amɔninɔ bò ò zĩ̀'ɔ pòro ń wɛ̃tɛ bĩnilɛa, akũ Zoba kũ Bɛtɛreobuo Sirianɔ kũ Tobudenɔ kũ Maaka gbɛ̃nɔn kú sɛ̃̀n ńtɛ̃nɛ.

⁹ Kũ Yoabu è ò zĩ̀'ɔ pòro a arɛ kũ a kpɛo, akũ à Isaraila zĩ̀kari mananɔ sɛ̀ à ń kpaatɛtɛ ò gɛ́ lɛ́tɛ Sirianɔa.

¹⁰ Akũ à zĩ̀kari kparanɔ nà a dakũna Abisainɛ a ɔĩ, akũ à ń gbárɛ ò gɛ́ lɛ́tɛ Amɔninɔa.

¹¹ À pì: Tó Sirianɔ gbãna tɛni ma fu, ǹ mɔ́ ǹ ɔ dama. Tó Amɔninɔ gbãna tɛni n fumɛ sɔ̃, mani su mà ɔ damma.

¹² Ǹgɔ̃ gbãna, ò gɔ̃gbɛ̃kɛ kɛ ó gbɛ̃nɔ kũ ó Dikiri wɛ̃tɛnɔ yã musu. Dikiri ni yã kũ à kɛ̀arɛ mana kɛ.

¹³ Akũ Yoabu kũ zĩ̀kari kũ ò kú kãaonɔ gɛ̀ɛ Sirianɔa kũ zĩ̀io, akũ Siria pìnɔ bàa lɛ̀ńnɛ.

¹⁴ Kũ Amɔninɔ è Sirianɔ bàa lɛ̀, akũ ò bàa lɛ̀ Abisainɛ se ò sì wɛ̃tɛ gũn, akũ Yoabu ń tó gwe à tà Yurusalɛmu.

¹⁵ Kũ Sirianɔ è Isarailanɔ zĩ̀i blèḿma, akũ ò ɛ̀ra ò kɔ̃ kàkara.

¹⁶ Akũ Adadɛza gbɛ̃nɔ zĩ̀, ò sù kũ Siria kũ ò kú Yuflati bara direnɔ, akũ ò gɛ̀ɛ Elamu. Sobakimɛ Adadɛza zĩ̀karii pìnɔ gbɛ̃ zɔ̃kɔ̃ ũ.

¹⁷ Kũ Dauda a baaruu mà, akũ à Isarailanɔ kàkara ń pínki, à bikũ̀ kũńwo Yodaa à gɛ̀ɛ Elamu. Akũ Sirianɔ zĩ̀'ɔ pòroi, akũ ò sì kɔ̃ tɛ́.

¹⁸ Kũ òtɛn bàa lɛ́ Isarailanɔnɛ, akũ Dauda ń dɛdɛ sɔ̃godenɔ gbɛ̃nɔn wàa aakɔ̃ kpɛ́ basɔɔro kũ gbɛ̃ kũ ò tɛ́ gɛ̀sɛnɔ gbɛ̃nɔn dúbu bupla. Gwen ò ń zĩ̀karinɔ gbɛ̃ zɔ̃kɔ̃ Sobaki dɛ̀n.

¹⁹ Kũ kína kũ ò de Adadɛza zɔ̀blerinɔ ũ è Isarailanɔ zĩ̀i blèḿma lɛ, akũ ò lɛ́dokɔ̃nɔ kɛ̀ kũ Isarailanɔ ò gɔ̃̀ ń zɔ̀blerinɔ ũ. Vĩna Sirianɔ kũ̀, odi gɛ́ ò ɔ da Amɔninɔa doro.