Online Bible

1 SAMUƐLI 25 - Bisã Bible 2005

Dauda kũ Nabalao kũ Abigailio

¹ Samuɛli gà, akũ Isarailanɔ kàkara ń pínki, òtɛn ɔ́ɔ dɔ a ganaa musu, akũ ò a vĩ̀ a bɛa zaa Rama. Abire gbɛra Dauda gɛ̀ɛ Parani sɛ̃̀ntɛ.

² Maɔni gbɛ̃ke kun, à bɔkɔtɛ vĩ Kamɛli gwe. Aruzɛkɛde zɔ̃kɔ̃ɔmɛ, à sãnɔ vĩ wàa gɛ̃ro kũ blènɔ wàa sɔɔro. Akũ à sù Kamɛli de à a sãnɔ kã zɔ̃zɔ̃.

³ A tɔ́n Nabala, a nanɔ tɔ́n Abigaili. Nɔgbɛ̃ pìi laakari vĩ akũsɔ̃ a kakana mana, ama a gɔ̃ pì gbɛ̃ke wé'i vĩro, a yãkɛnanɔn dɔ̀rɔ vĩro. Kalɛbu burimɛ.

⁴ Gɔrɔ kũ Dauda kú sɛ̃̀ntɛ, à mà Nabala sù a sãnɔ kã zɔ̃zɔ̃.

⁵ Akũ à a ìbanɔ zĩ̀ gbɛ̃nɔn kuri, à pìńnɛ: À futɛ à gɛ́ Nabala kĩnaa zaa Kamɛli, à fɔ kpáamɛnɛ

⁶ à onɛ à pi: Luda n dɔ̃ kũ aafiaao kũ n ɔnnwo kũ n gbɛ̃nɔ ń pínki.

⁷ Ma mà n su kũ sãkãkɛ̃rɛrinɔ. Kũ n sãdãrinɔn kú kũoo, odi wari daḿmaro, ń kunna Kamɛli gũn, pɔ́ke dí kĩaḿmaro.

⁸ Ǹ n zĩkɛrii pìnɔ la, oni onnɛ. Ǹ tó ma ìbanɔ n pɔnna e, zaakũ dikpɛ zĩmɛ. N zɔ̀blerii pìnɔ kũ makũ n nɛ́o ǹ ó gba pɔ́ kũ n è.

⁹ Kũ Dauda ìbaa pìnɔ kà, ò yã pìi bàba Nabalanɛ kũ Dauda tɔ́o, akũ ò zɛ̀i.

¹⁰ Akũ Nabala pìńnɛ: Dín Dauda ũu? Dín Yɛsɛ nɛ́ pì ũu? Zɔ̀ kũ ò kɛ̃̀ n dikirinɔa gbãranɔn dasi.

¹¹ Á ye mà a burodi kũ ma ío kũ nɔ̀bɔ kũ ma dɛ̀ ma sãkãkɛ̃rɛrinɔnɛo sɛ́tɛ mà kpá gbɛ̃ kũ má ń boki dɔ̃ronɔan yá?

¹² Akũ Dauda gbɛ̃nɔ ɛ̀ra ò dà zɛ́n ò tà. Kũ ò kà, ò yã pìnɔ gbã̀nɛ pínki.

¹³ Akũ Dauda pì a gbɛ̃ pìnɔnɛ: Á baadi a fɛ̃nɛda loko. Akũ ń baadi a fɛ̃nɛda lòko kũ Daudao se. Gbɛ̃ kũ ò gɛ̀ɛ kũ Daudaonɔ kà wàa pla taka, akũ gbɛ̃nɔn wàa do gɔ̃̀ kũ asonɔ.

¹⁴ À sù à lè zĩkɛrii pìnɔ doke gɛ̀ɛ à ò Nabala nanɔ Abigailinɛ à pì: Dauda gbɛ̃nɔ zĩ̀ ò bò sɛ̃̀ntɛ, ò sù ò fɔ kpà ó dikiria, akũ à pàtaḿma.

¹⁵ Gbɛ̃ pìnɔ sɔ̃ ò yã mana kɛ̀wɛrɛ manamana, odi wari dawáro. Ó kunna kũńwo sɛ̃̀ntɛ, pɔ́ke dì sãtɛwáro.

¹⁶ Gɔrɔ kũ ótɛn sã dã ń sarɛ fãnantɛ̃ kũ gwãanio pínki, òdigɔ̃ likawái lán bĩni bà.

¹⁷ Ǹ laasun lɛ́ yã kũ ĩni kɛa, zaakũ ò zɛ̀o ò yã vãni kɛ ó dikiriinɛ kũ a ɔndenɔ ń pínki. Àpi manaro, àdi gbɛ̃ lɛ́damma maro.

¹⁸ Akũ Abigaili burodii kàkara likalika mɛ̀n wàa do kũ sèwɛ̃o tùru pla kũ sã kũ ò kɛ̀kɛnɔ mɛ̀n sɔɔro kũ pɔ́blewɛ kpatanaao kpɛ̃nɛ sɔɔro kũ geepi kàranɔ mɛ̀n basɔɔro kũ kaka nɛ́ kori kàranɔ mɛ̀n wàa do, ò yĩ̀ zaakinɔnɛ.

¹⁹ Akũ à pì a zĩkɛrinɔnɛ: Àgɔ̃ do arɛ, manigɔ̃ tɛ́ á kpɛ. Adi yãke o a zã Nabalanɛro.

²⁰ Akũ à di a zaakia, àtɛn kipa sĩ̀sĩia. Kũ à bò sĩ̀sĩ kpɛ, ò dàkarɛ kũ Daudao, àtɛn kipa sĩ̀sĩia se kũ a gbɛ̃nɔ, òtɛn su.

²¹ Dauda tɛn o a gbɛ̃nɔnɛ: Ma gbɛ̃ pì pɔ́nɔ dã̀kpãnɛ sɛ̃̀ntɛ pãmɛ. Ódi a pɔ́ke sɛ́ro, akũ à yã mana kũ ma kɛ̀nɛ fĩna bòmɛnɛ kũ a vãnio.

²² Tó ma a gɔ̃gbɛ̃ ke tò bɛ̃nɛ ari gu gɔ̃ gɛ́ dɔ, Luda yã kɛmɛnɛ pãsĩpãsĩ.

²³ Kũ Abigaili a è, akũ à kìpa a zaakia likalika, à kùtɛ Daudanɛ à arɛ pɛ̀tɛ.

²⁴ Akũ à kùtɛ a gbá sarɛ à pì: Baa, taari pìi gɔ̃̀ ma mɛ̀n do musu. Ǹ makũ n zɔ̀bleri gba zɛ́ mà yã onnɛ. Ǹ sã dɔ makũ n zɔ̀bleri yãi.

²⁵ Baa, Nabala manaro. Ǹsun a yã daro. À de lán a tɔ́ bàmɛ. A tɔ́n Yɔ̃nkɔ, akũsɔ̃ yɔ̃nkɔyãn àdigɔ̃ kɛ. Makũ n zɔ̀bleri sɔ̃, mádi gbɛ̃ kũ n ń zĩnɔ ero.

²⁶ Baa, lákũ Dikiri kun akũsɔ̃ ń kun nà, Dikiri gìnnɛ ǹ gbɛ̃ dɛ ǹ mɔra káḿma n zĩda. Dikiri tó n ibɛrɛnɔ kũ gbɛ̃ kũ òtɛni n kpákpa kũ a vãnionɔ gɔ̃ lán Nabala bà.

²⁷ Tera sà Baa, ǹ gba kũ makũ n zɔ̀bleri ma suonnɛ dí sí ǹ kpá n ìbanɔa.

²⁸ Ǹ sùru kɛ kũ makũ n zɔ̀bleriio kũ ma taario dɔ. Dikiri ni tó n burinɔ gɔ̃ kí ble gɔrɔ sĩnda pínki, zaakũ ndì zĩ̀ ká Dikirinɛmɛ, oni a vãni ke emma zikiro.

²⁹ Bee tó gbɛ̃ke fùtɛ àtɛn pɛ́tɛnyĩ à n dɛ, Dikiri n Luda ni n wɛ̃̀ndiba dɔ kũ mɔ̀kakɔ̃anaamɛ, ani n ibɛrɛnɔ wɛ̃̀ndi da gbɛ̀mban à zu.

³⁰ Baa, tó Dikiri yã mana kɛ̀nnɛ lákũ à lɛ́ sɛ̀nnɛ nà pínki, tó à n ditɛ Isarailanɔ gbɛ̃ zɔ̃kɔ̃ ũ,

³¹ n laasun sún wari dɔmma à n da yãn gbɛ̃dɛna pã ke fĩnabona n zĩdanɛ yã musuro. Baa, tó Dikiri yã mana kɛ̀nnɛ, ǹ tó makũ n zɔ̀bleri ma yã gɔ̃ dɔngu.

³² Akũ Dauda pì Abigailinɛ: Ò Dikiri Isarailanɔ Luda sáabu kpá, zaakũ à n zĩ ǹ damalɛ gbãra.

³³ Ma n sáabu kpà se kũ lɛ́damma kũ n ma gbao, zaakũ mɔkɔ̃mmɛ n kpamɛnɛ gbãra, akũ mádi gbɛ̃ dɛ ma mɔra káḿma ma zĩdanɛro.

³⁴ Tó abirekũnlo, kũ Dikiri Isarailanɔ Luda kũ à gìmɛnɛ mà yã vãni kɛnnɛo, tó ńdi wã n su n damalɛ yãro, de gu ni dɔ Nabala nɛ́gɔ̃gbɛ̃ kearo.

³⁵ Akũ Dauda pɔ́ kũ Abigaili sùoarɛ sì à pì: Ǹ ká bɛ aafia. Ma n yã mà, ma yodaado kɛ̀nnɛ.

³⁶ Kũ Abigaili kà Nabala kĩnaa, à è àtɛn pɔ́ ble lán kína bà. A pɔ kɛ̀ nna, à wɛ̃ gbɛ̃̀ à kã̀. Akũ a nanɔ pì dí lɛ́ bo à yãke ònɛ, bee fítiro, ari gu gɛ̀ɛ à dɔ̀o.

³⁷ Kũ gu dɔ̀, wɛ̃ wère Nabalaa, akũ a nanɔ yã kũ à kɛ̀ɛ pìi ònɛ. Akũ swɛ̃̀ɛ kɛ̃̀agu, à gɔ̃̀ lán gbɛ̀ɛ bà.

³⁸ Kũ à kɛ̀ lán gɔrɔ kuri taka bà, akũ Dikiri gòo tɔ̃̀a, à gà.

³⁹ Kũ Dauda Nabala gana baaruu mà, à pì: Ò Dikiri kũ à zɛ̀ kũmao sáabu kpá, à wé'i kũ Nabala dàma bòmɛnɛ. À gìmɛnɛ mà yã vãni kɛ, akũ à tò Nabala vãnikɛnaa wì a zĩda musu. Abire gbɛra Dauda gbɛ̃nɔ zĩ̀ Abigailia ò onɛ á ye à a sɛ́ nɔ ũ.

⁴⁰ Kũ Dauda ìbaa pìnɔ kà Abigaili kĩnaa Kamɛli, ò pìnɛ: Dauda mɛ́ à ó zĩmma, à ye à n sɛ́ nɔ ũ.

⁴¹ Akũ à fùtɛ à kùtɛ à a mìi pɛ̀tɛ à pì: A zɔ̀bleriin ma ũ, ma soru kɛ̀ mà a dikiri ìbanɔ gbá pípińnɛ.

⁴² Akũ à fùtɛ à dì zaakia gɔ̃̀nɔ. A nɔgbɛ̃ zĩkɛrinɔ gɛ̀ɛ kãao gbɛ̃nɔn sɔɔro. Ò dà zɛ́n kũ Dauda zĩ̀rinɔ, akũ à gɔ̃̀ a nɔ ũ.

⁴³ Dauda Yɛzɛrili gbɛ̃ Ainɔama kũna nɔ ũ dɔ. Ń pla ń pínki a nɔnɔmɛ.

⁴⁴ Solu a nɛ́ Mikala kũ à de Dauda nɔ ũ yã kpà Laisi nɛ́ Palatiɛli, Galimu gbɛ̃a.