Zɛ́kɔ̀wáɖádyà 4 - Ɓǎsɔ́ɔ̀ Báɓòɔ̀

Dyí-tɛ̀mɛ̀ìn-ɖɛ̀ ɓá ɖáùnpò-kɔ̃-dè-ɖɛ̀ɔ̀ jè dyíɛ

¹ Sɔ̀ìn ɓóɛ gboɛɛ, ínjà ɓɛ́ ɔ wùɖù ma kà ḿ gboɛɛ dyi, ké ɔ túò ma ḿ kà nyɔ túò kà nyɔ ɖò ɓɛ́ ɔ nì nyíɔún wɛ̃.

² Ké ínjàɔ̀ diè ma ḿ dyi, ké ɔ ɖá, “Ɖɛ́ nìà kɛ́?” Ké ḿ ɖá, “Ɔ mɔ̀ ɖáùnpò-kɔ̃-dè-ɖɛ̀ ɓɛ́ ɔ mɔ̀ góò saá-saá kɛ. Ɔ ɓéɖé ɖɛ hwɔìn gbòɖòò ɖò ɖéɛ dú-hwìɛ̀, ké ɖáùnpò mɛ̀nɛ̌ìn-sɔ̃́ nì ɓóɛ kɔ̃, ké ɖáùnpò ɓěɔ̀ ɖò-ɖò ɓéɖé ɖue-wɔ̃̀ mɛ̀nɛ̌ìn-sɔ̃́ ɓó ɔ dú-hwìɛ̀.

³ Ké ɔ́ɖè-cù sɔ̃́ nyànà ɓóɛ wáún dyi. Dyúáɖò nyànà ɖé ɖɛ hwɔìn gbòɖòòɔ̀ ɖiaún dyi, ké dyúáɖò nyànà ɖéɛ kunuaún dyi.”

⁴ Ké ḿ diè ma ínjà ɓɛ́ ɔ nì ma kà ḿ gbo wùɖùɛ̌n nyɛɛ dyi, ké ḿ ɖá, “Ɓɔ̌ɔ̀, ɖɛ́ mɔ̀ ɖɛ ɓěa xwíníín nyɛ́?”

⁵ Ké ínjàɔ̀ jǔ ma ḿ gɔ̃̌, ké ɔ ɖá, “M̀ se ɖɛ mɔ̀ ɖɛ ɓěa xwíníín nyɛɛ dyuòò?” Ké ḿ ɖá, “Ǹdyeo, ɓɔ̌ɔ̀.”

⁶ Ké ínjàɔ̀ ɖá, “Ɖɛ ɓɛ́ Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ Zɛ̀wáɖáɓèɓò gboɛɛ kɛà kɛ̀. Ɔ ɖá, ‘Ɔ se ɖé kpé mú, mɔɔ ɖé gana mú, kɛɛ ɔ mɔ̀ dyììn ɖé ní Zùùɔ̀ mú.

⁷ Toɖo vɛ̀nɛ̀ nìà kɛ mu bɔɔ-kpà mú zɛ̃̀ìn ɓó mɔ̀ Zɛ̀wáɖáɓèɓò dyúa, ké nì mu ní gbǒɔ̀ sɔ́ɔ́-kpò hwɛ̀ìn-gbɔɔ̀ dèìn. Ɔ ɖǎ ná nìǐn, nìí, nyɔ ɓěɔ̀ mu múà-kùɖǔ-kuɖu nyuɛń nììn, ɓɛ́ wa ké níiń, “Gèɖèpɔ́ɔ̀ jĩ́á-jè, Gèɖèpɔ́ɔ̀ jĩ́á-jè.” ’ ”

⁸ Sɔ̀ìn ɓóɛ gboɛɛ, Bounɓoɔ̀ wùɖù ma ḿ gbo, ké ɔ ɖá,

⁹ “Zɛ̀wáɖáɓèɓòɛ̀ sɔ̃ɔ̀ mɔ̀ nyɔ dè ma ní gbǒɛ̀ hìɖì-kpàɔ̀, ké ɔ kɔ̃̀ sɔ̃ muɛ dyí hwɔùn. Ɔ ɖǎ ná nìǐn, nìí, ní nyɔ ɓěɔ̀ muɛ dyuòùn kà mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ ɖoɓo m̀ ɖé wa gboɛ.

¹⁰ Nyɔ ɖíɛ́ ɓě hwòɖǒ kpá ma ɖé ɖei ti ɓɛ́ kũ̀àɔ̀ kpã ma kɛ, kɛɛ wa mu múàǔn kpáùn ti ɓɛ́ wa mu sɔ́ɔ́-kpò hwɛ̀ìn-gbɔɔ̀ Zɛ̀wáɖáɓèɓò xwa dyéìn nyɛ. “Ɖáùnpò mɛ̀nɛ̌ìn-sɔ̃́ ɓěɔ̀ mɔ̀ mɔ̄ Bounɓoɔ̀ dyéɖé ɓě ɓɛ́ ḿ dyéìn ɓóɖó-kpàà dà séín dyiɛ.”

¹¹ Hwɛ̀ ké ḿ diè ínjàɔ̀ dyi ɖe, ké ḿ ɖá, “Ɖɛ́ mɔ̀ ɔ́ɖè-cù sɔ̃́ ɓě kɔ̃̀ ɖò nìà ɖáùnpò-kɔ̃-dè-ɖɛ̀ɔ̀ ɖiaún, ɓɛ́ ɖò dyià ɖéɛ kunuaún nìɛɛ xwíníín nyɛ́?”

¹² Ké ḿ diè ɔ dyi ɖe, ké ḿ ɖá, “Ɖɛ́ mɔ̀ ɖɔ́ sɔ̃́ ɓě nìà ɔ́ɖè-cù ɓěɔ̀ dya kɛɛ xwíníín nyɛ́? Dyéɛ, wa nì ɓó ɖɛ hwɔìn pío-ɓì mɔ̀ góò saá-saá kɔ̃̀ mú ɓɛ́ ɖáùnpò ɓěɔ̀ cáná síìn kà kɛɛ wáún.”

¹³ Ké ɔ cɛ̃ɛ ḿ gbo, ké ɔ ɖá, “M̀ se ɖɛ mɔ̀ ɖɛ ɓěa xwíníín nyɛɛ dyuòò?” Ké ḿ ɖá, “Ǹdyeo, ɓɔ̌ɔ̀.”

¹⁴ Hwɛ̀ ké ɔ ɖá, “Wa mɔ̀ nyɔ sɔ̃́ ɓě ɓɛ́ Bounɓoɔ̀ ɖǎ gã, ké ɔ ɖǎ wa cáná dúún po, ɓɛ́ wa ké Ɖɛɓíɔ́ mɔ̀ nyɔ kɔ̃̀à ɓóɖó-kpà gànáà wuɖuíɛɛ kũ̀à nyuɛ.”