Online Bible

1 SAMUƐLI 4 - Bisã Bible 2005

Filisitininɔ Dikiri àkpati sinaa

¹ Isarailanɔ bɔ̀tɛ ò gɛ̀ɛ Filisitininɔa kũ zĩ̀io. Ò bùraa kàtɛ Ɛbɛnɛza, Filisitininɔ sɔ̃, Afɛki.

² Filisitininɔ zĩ̀'ɔ pòro ò gɛ̀ɛo Isarailanɔa. Kũ zĩ̀ gbãna kũ̀, akũ Filisitininɔ Isarailanɔ blè ò ń dɛdɛ zĩ̀lan gwe lán gbɛ̃nɔn wàa baro taka bà.

³ Kũ Isarailanɔ sù ń bùran, ń gbɛ̃ zɔ̃kɔ̃nɔ pì: Bɔ́yãi Dikiri tò Filisitininɔ ó blé kũ zĩ̀io gbãraa? Ò gɛ́ ò Dikiri bàka kunna kũoo àkpati sɛ́ Silo ò suo àgɔ̃ kú kũoo, de àgɔ̃ ó bo ó ibɛrɛnɔ ɔĩ.

⁴ Akũ ò gbɛ̃nɔ zĩ̀ Silo ò gɛ̀ɛ ò Dikiri bàka kunna kũńwo àkpatii sɛ̀ ò sùo. Àkũmɛ Dikiri Zĩ̀karide kíblegba ũ kɛrubunɔ dagura. Ɛli nɛ́ gbɛ̃nɔn planɔ Ɔfini kũ Finɛasio kú kũ àkpatii pìio gwe.

⁵ Kũ ò kao Isarailanɔ bùran, ò fùtɛ kũ pɔnna wikio ń pínki ari zĩtɛ yĩ̀gã.

⁶ Kũ Filisitininɔ wiki pìi mà, ò pì: Bɔ́ wiki gbãna mɛ́ à dɔ Eberunɔ bùran lɛɛ? Kũ ò dɔ̃̀ Dikiri àkpati mɛ́ à kìpa ń bùran,

⁷ vĩna ń kũ ò pì: Tãna ke kìpa ń bùrammɛ. Yã gì kũoo sà! Yã dí taka dí kɛ zikiro.

⁸ Yã gì kũoo! Dí mɛ́ ani ó bo tãna gbãnade pìnɔ ɔĩi? Tãna pìnɔ mɛ́ ò yã gàtɛ Misilanɔnɛ gbárannan.

⁹ Ókɔ̃nɔ Filisitininɔ ò swɛ̃̀ ditɛ ò gɔ̃gbɛ̃kɛ kɛ. Tó ódi kɛ lɛro, óni zɔ̀ ble Eberunɔnɛ lákũ òtɛn blewɛrɛ nà. Ò gɔ̃gbɛ̃kɛ kɛ ò zĩ̀ ká kũńwo.

¹⁰ Akũ Filisitininɔ fùtɛ Isarailanɔa kũ zĩ̀io ò ń fu, akũ ń baadi bàa lɛ̀ ò tà bɛ, zaakũ ń dɛdɛnaa kɛ̀ dasi. Filisitininɔ ń gbɛ̃ kũ ò tɛ́ gɛ̀sɛnɔ dɛ̀dɛ gbɛ̃nɔn dúbu baraakuri.

¹¹ Ò Luda àkpatii sì, akũ ò Ɛli nɛ́ gbɛ̃nɔn planɔ Ɔfini kũ Finɛasioo dɛ̀dɛ.

¹² Biliaminu buri gbɛ̃ke bò zĩ̀lan à bàa lɛ̀ à gɛ̀ɛ Silo zĩ pìia. À a pɔ́kasanɔ gà à kɛ̃̀kɛ̃ à bùsuu kù a mìia.

¹³ Kũ à kà, à Ɛli lè vutɛna gbàaa zɛ́ sarɛ, àtɛn gu dãkpã, zaakũ a laakari kpatɛnaro Luda àkpati yãi. Kũ gbɛ̃ pìi gɛ̃̀ wɛ̃tɛn, à baaruu kpà wɛ̃tɛdenɔnɛ, akũ òtɛn ɔ́ɔ dɔ ń pínki.

¹⁴ Kũ Ɛli wiki pìi mà à pì: Zuka dí bò máa? Akũ gbɛ̃ pìi kɛ̀ likalika à gɛ́ onɛ.

¹⁵ Ɛli zĩ kũ̀ à kà wɛ̃̀ basɔɔro plansari, a wɛ́ gɔ̃̀ dãadãa, adi gu e doro.

¹⁶ Akũ gbɛ̃ pìi pìnɛ: Teran ma bo zĩ̀lan, ma bo zaa gwe kũ bàao gbãramɛ. Akũ Ɛli a là à pì: Bɔ́ mɛ́ à kɛ̀ gwee, ma gbɛ̃?

¹⁷ Baarukparii pìi wèa à pì: Isarailanɔ bàa lɛ̀ Filisitininɔnɛ, akũ Filisitininɔ ń dɛdɛ dasidasi. N nɛ́ gbɛ̃nɔn planɔ Ɔfini kũ Finɛasio gà dɔ. Ò Luda àkpatii sìḿma dɔ.

¹⁸ Kũ à Luda àkpati yã ò, Ɛli bò a gbàaa à lɛ̀tɛ kpɛdangara wɛ̃tɛ bĩnilɛ sarɛ, akũ a wakaa ɛ̀ à gà, zaakũ à zĩ kũ̀, akũsɔ̃ gbɛ̃ kãnamɛ. À dò Isarailanɔnɛ arɛ ari wɛ̃̀ bupla.

¹⁹ Ɛli nɛ́ Finɛasi nanɔ nɔ̀sina, à kà nɛ́'ina. Kũ à Luda àkpati sina baaruu mà kũ a zã de ganaao kũ a zã ganaao, akũ à kùtɛ à nɛ́ ì, zaakũ nɔ̀wãwã fùtɛa.

²⁰ Kũ àtɛn gbãsĩ lɛ́, gbɛ̃ kũ ò a kũkũnanɔ pìnɛ: Ǹsun tó vĩna n kũro, zaakũ n nɛ́ ì gɔ̃gbɛ̃ ũ. Ama adi weḿmaro, adi ń yã daro.

²¹ Akũ à tɔ́ kpà nɛ́ pìinɛ Ikabodu à pì: Isarailanɔ gakuri kɔ̀ɔ ɛ̀. Zaakũ ò Luda àkpatii sìḿma, akũsɔ̃ a zã de kũ a zão gàga dɔ.

²² À pì: Isarailanɔ gakuri kɔ̀ɔ ɛ̀, zaakũ ò Luda àkpatii sìḿma.

« Previous