Online Bible

1 SAMUƐLI 8 - Bisã Bible 2005

Isarailanɔ kína gbɛkanaa

¹ Kũ Samuɛli zĩ kũ̀, à a nɛ́nɔ dìtɛ Isarailanɔnɛ don'arɛdenɔ ũ.

² A daudu tɔ́n Yoɛli, a plade Abia. Mɔ́kɔ̃nɔ mɛ́ òdi yã gɔ̃gɔ̃ńnɛ Bɛsɛba.

³ Ama a nɛ́ pìnɔ dí tɛ́ a ágbairo. Ɔgɔyã ń swɛ̃̀ɛ blè, òdi gusarɛgba sí, òdi yã gɔ̃gɔ̃ a zɛ́aro.

⁴ Akũ Isaraila gbɛ̃ zɔ̃kɔ̃nɔ kɔ̃ kàkara, ò gɛ̀ɛ ò Samuɛli lè Rama

⁵ ò pì: Ǹ gwa, n zĩ kũ̀, akũ n nɛ́nɔn tɛ́ n ágbairo. Ǹ kína ditɛwɛrɛ sà de àgɔ̃ de ó don'arɛde ũ, lán buri sĩnda pínki a pɔ́ vĩ nà.

⁶ Kũ ò pì à kína káńnɛ àgɔ̃ de ń don'arɛde ũ, yã pì dí kɛ Samuɛlinɛ nnaro, akũ à wɛ́ kɛ̀ Dikiria.

⁷ Akũ Dikiri pì Samuɛlinɛ: Ǹ gbɛ̃ pìnɔ yã ma, zaakũ mɔkɔ̃mmɛ ò gìnyĩro. Makũmɛ ò gìmai de màsun kí bleḿmaro yãi.

⁸ Lákũ òtɛn kɛ nà zaa gɔrɔ kũ ma ń bɔtɛ Misila ari gbãra, ò pã kpàmai ò dò tãnanɔi, lɛn òtɛn kɛnnɛ lɛ dɔ.

⁹ Ǹ ń yã ma sà, ǹ lɛ́ daḿma ǹ tó ògɔ̃ dɔ̃ lákũ gbɛ̃ kũ ani kí bleḿma yãnɔ nigɔ̃ de nà.

¹⁰ Akũ Samuɛli Dikiri yã pìi bàba gbɛ̃ kũ òtɛn kína gbɛkaanɔnɛ pínki

¹¹ à pì: Lákũ gbɛ̃ kũ ani kí bleáwa yãnɔ nigɔ̃ de nàn dí. Ani á nɛ́gɔ̃gbɛ̃nɔ sí à ń ditɛ a sɔ̃godenɔ kũ a sɔ̃denɔ ũmɛ. Onigɔ̃ táa o a sɔ̃go arɛ kũ bàao.

¹² Ani ń ditɛ gbɛ̃nɔn wàa sɔsɔɔro ke gbɛ̃nɔn bupla akurikurinɔ gbɛ̃ zɔ̃kɔ̃nɔ ũ. Onigɔ̃ a bú wínɛ, onigɔ̃ a pɔ́nɔ kɛkɛnɛ, onigɔ̃ a zĩ̀kabɔnɔ pinɛ kũ a sɔ̃go pɔ́nɔ.

¹³ Ani á nɛ́nɔgbɛ̃nɔ sí à ń ditɛ nísigbĩnnakɛrinɔ kũ pɔ́blekɛrinɔ kũ burodikɛrinɔ ũ.

¹⁴ Ani á buranɔ kũ á geepi búnɔ kũ á kùkpɛ mananɔ síáwa à kpá a ìbanɔa.

¹⁵ Ani á pɔ́wɛnɔ kũ á geepi nɛ́nɔ lɛu kuride síáwa à kpá a bɛgwarinɔ kũ a ìbanɔa.

¹⁶ Ani á zɔ̀gɔ̃gbɛ̃nɔ kũ nɔgbɛ̃nɔ sí kũ á zù mananɔ kũ á zaakinɔ àgɔ̃ a zĩda zĩ kɛo.

¹⁷ Ani á pɔ́kãdenɔ lɛu kuride síáwa, ákɔ̃nɔ áni gɔ̃ a zɔ̀nɔ ũ.

¹⁸ Gɔrɔ birea sà áni wiki lɛ́ Dikiria gbɛ̃ kũ a sɛ̀ á kína ũ pì yãi, ama ani weáwa gɔrɔ birea doro.

¹⁹ Akũ ò gì Samuɛli yã mai ò pì: Oi! Ó ye ògɔ̃ kína vĩmɛ,

²⁰ ónigɔ̃ de lán buri kparanɔ bà se. Ó kína mɛ́ anigɔ̃ yã gɔ̃gɔ̃wɛrɛ, anigɔ̃ dowɛrɛ arɛ zĩ̀i gũn.

²¹ Kũ Samuɛli ń yã mà pínki, à gɛ̀ɛ à dà Dikirinɛ a sãn.

²² Akũ Dikiri pìnɛ: Ǹ ń yã ma, ǹ kína káńnɛ. Akũ Samuɛli pì Isaraila pìnɔnɛ: Á baadi tá a wɛ̃tɛa.

« Previous