Zɛ́kɔ̀wáɖádyà 3 - Ɓǎsɔ́ɔ̀ Báɓòɔ̀

Dyí-tɛ̀mɛ̀ìn-ɖɛ̀ ɓá sáa-zà-nyɔ̀ vɛ̀nɛ̀ɔ̀ jè dyíɛ

¹ Sɔ̀ìn ɓóɛ gboɛɛ, Bounɓoɔ̀ tɛ̀mɛ̀ìn ma ḿ Jasúé ɓɛ́ ɔ mɔ̀ ma sáa-zà-nyɔ̀ vɛ̀nɛ̀ kɛɛ dyí. Ɔ nyànà ma ɓó Bounɓoɔ̀ ínjàɔ̀ dyúa dyi, ké Nɔɔ́-nàmàǔn nyànà ma ɓó ɔ ɖiaún dyi, ɓɛ́ ɔ ké ɔ zaa kpɔ̃̀ìn.

² Ké Bounɓoɔ̀ ínjàɔ̀ cɛ̃ɛ ma Nɔɔ́-nàmàǔn gbo, ké ɔ ɖá, “Bounɓoɔ̀ po m̀ ɓɔ́ío, Nɔɔ́-nàmàǔn. Bounɓo mɔ̀ nyɔ ɖǎà Jùɖúsɛ̀ɖɛ̀ìn-hwɔ̀ɖɔ̀ɔ̀ gã kɛɛ po m̀ ɓɔ́í. Má, gàa nìà kɛ hwɔìn cu-ɖɔ́ ɓɛ́ wa bǎ ɖé nyɛ-ɓɔ́ɔ́ ɖò múɛe?”

³ Ɓó tia ɓaɖaa, Jasúé po ma ɖɔ kpɔ̃ zɛ̀nɛ̌ mú, ké ɔ nyànà ma kà ɓó ínjàɔ̀ dyúa dyiɛ̀.

⁴ Ké ínjàɔ̀ cɛ̃ɛ ma ínjà ɓě ɓɛ́ wa nyànà ma ɓó ɔ dyúa dyiɛɛ gbo, ké ɔ ɖá, “Ɓě zà ɔ ɖɔ kpɔ̃ zɛ̀nɛ̌ɔ̀ mú.” Ké ínjàɔ̀ cɛ̃ɛ ma Jasúé gbo, ké ɔ ɖá, “Gmɔ̀ nɔ̄, ḿ ɖǎ nì nàmàǔnɔ̀ m̀ mú zà, ké ní mu m̀ ɖɔ ɖìè kpa ɖɛ ɖò mú poùn.”

⁵ Ké mɔ̄ Zɛ́kɔ̀wáɖádyà cɛ̃ɛ ma ínjà ɓěɔ̀ gbo, ɓɛ́ wa ké dúi-bĩìn-ɖɔ̀ hwɛ̀ zɛ̀nɛ̌ǐn ɖò Jasúé dúi bĩìn. Ɔ jèɛɛ, wa bĩìn ma ɔ dúi-bĩìn-ɖɔ̀ hwɛ̀ zɛ̀nɛ̌ǐn ɖò dúi, ké wa po ma ɔ ɖɔún, ti ɓɛ́ Bounɓoɔ̀ ínjàɔ̀ nyànà ma ɓó dyiɛ.

⁶ Ké Bounɓoɔ̀ ínjàɔ̀ po ma Jasúé náún kóɖó-kóɖó, ké ɔ ɖá,

⁷ “Bounɓo mɔ̀ nyɔ nìà ɖɛ séín kɔ̃in nyɛɛ ɖá, ‘M̀ dyi ní kpeɖe ɓěɔ̀ kíɖíí sí, ké m̀ dyi ní gma ɓěɔ̀ dyi kpɔ̃ ní, nìí, nì mu ní gbǒɔ̀ kèɛ̀ kɔ̃̀pã́ùn ɓěɔ̀ wuɖuí kɔ̃̀ùn, ké ní mu m̀ kpé nyíìn, ɓɛ́ m̀ ké ɓó ḿ dyúa dyiɛ ɓɛ́ìn ɖekè kà dyúáɖò kà ínjà ɓě ɓɛ́ wa nyànàà ɓó ḿ dyúa dyiɛɛ nìà kɛ.

⁸ Jasúé, mɔ̀ mɔ̀à sáa-zà-nyɔ̀ vɛ̀nɛ̀ɔ̀ kɛɛ, tò ɖùǔ. M̀ kè m̀ mǔè sáa-zà-nyɔ̀ ɓě ɓɛ́ wa nìà ɓó m̀ dyúa, ké wa mɔ̀à ɖɛín-ɖɛ̀ nì ɖé dyúa kɛɛ dyí-tɛ̀mɛ̀ìn-ɖɛ̀ kɛɛ mɛ tò ɖùǔ. Gmɔ̀ nɔ̄, ní mu ní gbo-nì-nyɔ̀ mɔ̀ kã́á ɓɛ́ ḿ ɖǎ gã kɛɛ dyàùn.

⁹ Gmɔ̀ nɔ̄, ḿ dè sɔ́ɔ́-kpò ɖò ɓó m̀ dyúa dyi. Sɔ́ɔ́-kpòɔ̀ ɓéɖé gã mɛ̀nɛ̌ìn-sɔ̃́. Ké ní mu céè-dyèɖè ɖò ɖé sɔ́ɔ́-kpòɔ̀ mú ɓúɖúùn, ké ní mu ɓóɖó gàná nìà kɛ nàmàǔn ɓěɔ̀ ɓó dyi zàùn ɓó wé dyúáɖò mú.

¹⁰ Ɓó wéa ɓaɖaa, ɓě nyɔ ɖò-ɖò séín mu ɔ mǔè ɖò ɖáùn, ɓɛ́ wa ké ɓó ɔ géɖéè-gbǎɔ̀ kè ɔ féè-cùɔ̀ xwíɖíi dyi kò. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.’ ”