1 TƐSALONIKADENƆ 2 - Bisã Bible 2005

Pɔlu zĩkɛna Tɛsalonika

¹ Ma gbɛ̃nɔ, á dɔ̃ kũ á zĩdao, kũ ó zɛ́ lena á kĩnaa dí kɛ pãro.

² Á dɔ̃ lákũ ò wɛ́ tã̀wá nà, o wari kɛ̀ káaku zaa Filipi, akũ Luda ó gbá swɛ̃̀ɛ, o a baaru nna kpàárɛ kokari kũ kokario.

³ Ó nakaranaáwa de ɛ́kɛ zɛ́ yã ũro. Ódi kɛ laasun vãni ke á takikɛna yãinlo.

⁴ Lákũ Luda ó ká a baaru nna kpanaaa nà, lɛn odì kpáńnɛ lɛ, adi kɛ bisãsiri pɔyeinan ótɛn wɛtɛro, sé Luda ó laasun tàasikɛri pɔ́.

⁵ Á dɔ̃ kũ ódi yã nnanna o gbɛ̃kenɛro, akũsɔ̃ ódi yãke kɛ kũ manafikio wãkũ yãiro. Ludan ó sèedade ũ.

⁶ Ódi sáabu wɛtɛ bisãsiri kĩnaaro, ákɔ̃nɔ ke gbɛ̃ pãndenɔ.

⁷ Bee kũ ó a zɛ́ vĩ ò gɔ̃árɛ aso ũ ó Kirisi zĩ̀rikɛna yãi, o kɛ̀ kãáo busɛbusɛ, lákũ nɔgbɛ̃ nɛ́rande dì laakari dɔ a nɛ́a nà.

⁸ Kũ ó yeái manamana yãi, ódi zɛo ò baaru nna kũ à bò Luda kĩnaa kpáárɛ adoro, kũ ó zĩda kpááwanaaomɛ dɔ, zaakũ a gɔ̃ ó gbɛ̃ yenyĩdenɔ ũ.

⁹ Ma gbɛ̃nɔ, à tó ó zĩkɛna kũ wario yã dɔágu. Gɔrɔ kũ ótɛn baaru nna kũ à bò Luda kĩnaa pì kpáárɛ, odìgɔ̃ zĩ kɛ fãnantɛ̃ kũ gwãanio, de òsun gɔ̃ á gbɛ̃kenɛ aso ũro yãi.

¹⁰ Ákɔ̃nɔmɛ ó sèedadenɔ ũ, kũ Ludao dɔ, kũ ó kú ákɔ̃nɔ kũ a Yesu náani kɛ̀nɔ tɛ́ a zɛ́a nɛ̀sɛpuradenɔ ũ taari sari.

¹¹ Á dɔ̃ kũ o yã kɛ̀ á baadinɛ lákũ de dì kɛ a nɛ́nɔnɛ nà.

¹² O lɛ́ dàáwa, o á nɛ̀sɛɛ kpàtɛárɛ, o nakaraáwa, de á kunna kɛ lɛɛlɛ kũ gbɛ̃ kũ Luda ń ká kpata gakuride kũ à bò a kĩnaannɔo.

¹³ Kũ a Luda yã kũ o òárɛ pìi mà, ádi ditɛ bisãsiri pɔ́ ũro, a sì lákũ à de nà, Luda yã yãpura ũ. Àkũ mɛ́ àtɛn zĩ kɛ ákɔ̃nɔ kũ átɛni a náani kɛnɔ gũn. Abire yãi dɔ odìgɔ̃ Luda sáabu kpá lakanaa sari.

¹⁴ Ó gbɛ̃nɔ, á yã kɛ̀ lɛɛlɛ kũ Luda gbɛ̃ kũ ò kú Kirisi Yesu gũn zaa Yudeanɔo, zaakũ á bùsudenɔ wɛ́ tã̀áwa se lákũ Yudanɔ tã̀ḿma nà.

¹⁵ Yudanɔ Dikiri Yesu dɛ̀ kũ annabinɔ dɔ, akũsɔ̃ ò pɛ̀wá. Ń yã dì ká Luda guro, ò ibɛrɛɛ sɛ̀ kũ gbɛ̃ sĩnda pínkio.

¹⁶ Òdi kpáwɛrɛ ò yã kũ Luda dì gbɛ̃ sura bao o buri pãndenɔnɛ. Lɛn durunna kũ òdigɔ̃ kɛ gɔrɔ sĩnda pínki dìgɔ̃ didikɔ̃a lɛ. Luda pɔfɛ̃ kìpa ń musu sà.

Timɔti zĩna Tɛsalonika

¹⁷ Ó gbɛ̃nɔ, kũ o kɛ̃kɔ̃a gɔrɔ pla, wɛ́ mɛ́ adi kɔ̃ ero, ama ó laasun kúáwa. O á bɛgɛ kɛ̀ manamana, o mɛ̀ɛ wã̀ kũ ò wɛ́ sikɔ̃lɛ.

¹⁸ Ó ye ò su á gwa dɔ. Makũ Pɔlu ma suna zɛ́ wɛ̀tɛ à de gɛ̃̀n do ke gɛ̃̀n plala, akũ Setan kpàwɛrɛ.

¹⁹ Tó ó Dikiri Yesu sù, dí mɛ́ anigɔ̃ de ó tãmaa kũ ó pɔnnao kũ ó gã̀zubɔɔo ũ a arɛ á baasii?

²⁰ Zaakũ ákɔ̃nɔmɛ ó gakuri kũ ó pɔnnao ũ.