Wɛ́ɖɛ́ 38 - Ɓǎsɔ́ɔ̀ Báɓòɔ̀

Nyɔ ɓɛ́ ɔ nì gǎ-ɖɛ̀ dyí dyéɛń nyɛɛ ɓaà-wùɖù

Dèɓéɛ̀ wɛ́ɖɛ́ ɓá ɖɛ zɔ̀ jè dyíɛ

¹ Bounɓo, mɔ̀ǔn ɖá ɓɛ́ m̀ ké ḿ gǎ kɔ̃ tò ɖé nì dyoɖoɔ̀ múo, ɓɔ̌ɔ̀. Mɔ̀ǔn ɖá ɓɛ́ m̀ ké ḿ kpeɖe zà ɖé nì dyoɖoɔ̀ múo.

² Dyéɛ, nì sé-kpìì ɓěɔ̀ ɖǎ ḿ mú pa, ké nì sɔ̃ɔ̀ ɖǎ ḿ ɓíɖíi dyi po.

³ Nì dyoɖoɔ̀ nyuɛ ké dyi-káná-káná ɖò se ní kpóɖó-dyùàɔ̀ mú nì. Dyi-káná-káná ɖò se ɖé ní kpá ɓěɔ̀ mú nì ɓó ní nàmàǔn ɓěɔ̀ jè.

⁴ Ní nàmàǔn ɓěɔ̀ nì kà ní-nɔ̀ɔ̀ nìà kɛ, ké ɔ nìǎ ḿ manauń. Wa ku xwa kà gbɛ̌ nìà kɛ, ké ḿ seɛ xwa ɓɛ́ìn ɖe.

⁵ Ní jě ɓěɔ̀ ɖǎ zɔ̃̌, ké wa ɖǎ nyɔ́ po ɓó ní zuɖuu-nàmàǔn ɓěɔ̀ jè.

⁶ Puà-puà nì ɖé ní kpóɖó-dyùàɔ̀ mú mìɔ jèɛɛ, ḿ se dú dyií ɖúɛ ɓɛ́ìn. Ḿ nì vĩ̌ɛń máaún kè dyóɖóaún.

⁷ Ní gbe-zèɖèɔ̀ nì wo-wo nyuɛń. Dyi-káná-káná ɖò se ní kpóɖó-dyùàɔ̀ mú nì.

⁸ Kpé ɖò se ḿ mú nì ɖe jèɛɛ, ḿ ɖǎ dyi wɛ̀ìn gàná cá. Fũ̀à-fṹá dyí ɖé ní hwòɖǒ-dyùàɔ̀ bũ̌ jèɛɛ, ḿ nì kpòɛ̌n.

⁹ Ɖɛɓíɔ́, m̀ dyuò ní hwòɖǒ-kpɔ̃-ɖɛ̀ séínɔ̀ dyí, ké ní kpò-wùɖùɔ̀ se m̀ dyí vǐè.

¹⁰ Ní hwòɖǒɔ̀ ɓaɖa ḿ xwíníín dyi. Kpé ɖò se ḿ dyí nì ɖe, hwɛ̀ ḿ po níiń, ní dyéɖéɔ̀ ní dyé dyi ɖe.

¹¹ Ní ɓǎto ɓěɔ̀ kè ní mǔè tɔ̀ɔ̀ ɓě se ḿ bũ̌in xwɛ̃́ìn mɔ́ ɖe ɓó ní jě ɓěɔ̀ jè, hwɛ̀ ḿ po níiń, ní gbǒ-xwíníín-nyɔ̀ ɓěɔ̀ nyànà ɖé nya dyi vɛ̃in, ké wa ní xwɛ̃́ìn ḿ bũ̌in ɖe.

¹² Nyɔ ɓě ɓɛ́ wa mɔ́à ḿ ɖáɓáa dyiɛɛ gbǎ xwáɖá ɓě ɓó ḿ bìì. Ké nyɔ ɓě ɓɛ́ wa mɔ́à ḿ bũ̌in puàà dyiɛɛ cɛ̃ ní mú gbɔɔ̀ jè. Wa gã̀ ḿ sɔ́uń dyi tee ɓó máaún kè dyóɖóaún.

¹³ Kɛɛ ḿ nyu ḿ mìɔùn pū kà nyɔ mɔ̀ɔ̌ kà ɓoo-ɓoo kɛ. Ḿ se wa ɖùǔ gbo tò, ké ḿ se ní wɔ̃ɔ̀ ɓáà.

¹⁴ Kǎà ḿ hwɔìn ma ɓoo-ɓoo kɔ̃̀ wĩín ɓɛ́ nyɔ-ɓɔ́í-po-wùɖù ɖò se wóɖóɛ ɓɛ́ìn nyɛ.

¹⁵ Óó Bounɓo Ɖɛɓíɔ́ ní Gèɖèpɔ́ɔ̀, ḿ dè m̀ hwòɖǒ kɔ̃. Nì mu ḿ gɔ̃̌ jǔùn.

¹⁶ Ní ɓaà m̀ ní, mɔ̀ǔn wɔ̃́ ké ní mú-nyɛ́-nyɔ̀ ɓěɔ̀ ní nyùìn ḿ múà kɔ̃in. Mɔ̀ǔn wɔ̃́ ké wa ní ɓɔ́ɖɔ́ ɓá ní dyi-kpá-kpá jè dyí.

¹⁷ Ɔ sèǎ ɖɛ tííwè ɓɛ́ ḿ kéá dyi kpá. Ní kpóɖó-dyùàɔ̀ nì puàǔn kánáá pū.

¹⁸ Ḿ wɔ̃́ìn ní nàmàǔnɔ̀ mú, sepóɛɖé ɔ jè gbǎìn ḿ hwòɖǒ dyií.

¹⁹ Ní mú-nyɛ́-nyɔ̀ ɓěɔ̀ káná dyi, ké wa ku dyi. Nyɔ ɓě ɓɛ́ wa nyɛ́à ḿ mú ké ɔ seà xwíníín ɖò kɔ̃̀ɛɛ, wa zi dyí vòɛ̌n mìɔ.

²⁰ Nyɔ ɓě ɓɛ́ wa pɛ́ɛ̀àìn ní ɖɛín-ɖɛ̀ɔ̀ ɖɛ gbà ɖeɛɛ, wa mɔ̀ ḿ gbo-vɔ̃-nyɔ̀ ɓě, sepóɛɖé ḿ ɖɛ̀ɓɛ̀ ɖɛ nɔ̀mɔ̀ dyíin nyu-nyu mú jè.

²¹ Óó Bounɓo, mɔ̀ǔn ɖá ɓɛ́ m̀ ké ḿ dyi táào. Mɔ̀ǔn ɖá ɓɛ́ m̀ ké ḿ bũ̌in tɔmɔìno, ní Gèɖèpɔ́ɔ̀.

²² Ɖɛɓíɔ́, mɔ̀ mɔ̀à ní póìn-nyɔ̀ɛɛ, m̀ mɛ fṹà, ɓɛ́ m̀ ké ḿ gbo kpá.