1 SAMUƐLI 7 - Bisã Bible 2005

Samuɛli dona Isarailanɔnɛ arɛ

¹ Akũ Kiriayarimudenɔ sù ò Dikiri àkpatii pìi sɛ̀ ò tào Abinadabu bɛa sĩ̀sĩi musu. Akũ ò a nɛ́ Ɛlɛaza dìtɛ a dãkpãri ũ.

² Àkpatii pì kú Kiriayarimu à gìi kɛ̀, à kɛ̀ gwe wɛ̃̀ baro. Isarailanɔ tɛn wiki lɛ́ Dikiria ń pínki, òtɛni a ki wɛtɛ.

³ Akũ Samuɛli pì Isarailanɔnɛ ń pínki: Tó a arɛ dɔ̀ Dikiria kũ nɛ̀sɛ mɛ̀n doo, à buri zĩ̀tɔnɔ tãnanɔ kũ Asatorɛnɔ bɔtɛ á tɛ́, à á zĩda kpá Dikiria àgɔ̃ doi ado, ani á bo Filisitininɔ ɔĩ.

⁴ Akũ Isarailanɔ Baalinɔ kũ Asatorɛnɔ bɔ̀tɛ ń tɛ́, òtɛn do Dikirii ado.

⁵ Akũ Samuɛli pì: Ákɔ̃nɔ Isarailanɔ à kɔ̃ kakara Mizipa á pínki, mani kútɛ kɛárɛ Dikirinɛ.

⁶ Kũ ò kɔ̃ kàkara gwe, akũ ò í tɔ̀ ò kɔ̀tɛ Dikiri arɛ. Zĩ birea ò lɛ́ yĩ̀ ò pì: O durunna kɛ̀ Dikirinɛ. Akũ Samuɛli yã gɔ̃̀gɔ̃ Isarailanɔnɛ Mizipa gwe.

⁷ Kũ Filisitininɔ mà Isarailanɔ kɔ̃ kàkara Mizipa, akũ ń kínanɔ gɛ̀ɛ lɛ́tɛḿma. Kũ Isarailanɔ mà, vĩna ń kũ,

⁸ akũ ò ò Samuɛlinɛ: Ǹsungɔ̃ yĩtɛnaro! Ǹ wiki lɛ́ Dikiri ó Ludaa de à ó sí Filisitininɔa.

⁹ Akũ Samuɛli sãnɛ yɔ̃miri sɛ̀ à sa'opɔ kũ òdi ká tɛ́n à tɛ́ kũ ò Dikiria, akũ à wiki lɛ̀a Isarailanɔnɛ. Akũ Dikiri sì kãao.

¹⁰ Kũ Samuɛli tɛn sa pì o, Filisitininɔ tɛn su Isarailanɔa kũ zĩ̀io. Zĩ birea Dikiri tò legũ gbãna pàta Filisitininɔa. Swɛ̃̀ɛ kɛ̃̀ńgu ò lɛ̀kɔ̃a, akũ Isarailanɔ ń ásaru kɛ̀.

¹¹ Kũ Isarailanɔ bɔ̀tɛ Mizipa ò pɛ̀ Filisitininɔa, ò ń dɛdɛ ò ń kpá ari Bɛtɛka.

¹² Akũ Samuɛli gbɛ̀ɛ pɛ̀tɛ Mizipa kũ Sɛnio dagura à tɔ́ kpànɛ Ɛbɛnɛza, zaakũ à pì: Dikiri mɛ́ à kpàwái ari o ka la.

¹³ Lɛn ò Filisitininɔ fù lɛ, akũ odi fɔ̃ ò ɛ̀ra ò sùḿma kũ zĩ̀io ń bùsun doro. Dikiri ɔ tɔ̃̀ Filisitininɔa ari Samuɛli kunna gɔrɔ zakan.

¹⁴ Wɛ̃tɛ kũ Filisitininɔ sì Isarailanɔa yãnɔ ɛ̀ra à gɔ̃̀ ń pɔ́ ũ zaa Ɛkɛrɔnu ari à gɛ̀ɛ pɛ́ Gataa. Isarailanɔ wɛ̃tɛ pìnɔ kũ ń bùsunɔ sì Filisitininɔa pínki. Isarailanɔ kũ Amɔrinɔ sɔ̃ ò kú kũ kɔ̃o yãkete sari.

¹⁵ Samuɛli bi Isarailanɔ don'arɛdemɛ ari a kunna gɔrɔ zakan.

¹⁶ Wɛ̃̀ kũ wɛ̃̀ɛo àdigɔ̃ gɛ́ Bɛtɛli kũ Giligalao kũ Mizipao, àdi yã gɔ̃gɔ̃ Isarailanɔnɛ wɛ̃tɛ pìnɔ gũn.

¹⁷ Akũ àdi ɛra à tá Rama, zaakũ a bɛn gwe. Àdi yã gɔ̃gɔ̃ Isarailanɔnɛ gwe dɔ. Gwen à Dikiri gbagbaki bòn.