Online Bible

1 SAMUƐLI 9 - Bisã Bible 2005

Samuɛli kɔ̃'ena kũ Soluo

¹ Biliaminu buri ke kun, a tɔ́n Kisi. Aruzɛkɛdemɛ. Biliaminu buri mɛ́ à Afia ì, Afia Bekora ì, Bekora Zero ì, Zero Abiɛli ì, akũ Abiɛli Kisi pìi ì.

² À nɛ́gɔ̃gbɛ̃ vĩ, a tɔ́n Solu. Kɛfɛnna manamɛ. A mana sára kú Isarailanɔ tɛ́ro, ń gbɛ̃ke gbã̀na dí vĩ a gã̀nlaro.

³ Kũ Kisi pì zaakinɔ sã̀tɛ, akũ à pì a nɛ́ pìinɛ: Ǹ futɛ ǹ zĩkɛrinɔ doke sɛ́ à gɛ́ zaaki pìnɔ wɛtɛ.

⁴ Akũ ò Ɛflaimu bùsu gusĩsĩde pàra kũ Salisa bùsuuo, odi ń lero. Akũ ò Salimu bùsuu pàra, ama ò kú gwero. Akũ ò Biliaminu bùsuu pàra, odi zaaki pìnɔ lero.

⁵ Kũ ò kà Zufu bùsun, Solu pì zĩkɛri kũ ò lɛɛlɛ pìinɛ: Ǹ mɔ́ ò ɛra. Tó ódi táro, ma mare ni damu kɛ ó yã musu, ani zaakinɔ yã da doro.

⁶ Akũ à wèa: Ǹ ma! Luda gbɛ̃ke kú wɛ̃tɛ dí gũn. À bɛ̀ɛrɛ vĩ, yã kũ à pì ani kɛ, àdi kɛmɛ. Ò gɛ́ gwe. Ke ani zɛ́ kũ óni sɛ́ ò ó zaaki pìnɔ leo owɛrɛ gwɛɛ.

⁷ Akũ Solu wèa à pì: Tó ótɛn gɛ́, bɔ́n óni gɛ́onɛɛ? Pɔ́ble ke dí gɔ̃ ó bɔ̀kɔn doro. Ó pɔ́ke vĩ ò Luda gbɛ̃ pì gbaro. Ke bɔ́n ó vĩi?

⁸ Akũ zĩkɛrii pìi ɛ̀ra à pì Solunɛ: Ǹ gwa! Má ɔgɔ vĩ fítinle la. Mani a gba, ani ó da zɛ́ kũ à de ò sɛ́a.

⁹ Isarailanɔ bùsun yã, tó gbɛ̃ tɛn gɛ́ yã gbɛka Ludaa àdi pi: Ǹ mɔ́ ò gɛ́ wɛ́gupu'eri kĩnaa. Zaakũ gbɛ̃ kũ òdi pi gbãra annabi ũ gbãra, àkũmɛ òdi sísi yã wɛ́gupu'eri ũ.

¹⁰ Akũ Solu pì a zĩkɛriinɛ: N yã mana ò. Ò gɛ́. Akũ òtɛn gɛ́ wɛ̃tɛ kũ Luda gbɛ̃ pì kunwa.

¹¹ Kũ òtɛn wɛ̃tɛ pìi sĩ̀sĩ kũ, ò dàkarɛ kũ nɔkparenɔ, òtɛn gɛ́ í tɔ́. Akũ ò ń lá ò pì: Wɛ́gupu'eri kú bɛ yá?

¹² Ò wèḿma ò pì: Ee, à kú arɛ gwe. À kɛ likalika. Gbãran à sù, zaakũ ò ye ò sa o gbagbakiamɛ.

¹³ Tó a gɛ̃ wɛ̃tɛn, áni a e ari àgɔ̃ gɛ́ pɔ́ ble gbagbaki pìia. Zaakũ oni pɔ́ ble gĩaro ari à su, àkũ mɛ́ ani arubarika da sa'opɔblen gĩa, gbasa gbɛ̃ kũ ò ń sísinɔ pɔ́ ble. Àgɔ̃ wãna, zaakũ a lenagɔrɔn dí.

¹⁴ Kũ ò gɛ̃̀ wɛ̃tɛ pìi gũn, akũ ò dàkarɛ kũ Samuɛlio gɔ̃̀nɔ, à bò àtɛn gɛ́ gbagbaki pìia.

¹⁵ Ari Solu gɔ̃ gɛ́ su, Dikiri gĩnakɛ à yã dí dà Samuɛlinɛ a sãn à pì:

¹⁶ Zia mandara'i mani Biliaminu bùsu gbɛ̃ zĩmma. Ǹ nísi kúa ǹ a ditɛ ma gbɛ̃ Isarailanɔ don'arɛde ũ. Ani ma gbɛ̃ pìnɔ bo Filisitininɔ ɔĩ. Ma a gbɛ̃ pìnɔ wiki mà, akũ ma ń wɛ̃nda gwà.

¹⁷ Kũ Samuɛli Solu è, Dikiri pìnɛ: Gbɛ̃ kũ ma a yã ònnɛ pìin gwe. Àkũ mɛ́ ani kí ble ma gbɛ̃nɔa.

¹⁸ Akũ Solu nà Samuɛlii wɛ̃tɛ bĩnilɛa à a là à pì: Wɛ́gupu'eri bɛ kú mámɛɛ? Ǹ mɔmɛnɛ.

¹⁹ Akũ Samuɛli wèa à pì: Makũmɛ ade pì ũ. Ǹ domɛnɛ arɛ ò gɛ́ gbagbakia, ĩni pɔ́ ble kũmao gbãra. Zia kɔnkɔ mani n nɛ̀sɛgũnyã onnɛ pínki, gbasa mà n gbarɛ.

²⁰ Ǹsun n zaaki kũ ò sã̀tɛ zaa gɔrɔ aakɔ̃ damu kɛro, zaakũ ò ń lé. Dín Isarailanɔn yei ń pínkii, tó adi kɛ mɔkɔ̃n kũ n de bedenɔ baasiro?

²¹ Akũ Solu pì: Biliaminu burin ma ũroo? Ma buri mɛ́ à fíti de Isaraila burinɔla ń pínki, akũ ma danɛnɔ mɛ́ ò kĩ̀ańyĩ Biliaminu burinɔ tɛ́. Bɔ́yãi ntɛn yã dí taka omɛnɛɛ?

²² Akũ Samuɛli Solu kũ a zĩkɛriioo sɛ̀ à gɛ̃̀ kũńwo pɔ́blekpɛn, à vutɛki mana kpàḿma gbɛ̃ kũ ò ń sísinɔ tɛ́. Gbɛ̃ pìnɔ kà gbɛ̃nɔn baraakuri taka bà.

²³ Akũ Samuɛli pì pɔ́blekɛriinɛ: Ǹ nɔ̀bɔ kũ ma kpàmma ma pì ǹ a ditɛki kɛ pì sɛ́ ǹ mɔ́o.

²⁴ Akũ pɔ́blekɛrii pìi sù kũ nɔ̀bɔ gbá pìio à dìtɛ Solu arɛ. Akũ Samuɛli pì: Pɔ́ kũ ò dìtɛnnɛn dí. Ǹ só, zaakũ ò dìtɛnnɛ ari mandara'i kũ gbɛ̃ kũ ma ń sísinɔ. Akũ Solu pɔ́ blè kũ Samuɛlio zĩ birea.

²⁵ Kũ ò kìpa gbagbaki pìia, ò gɛ̃̀ wɛ̃tɛ gũn, akũ Samuɛli gɛ̀ɛ à yã ò kũ Soluo a kpɛ́ musu.

²⁶ Akũ ò ì gwe. Kũ gu ye à dɔ, akũ Samuɛli lɛ́ zù Solui kpɛ́ musu gwe à pì: Ǹ futɛ, mà gɛ́ zɛnnɛ. Kũ Solu fùtɛ, àkũ kũ Samuɛlio ò bò bàai ń pla.

²⁷ Kũ ò kà wɛ̃tɛ kpɛ, akũ Samuɛli pì Solunɛ: Ǹ o n zĩkɛriinɛ àgɔ̃ gɛ́, mɔkɔ̃n ǹ zɛ gĩa de mà yã kũ Dikiri ò onnɛ.

« Previous