Wɛ́ɖɛ́ 2 - Ɓǎsɔ́ɔ̀ Báɓòɔ̀

Kã́á ɓɛ́ Bounɓoɔ̀ mìɔùn gã kɛ

¹ Ɖɛ́ kɔ̃̀ jè ɓóɖó-dù ɓěɔ̀ sɔ́à Bounɓoɔ̀ gbo vɔ̃ jè dyí pídyiɛ́? Ɖɛ́ kɔ̃̀ jè waà nyɔ ɓěɔ̀ sɔ́à ɖɛ ɓě se kpáa ɓɛ́ìn nyɛɛ dyí pídyiɛ́?

² Ɓóɖó-dù ɓěɔ̀ kã́á ɓěɔ̀ kè waà wuɖuí-kɔ̃̀-nyɔ̀ tɔ̀ɔ̀ ɓěɔ̀ po kɛ́ɛ́, ké wa sɔ́ Bounɓoɔ̀ kè kã́á ɓɛ́ ɔ ɖǎà gã kɛ.

³ Wa cɛ̃ɛ, ké wa ɖá, “Ɓěà buɛ̀ ɓěà mìɔùn sɔ̀ìn waà gɛ̀ɛ̀ɔ̀ xwíɖíi. Ɓěà sɔ̀ waà nyɔ-wuɖuí-kɔ̃̀-kpèɔ̀ xwíɖíi.”

⁴ Kɛɛ Bounɓo ɓɛ́ ɔ nìà ɖé ɔ zèèɔ̀ kɔ̃ ɖé dyɔún wɛ̃ɛ nì wɔ̃in kéɛ̀ǐn. Ɔ ɓaɖa wa dyɔ́ ɓó wa nyɔ-sɔ́-sɔ́ se ɖɛ kpa ɓěɔ̀ jè.

⁵ Hwɛ̀ ké ɔ kpá dyoɖoún, ké ɔ wùɖù wa gbo gana-kà, ké ɔ po wa fã̀àǔn ɖé ɔ dyoɖoɔ̀ mú.

⁶ Ké ɔ ɖá, “Ḿ ɖǎ kã́á ɓɛ́ m̀ gã kɛɛ kũ̀à kɔ̃ún po, ɖé Zádyɔún mɔ̀à ní toɖo hwɛ̀ǐn-hwɛ̀ǐnɔ̀ kɛɛ dya.”

⁷ Hwɛ̀ ké kã́áɔ̀ ɖú wuɖuí, ké ɔ ɖá, “Ní mu wuɖu dyi poùn ɓá ɖɛ Bounɓoɔ̀ ɖǎ cɛ̃ɛ jè dyí. Bounɓoɔ̀ cɛ̃ɛ ḿ gbo, ké ɔ ɖá, ‘M̀ mɔ̀ǎ ní dyú-gàà, ké ḿ mɔ̀ǎ nì ɓǎ ɓó zɛ̃̌ɛ̀.

⁸ M̀ dyi ḿ ɖɛ zɔ̀ìn ní, ní mu m̀ ɓóɖó-dù séín ɓěɔ̀ nyíìn. Ɓóɖó-kpà gànáà mu nì kɔ̃̀ɔ̀-ɖɛ̀ jǔùn.

⁹ Nì mu wa toún ɖuùn ɖé nì gana-sɔ̃̀ɔ̀ mú. Nì mu wa dyi wàìn kà nyɔ wàìn mɛ-dyàà ɖò dyiɛ.’ ”

¹⁰ Ɔ ná nì jèɛɛ, ɓě mɔ̀à ɓóɖó-dù ɓěɔ̀ kã́á ɓě kè waà wuɖuí-kɔ̃̀-nyɔ̀ tɔ̀ɔ̀ ɓěɛɛ, ɓě tò ná-wùɖù nìà kɛ gbo ɖùǔ.

¹¹ Ɓě ɓiè Bounɓoɔ̀ ɖé ɔ kpéín-dyé-dyé mú.

¹² Ɓě mɛ fɛ̃̀ìn Bounɓoɔ̀ dyi, ɓɛ́ ɓě ké ɔ dyúa dú hwuɖu taɓa. Ɓě seɛ náa nyuín, ɔ mu ɓě dyoɖoún kpáìn wàɖà, ké ɓě mu mɛ́ìn wàɖà cá. Nyɔ séín ɓě ɓɛ́ wa pèɖèìn ɖé Bounɓoɔ̀ gboɛɛ, mana mu wa kɔ̃ nììn.