Online Bible

1 SAMUƐLI 10 - Bisã Bible 2005

Samuɛli nísikuna Solu mìia

¹ Akũ Samuɛli nísi tùruu sɛ̀ à nísi kù Solunɛ a mìia, akũ à lɛ́ pɛ̀a à pì: Dikiri mɛ́ à n ditɛ don'arɛde ũ a gbɛ̃ Isarailanɔnɛ. Ĩni kí ble Dikiri gbɛ̃nɔa ǹ ń bo ń ibɛrɛ kũ ò likańyĩnɔ ɔĩ. Sèeda kũ ani tó ǹ dɔ̃ kũ Dikiri mɛ́ à n ditɛ a gbɛ̃nɔ don'arɛde ũn dí.

² Tó o kɛ̃kɔ̃a la tera, ĩni da gbɛ̃nɔn planɔlɛ Zɛlɛza, Rahila mira sarɛ, Biliaminu bùsu lɛ́i. Oni pinnɛ: Ò zaaki kũ n gɛ wɛtɛnɔ lè. Ń yã n de kũna gbãna doro, n yãn àtɛni a damu kɛi sà, àtɛn pi deran áni kɛ a nɛ́ yã musu nàa?

³ Bona gwe, tó n tɛ arɛ, tó n ka gbiri lí kũ̀ kĩnaa zaa Tabo, gbɛ̃nɔn aakɔ̃ ni danlɛ gwe dɔ, òtɛn gɛ́ Luda gbagba zaa Bɛtɛli. Ń gbɛ̃ do blènɛnɔ kũna mɛ̀n aakɔ̃, ń gbɛ̃ do burodi kũna mɛ̀n aakɔ̃, akũ ń gbɛ̃ do sèwɛ̃ kũna tùru do.

⁴ Oni n aafia gbɛka, oni burodi mɛ̀n pla kpámma, ń sí.

⁵ Abire gbɛra tó n ka Luda sĩ̀sĩ kũ à kú Gibɛa, gu kũ Filisitininɔ gudãkpãki kún, tó n ka kãni kũ wɛ̃tɛ pìio, ĩni dakarɛ kũ annabinɔ ò tɛ́tɛkɔ̃i, òtɛn kipa gbagbakia. Òtɛn dońnɛ arɛ kũ mɔrɔnɔ kũ gã̀gãnɔ kũ gidigbonɔ kũ kutɛnɔ, òtɛn annabikɛyã o.

⁶ Dikiri Nini ni summa, ĩni annabikɛyã o kũńwo, ĩni li gbɛ̃ dufu ũ.

⁷ Tó sèeda birenɔ kɛ̀ lɛ, ǹ yã kũ n a kɛna zɛ́ è kɛ, zaakũ Luda kú kũnwo.

⁸ Ǹ domɛnɛ arɛ gɛna Giligala, mani n le gwe, mani sa'opɔ kũ òdi ká tɛ́n à tɛ́ kũ o kũ kɛnnakũkɔ̃o sa'opɔo. Ǹ ma dã gwe ari gɔrɔ suppla, mani su mà n le gwe, mani yã kũ ĩni kɛ onnɛ.

⁹ Kũ Solu kpɛ lì Samuɛlinɛ, àtɛn tá, Luda a nɛ̀sɛɛ lìtɛnɛ, akũ sèedaa pìnɔ kɛ̀ zĩ birea pínki.

¹⁰ Kũ ò kà Gibɛa, annabinɔ dàalɛ ò tɛ́tɛkɔ̃i, akũ Luda Nini sùa, àtɛn annabikɛyã o kũńwo.

¹¹ Kũ gbɛ̃ kũ ò a dɔ̃nɔ a è, àtɛn annabikɛyã o kũ annabinɔ, ò kɔ̃ là ò pì: Bɔ́ mɛ́ à Kisi nɛ́ lèe? Solu kú annabinɔ tɛ́ see?

¹² Akũ Gibɛa gbɛ̃ke yã wèḿma à pì: Gbɛ̃ kparanɔ denɔmɛ dínɔ ũ sɔ̃ɔ? Akũ à gɔ̃̀ baaru pɔ́ ũ òdi pi: Solu kú annabinɔ tɛ́ see?

¹³ Kũ Solu annabikɛyã ò à làka, akũ à gɛ̀ɛ gbagbaki pìia.

¹⁴ Kũ Solu tà bɛ kũ a zĩkɛriio, a disɛ̃ ń lá à pì: A gɛ mámɛɛ? Solu wèa à pì: O gɛ zaakinɔ wɛtɛmɛ. Kũ ódi ń ero, akũ o gɛ Samuɛli kĩnaa.

¹⁵ Akũ Solu disɛ̃ pìnɛ: Yã kũ Samuɛli òárɛ babamɛnɛ.

¹⁶ Akũ Solu pì: À pìwɛrɛ ò zaaki pìnɔ lè. Ama adi kpata yã kũ Samuɛli òarɛ babanɛro.

Samuɛli Solu kana kín gupuraa

¹⁷ Akũ Samuɛli Isarailanɔ kàkara Dikiri arɛ Mizipa.

¹⁸ À pìńnɛ: Dikiri á Luda pì, a á bɔ́tɛ Misila, a á sí Misilanɔ kũ buri kũ ò ɔ tɔ̃̀áwanɔ ɔĩ ń pínki.

¹⁹ Luda á bɔ́ á yã'ũmmananɔ kũ á warikɛnanɔ gũn pínki, akũ a gii gbãra, a pìnɛ à kína káárɛ. Tɔ̀, à mɔ́ à zɛ Dikiri arɛ sà buri kũ burio, ɔn kũ ɔnnwo.

²⁰ Kũ Samuɛli sù kũ Isaraila burinɔ ń pínki, akũ gbɛ̀ Biliaminu burinɔ sɛ̀.

²¹ Akũ à sù kũ Biliaminu burinɔ ɔn kũ ɔnnwo. Akũ Matari ɔnnn ò zɛ̀o. Ɔnde pìnɔ tɛ́ Kisi nɛ́ Solu mɛ́ à blè. Kũ ò a wɛ̀tɛ, òdi a lero.

²² Akũ ò ɛ̀ra ò Dikiri là dɔ ò pì: Gɔ̃gbɛ̃ pìi sù la kɔ̀ yá? Akũ Dikiri pì: À utɛna asonɔ dagura.

²³ Akũ ò bàa lɛ̀ ò gɛ̀ɛ ò a bò ò sù kãao ń tɛ́. Kũ à zɛ̀ ń tɛ́, ń pínki ń gbã̀na zɛ̀ a gã̀ lɛ́n.

²⁴ Akũ Samuɛli pìńnɛ ń pínki: A gbɛ̃ kũ Dikiri sɛ̀ɛ è yá? Gbɛ̃ke kun lán a bà á tɛ́ro. Akũ gbɛ̃ sĩnda pínki wiki lɛ̀ ò pì: Luda ó kína dɔ̃ kũ aafiaao!

²⁵ Akũ Samuɛli kíblena zɛ́ bɔ̀kɔtɛńnɛ, akũ à kɛ̃̀ takadan à dìtɛ Dikiri kpɛ́n. Akũ à ń gbárɛ, baadi tà a bɛa.

²⁶ Solu sɔ̃ à tà a bɛa Gibɛa. Gɔ̃ wɔ́rɔgɔde kũ Luda zĩ kɛ̀ ń swɛ̃̀ɛ gũnnɔ tɛ̀i.

²⁷ Akũ gbɛ̃ pã kenɔ pì: Gbɛ̃ bire mɛ́ ani ó sura ba yá? Akũ ò a gya bò, odi sunɛ kũ pɔ́keoro, ama Solu a yĩtɛna o.