Zɛ́kɔ̀wáɖádyà 8 - Ɓǎsɔ́ɔ̀ Báɓòɔ̀

Bounɓoɔ̀ ɖáìn nyɔ ɓěɔ̀ nyɛ́nɛ́ín kà ɔ mu Jùɖúsɛ̀ɖɛ̀ìn-hwɔ̀ɖɔ̀ɔ̀ poùn ɖeɛ

¹ Ké Bounɓo mɔ̀ nyɔ nìà ɖɛ séín kɔ̃in nyɛɛ wùɖù ma ḿ gbo ɖe, ké ɔ ɖá,

² “Jùɖúsɛ̀ɖɛ̀ìn-hwɔ̀ɖɔ̀ɔ̀ jè kpɔ̃ ḿ hwòɖǒ mìɔ. Ḿ ɖɛ̀ɓɛ̀ ɔ mú jèɛɛ, ḿ kpáìn ɔ mú-nyɛ́-nyɔ̀ ɓěɔ̀ dyoɖoún mìɔ.

³ Ní mu ɖé Jùɖúsɛ̀ɖɛ̀ìn-hwɔ̀ɖɔ̀ mɔ̀à Zádyɔún-hwɔ̀ɖɔ̀ɔ̀ kɛɛ mú ɖe dyiìn, ɓɛ́ ḿ ké ɖéɛ mú cĩ́. Ɔ mu hwɔɖɔ kɔ̃̀ mú ɓɛ́ dyí-sɛ́ɖɛ́ìn-ɖɛ̀ nyu-nyu nìɛɛ jǔùn, ké wa mu ní toɖo kɔ̃̀ dya ɓɛ́ Jùɖúsɛ̀ɖɛ̀ìn-hwɔ̀ɖɔ̀ɔ̀ nìà kɛɛ Toɖo Hwɛ̀ǐn-Hwɛ̀ǐn ɖáìn.

⁴ Gàa sùà kè nyɔ́nɔ́ sùà ɓě mu Jùɖúsɛ̀ɖɛ̀ìn-hwɔ̀ɖɔ̀ɔ̀ gboi hwìè ɓěɔ̀ wĩin koìn ɖe. Waà nyɔ sùà kùì-kpà ɓěɔ̀ mu wa xwa nììn ɖe.

⁵ Ké gàa-dyù kè màa-dyù ɓě mu hwɔɖɔ-gboi-hwìè ɓěɔ̀ gba dyíìn, ɓɛ́ wa ké péé nyuɛń nì.

⁶ Ɖɛ nìà kɛ ɓɛ́ìn ɖɛ dĩ́ín-dĩ̀ìn jǔɛ ɖé ɓě mɔ̀ ní nyɔ xwéɖé wè sèà ɓíɖíiɛɛ dyéɖéín. Ɓó kàǔn wɛ̃ɛ, ɔ mɔ̀ ɖɛ dyùwè ɖé ḿ dyéɖéín.

⁷ Ní mu ɓě póìn sɔ̀ìn ɖé ɓóɖó-dù séín xwaún.

⁸ Ké ní mu ɓě ɖe dyàùn, ɓɛ́ ɓě ké Jùɖúsɛ̀ɖɛ̀ìn-hwɔ̀ɖɔ̀ɔ̀ mú cĩ́ ɖe. Ké ɓě mu ní nyɔ ɓě jǔùn, ké ní mu ɓěɛ̀ Gèɖèpɔ́ɔ̀ jǔùn ɖé jǎà kè dyí-sɛ́ɖɛ́ìn-sɛ́ɖɛ́ìn mú. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.

⁹ “Ɓěɛ̀ hwòɖǒ mɛ kpá kpéí, ɓě mɔ̀ nyɔ ɓě wɔ̃́ zɔ̃̌ɔ̀ kà wuɖu ɓěɛ̀ kpáá-ɖɛ̀-cɛ̃-nyɔ̀ ɓěɔ̀ wĩín ti ɓɛ́ ní gbǒɔ̀ hìɖì-kpà nìǒ zɔ̃̌ɔ̀ kà dèɛ̌n nyɛɛ dyɛ̀ìn ɓó kàǔn wɛ̃. Wuɖuɔ̀ mɔ̀ kà ɓɛ́ ní gbǒɔ̀ ɓéɖé ɔ ké poɛ.

¹⁰ Hwɛ̀ ɓɛ́ tia ké ma ɓó nyiniɛɛ, pɛ́ɛ̀-ɖɛ̀ ɖò se ma nì ɓó kũ̀à ɓɛ́ nyɔ ɖò mɔɔ nyúà-ɖɛ̀ ɖò nyuɛɛ jè. Kɛbì nyɔ ɖò mɛ sɔ̀ ma hwɔɖɔɔ̀ mú, ɓɛ́ ɔ ké píé síɛ, mɔɔ kɛbì ɔ mɛ dyá ma hwɔɖɔɔ̀ múɛɛ, ɔ se ma ɔ mú-nyɛ́-nyɔ̀ɔ̀ xwaún póɛ ɓɛ́ìn, sepóɛɖé ḿ nyuɛ ké nyɔ ɖò-ɖò séín nì ma gbo vɔ̃ǐn vɔ̃̀ǐn.

¹¹ Kɛɛ ɓó kàǔn wɛ̃ɛ, ḿ se ɖɛ ḿ nyu zɔ̃̌ɔ̀ kà wa bũ̌ɛɛ ɓě mɔ̀ nyɔ xwéɖé wè sèà ɓíɖíiɛɛ bũ̌ nyuɛ́ mu.

¹² Ɓě muá ɓěɛ̀ ɓáá-ɖɛ̀ ɓěɔ̀ ɓáùn ɖé gìɖìǐ mú. Ɓěɛ̀ géɖéè-gbǎ ɓěɔ̀ muá tòɖòùn, ké ɓóɖóɔ̀ muá bùɛ̀-bùɛ̀ nììn, ké dyɔɔ̀ muá ní tòùn. Ní muɛ nyuùn ɓɛ́ ɓě mɔ̀ nyɔ xwéɖé wè sèà ɓíɖíiɛɛ ké ɖɛ séín ɓěa kɔ̃̀.

¹³ Ɓě mɔ̀à Júɖà-nyɔ̀ ɓě kè Éézùɖùɛ̀-dyù ɓěɛɛ, kà ɓɛ́ ɓě mɔ̀ ma kà ɓóɖó-dù ɓěɔ̀ dyí-gboò-ɖɛ̀ kɛɛ, kà dyúáɖòɔ̀ kǎà ní mu ɓě póìn, ké nyɔ ɓáún-ɓáún mu jĩ́á-jè dyéìn dyììn ɖé ɓě mú. Ɔ ná nì jèɛɛ, ɓěǐn ɖá ɓɛ́ ɓě ké fɛ̃̀ìn, kɛɛ ɓěɛ̀ hwòɖǒ mɛ kpá kpéí. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.

¹⁴ “Ti ɓɛ́ ɓě ɓǎ nììn ɓǎ ɓěɔ̀ po zɔ̃̌ɔ̀ kà ḿ dyoɖoún wɛ̃ɛ, kà ɓɛ́ ní hwòɖǒ nyuɛ zɔ̃̌ɔ̀ kà gbɔ poɛ, ɓɛ́ ḿ ké ma kà ɓě gǎ kɔ̃ tò, ké ḿ se ma kà ɓě wìǐn dyéɛɛ,

¹⁵ kà dyúáɖòɔ̀ kǎà ní hwòɖǒ ɖǎa gbɔ po ɓó kàǔn, ɓɛ́ ḿ ké ɓě mɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ nyɔ ɓě kè Júɖà-nyɔ̀ tɔ̀ɔ̀ ɓěɛɛ nɔ̀mɔ̀ dyíin dyí nyu. Ɓěǐn ɖá ɓɛ́ ɓě ké fɛ̃̀ìn.

¹⁶ Kɛɛ ɖɛ ɓě mɛ nyuɛɛ kɛà kɛ̀. Ɓě mɛ cɛ̃ìn cɛ̃̀ìn jǎà gbo. Ɓě mɛ po dyí-sɛ́ɖɛ́ìn-ɖɛ̀ ɓě ɓɛ́ wa ɓɛ́ìn gìɖìǐ dyàà kɛɛ wɔ̃ ɖé ɓěɛ̀ zɔ̃́ín-cɛ̃̀ìn-naín ɓěɔ̀.

¹⁷ Nyɔ ɖò ní ɖá ɓɛ́ ɔ ké ɖɛ gbà ɖò ɔ ké ɔ mǔè ɖò bũ̌ nyuɛɛ dyí sɔ́ ɖé ɔ hwòɖǒ bũ̌. Nyɔ ɖò ní ɖá ɓɛ́ ɔ ké se tɔ́mɔ́ hwɛ̀ ɓɛ́ ɔ ké gboò ɓóɛ jè ɖe, sepóɛɖé ḿ nyɛ́ ɖɛ séín ɓěɛ̀ mú. Mɔ̄ Bounɓoɔ̀ mɔ̀ nyɔ cɛ̃à kɛ̀.”

¹⁸ Ké Bounɓo mɔ̀ nyɔ nìà ɖɛ séín kɔ̃in nyɛɛ wùɖù ma ḿ gbo ɖe, ké ɔ ɖá,

¹⁹ “Ɓěɛ̀ dɛ̀nɛ̀ hĩinyɛ nììnɔ̀ wɔ̃-kɔ̃-hwèɖè-hwèɖèɔ̀ kè ɓěɛ̀ dɛ̀nɛ̀ hm̀m̌ nììnɔ̀ wɔ̃-kɔ̃-hwèɖè-hwèɖèɔ̀ kè ɓěɛ̀ dɛ̀nɛ̀ mɛ̀nɛ̌ìn-sɔ̃́ nììnɔ̀ wɔ̃-kɔ̃-hwèɖè-hwèɖèɔ̀ ɔ kè ɓěɛ̀ dɛ̀nɛ̀ ɓaɖa-bùè nììnɔ̀ wɔ̃-kɔ̃-hwèɖè-hwèɖèɔ̀ muá múà-tì jǔùn ɓó ɓě mɔ̀ Júɖà-nyɔ̀ ɓěɛɛ bìì. Ɔ mu hwɔ-pa-tì ɓě jǔùn. Ɓó kàǔn wɛ̃ɛ, ɓě mɛ ɖɛ̀ɓɛ̀ jǎà kè gìɖìǐ mú.

^20-21 “Ɓó tia ɓaɖaa, nyɔ ɓáún-ɓáún ɓɛ́ wa cĩ́ ɖé hwɔɖɔ-dù kò-kò ɓě múɛɛ mu gbo poìn, ɓɛ́ wa ké níiń, ‘Ɓěà mu, ɓɛ́ ɓěà ké Bounɓo mɔ̀ nyɔ nìà ɖɛ séín kɔ̃in nyɛɛ ɓaà, ɓɛ́ ɓěà ké ɔ ɖɛ zɔ̀ìne. Ɓěà mue.’

²² Nyɔ ɓáún-ɓáún mu ɓóɖó-dù vɛ̀nɛ̀ ɓéɖé kpé ɓě kɔ̃ sɔ̀ùn, ɓɛ́ wa ké ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyi, ɓɛ́ wa ké mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ ɓaà, ɓɛ́ wa ké ḿ ɖɛ zɔ̀ìn.

²³ Ɓó tia ɓaɖaa, nyɔ ɓaɖa-bùè mu ɓóɖó-dù ɓě ɓɛ́ wa mɔ̀ wuɖu-dù-kò-kò-po-nyɔ̀ ɓěɛɛ hwìɛ̀ sɔ̀ùn, ké wa mu dyiìn, ɓɛ́ wa ké Júɖà-nyɔ̀ ɖòɛ̀ gã́ùn dyi kpɔ̃, ɓɛ́ wa ké níiń, ‘À kè mɔ̀ mu, sepóɛɖé à wɔ̃́ɔ kà Gèɖèpɔ́ɔ̀ nì ɓó m̀ gboɛ.’ ”