1 SAMUƐLI 2 - Bisã Bible 2005Ana aduakɛnaa ( Luk 1:46-55 ) 1 Akũ Ana aduaa kɛ̀ à pì: Ma nɛ̀sɛ tɛn yáa dɔ Dikiria, ma mì dana ía Dikiri yãi. Matɛn woo kɛ ma ibɛrɛnɔa, ma pɔ kɛ̀ nna, kũ à ma sura bà. 2 Gbɛ̃ke kú adona lán Dikiri bàro, gbɛ̃ke kun lán a bàro, gbɛ̀si ke kun lán ó Luda bàro. 3 Àsun yã bɔtɛ kũ yɔ̃nkɔoro, àsun tó zĩda bina yã bo á lɛ́nlo, zaakũ Dikiri Ludamɛ yãdɔ̃ri ũ, àkũ mɛ́ àdi ó yãkɛnanɔ yɔ̃ à gwa. 4 Gɔ̃sa gbãnanɔ sá ɛ̀'ɛ, ama gbɛ̃ funanɔ gbãna asa dɔ̀ ń pi. 5 Gbɛ̃ kãna tɛn a zĩda aya kɛ pɔ́ble yãi, ama nà tɛn gbɛ̃ kũ àtɛni a dɛ yã dɛ doro. Para nɛ́ ì mɛ̀n suppla, ama nɛ́dasi'irii gɔ̃̀ wɛ̃nda. 6 Dikiri mɛ́ àdi tó gbɛ̃ ga, akũsɔ̃ àdi tó gbɛ̃ gɔ̃ kun. Àkũ mɛ́ àdi tó gbɛ̃ gɛ̃ bùsuu gũn, akũsɔ̃ àdi gɛ̀ vu. 7 Dikiri mɛ́ àdi su kũ takasio kũ kunna nnao, àdi ɔ tɔ̃ gbɛ̃kenɔa, àdi gbɛ̃kenɔ sɛ́ lei. 8 Àdi wɛ̃ndadenɔ bo bùsutitin, àdi takasidenɔ bo tuburan. Àdi ń vutɛ gu dokɔ̃nɔ kũ kínɛnɔ, àdi tó ò kpata ble kũ gakurio. Zaakũ zĩtɛ pɛ́tɛkinɔ bi Dikiri pɔ́mɛ, akũ à andunia kàtɛa. 9 Àdi a gbɛ̃nɔ gbápɛtɛki dãkpãńnɛ, àdi yãvãnikɛrinɔ dúgu zɔ̃ gusiran. Gbɛ̃ke ni fɔ̃ à ɔsi nɛ kũ a zĩda gbãnaoro. 10 Dikiri ni a ibɛrɛnɔ ú lɔ́, ani pata a ibɛrɛnɔa zaa musu, ani yãkpatɛ kɛ kũńwo ari andunia lɛ́zɛkia. Ani kína kũ à kàa gba gbãna, ani gbɛ̃ kũ à sɛ̀ɛ pìi mì da ía. 11 Akũ Ɛlɛkana tà a bɛ wɛ̃tɛa Rama, akũ nɛ́gɔ̃gbɛ̃ pìi gɔ̃̀, àtɛn zĩ kɛ Dikirinɛ kũ sa'ori Ɛlio. Ɛli nɛ́gɔ̃gbɛ̃nɔ 12 Ɛli nɛ́gɔ̃gbɛ̃nɔ bi nɛ́ pãsĩnɔmɛ, òdi Dikiri daro. 13 Yã kũ sa'orii pìnɔ dì kɛńnɛn dí. Tó gbɛ̃ sa ò, gɔrɔ kũ àtɛn nɔ̀bɔɔ pì fùfu kɛ, sa'ori ìba ke dì su kũ saka gã̀nɛ aakɔ̃deo kũna. 14 Akũ àdi sí ta gũn ke oro ke mɔ̀'oro, akũ sa'ori dì pɔ́ kũ saka pìi bòo sɛ́ a pɔ́ ũ pínki. Lɛn òdi kɛ Isaraila kũ ò sù Silonɔnɛ lɛ ń pínki. 15 Bee ari ògɔ̃ gɛ́ nɔ̀bɔ kpá tɛ́a a nísi láka, sa'ori ìba ke dì su à pi gbɛ̃ kũ à sa òo pìinɛ: Ǹ nɔ̀bɔ kpá sa'oria à kpá tɛ́a, zaakũ ani we à nɔ̀bɔ fùfukɛna símmaro, sé a búsu. 16 Tó gbɛ̃ pìi pìnɛ áni nɔ̀bɔ kpá tɛ́a gĩa a nísi láka, gbasa pɔ́ kũ à yei à sɛ́ sà, akũ ìbaa pìi dì pi: Oi! Ǹ kpáma gɔ̃̀nɔ! Tó n gi, mani bo kũ gbãnao. 17 Kɛfɛnna pìnɔ durunna zɔ̃kɔ̃ Dikirinɛ manamana, zaakũ òtɛni a sa'onɔbɔ gya bomɛ. 18 Nɛ́gɔ̃gbɛ̃ Samuɛli sɔ̃ àdigɔ̃ zĩ kɛ Dikirinɛ kũ uta lokommao dana. 19 A da dì uta gyaba fítinna zɔ̃nɛ. Tó àtɛn su sa o kũ a zão wɛ̃̀ kũ wɛ̃̀ɛo, akũ àdi suonɛ. 20 Ɛli dì sa mana o Ɛlɛkananɛ kũ a nɔ pìio à pi: Dikiri n gba nɛ́ dɔ kũ n nɔ pìio, nɛ́ kũ à a wɛ́ kɛ̀ akũ à kpà Dikiriaa pìi gɛ̃nɛ ũ. Akũ òdi tá ń bɛa. 21 Akũ Dikiri arubarikaa dà Ananɛ, à ɛ̀ra à nɛ́ ì mɛ̀n sɔɔro, gɔ̃gbɛ̃ aakɔ̃, nɔgbɛ̃ pla. Nɛ́gɔ̃gbɛ̃ Samuɛli sɔ̃ àtɛn zɔ̃kɔ̃ kũ Dikiri ɔĩ. 22 Ɛli zĩ kũ̀ yúkuyuku, à yã kũ a nɛ́nɔ tɛn kɛ Isarailanɔnɛ mà pínki kũ lákũ òdi wútɛ kũ nɔgbɛ̃ kũ òdigɔ̃ zĩ kɛ dakarɛki kuta kpɛ́lɛlɛanɔo nà. 23 Akũ à ń lá à pì: Bɔ́ mɛ́ à tò átɛn yã kɛ lɛɛ? Ma mà gbɛ̃ sĩnda pínki tɛni á yãvãnikɛna o. 24 Àsun kɛ lɛro ma nɛ́nɔ! Baaru kũ ma mà kũ àtɛn dagula Dikiri gbɛ̃nɔ tɛ́ pì manaro. 25 Tó gbɛ̃ durunna kɛ̀ a gbɛ̃dakenɛ, Luda ni a yã gɔ̃gɔ̃, ama tó gbɛ̃ durunna kɛ̀ Dikirinɛ, dí mɛ́ ani kútɛ kɛnɛɛ? Akũ ò gì ń de yã mai, zaakũ Dikiri zɛ̀ kũ ń dɛdɛna yãomɛ. 26 Nɛ́gɔ̃gbɛ̃ Samuɛli sɔ̃, àtɛn zɔ̃kɔ̃ kũ àtɛn kara. Àdigɔ̃ nna kũ Dikirio kũ gbɛ̃ sĩnda pínkio. Àlesi bɛ̃̀nɛ dɔna Ɛli bedenɔa 27 Akũ Luda gbɛ̃ke sù à pì Ɛlinɛ: Dikiri pì, gɔrɔ kũ n dizi Haruna bedenɔ tɛn zɔ̀ ble Firi'aunanɛ zaa Misila, a bo a suḿma tɛ̃tɛ̃ntɛ̃, 28 Isaraila burinɔ tɛ́ pínki n dizi Harunan a sɛ̀ a gbàgbari ũ. Akũ à a gbagba, à turaretiti kàarɛ tɛ́n kũ sa'o'utao dana. Dikiri pì, a sa'opɔ kũ Isarailanɔ dì kpáta kpà a burinɔa pínki. 29 Dikiri pì, bɔ́ mɛ́ à tò adì a sa'ona nɔ̀bɔ zɔ̃ kũ gbáo kũ gba kũ a dìtɛ ò suoarɛ a kpɛ́ gũnwoo? À pì, bɔ́yãi ndì n nɛ́nɔ ditɛ deala, akũ átɛn mɛ̀ kpá kũ a gbɛ̃ Isarailanɔ sa'ona nɔ̀bɔ manaoo? 30 Abire yãi Dikiri Isarailanɔ Luda pì, a dìtɛ yã n burinɔ kũ n dizi burinɔ mɛ́ ògɔ̃ a gbagba ari gɔrɔ sĩnda pínki, ama tera adì we abirekũi doro. À pì, gbɛ̃ kũ à a kpe tàn áni bɛ̀ɛrɛ línɛ, gbɛ̃ kũ à a gya bò áni kɛ pɔ́ ũro. 31 Ǹ ma! À pì, gɔrɔke ni su, áni n bɛ gbãna símma kũ n de bɛ pɔ́o. Mare zĩ ke nigɔ̃ kú n ɔnn doro. 32 Ĩni wari e a bɛa. Bee tó a arubarikaa pìsi Isarailanɔa ń pínki, mare zĩ ke nigɔ̃ kú n ɔnnlo ari gɔrɔ sĩnda pínki. 33 N ɔndenɔ ni gaga zɛ́gbãn ń pínki. N gbɛ̃ kũ adi a bo a gbagbazĩ gũnlo ni tó n wɛ́ bobo kũ ɔ́ɔdɔo, n pɔ ni sira kũ. 34 N nɛ́ gbɛ̃nɔn pla Ɔfini kũ Finɛasio ni gaga gɔrɔ dokɔ̃nɔ zĩ ń pínki. Abirekũ nigɔ̃ dennɛ sèeda ũ kũ yã kũ a ò ni kɛ pínki. 35 Dikiri pì, áni gbɛ̃ sɛ́ sa'ori náanide ũ, ani a pɔyenyĩna kɛ lákũ á yei nà. Áni a burinɔ gba gbãna gíngin, anigɔ̃ zĩ kɛ kína kũ áni kánɛ ari gɔrɔ sĩnda pínki. 36 N buri kũ ò gɔ̃̀nɔ ni su ò kútɛ kɛnɛ ɔgɔ ke burodi yãi ò pi: Ǹ sa'ori zĩ ke dawɛrɛ ò kɛ, de ò pɔ́ fítinna le ògɔ̃ ble. |
Bisã Bible © SIM International, 2005.