Tátɔ̀ 2 - Ɓǎsɔ́ɔ̀ Báɓòɔ̀

Tɛ̀mɛ̀ìn-ɖɛ̀ nɔ̀mɔ̀ dyíin

¹ Kɛɛ mɔ̀ùn mɛ tɛ̀mɛ̀ìn ɖɛ ɓě ɓɛ́ wa nɔ̀mɔ̀ dyíin, ɓɛ́ nyɔǔn jǎà-ɖɛ̀-tɛ̀mɛ̀ìn-nyɔ̀ kéɔ́ nyɔǔn tɛ̀mɛ̀ìn nyɛ.

² M̀ mɛ cɛ̃ɛ gàa vɛ̀nɛ̀ ɓěɔ̀ gbo, ɓɛ́ wa hwòɖǒ ké mú ma, ɓɛ́ wa ké hwòɖǒ-fɔ̀nɔ̀-fɔ̀nɔ̀ ɓéɖé, ɓɛ́ wa ké wa mìɔùn dyí kpɔ̃. Cɛ̃ɛ wa gbo, ɓɛ́ wa ké dyi ku ɖé hwìɖǐǐ-taɓa-taɓa kè ɖɛ̀ɓɛ̀ǐn-ɖɛ̀ɓɛ̀ǐn ɔ kè hwòɖǒ-ku-ku mú.

³ Kà dyúáɖòɔ̀ kǎà m̀ mɛ cɛ̃ɛ màa vɛ̀nɛ̀ ɓěɔ̀ gbo, ɓɛ́ waà nyuu-kpèɖè ké nì kà ɓɛ́ nyɔ ɓě ɖǎà wa mìɔùn Gèɖèpɔ́ɔ̀ xwáɖáún zàìn nyɛɛ nyuu-kpèɖè kéɔ́ nìɛ̀ nyuɛ. Wa ní zeɖe nyɔǔn nyɛ́nɛ́, ké wa ní ɖá ɓɛ́ wa ké nɔmɔɔɛ̀ gǐì jǔ. Wa mɛ tɛ̀mɛ̀ìn nyɔǔn ɖɛ ɓě ɓɛ́ wa nɔ̀mɔ̀ dyíin nyɛ,

⁴ ɓɛ́ wa ké màa-dyù gmɔ̀ ɓěɔ̀ ɖɛ tɛ̀mɛ̀ìn. Ɖɛ ɓěɔ̀ mɔ̀, ɓɛ́ wa ké waà dyú-ɓǎ ɓě kè waà dyú ɓě mú ɖɛ̀ɓɛ̀,

⁵ ɓɛ́ wa ké wa mìɔùn dyí kpɔ̃, ɓɛ́ wa ké se múàǔn vò, ɓɛ́ wa ké wa ɓíɖí-taún dyí gmɔ̀, ɓɛ́ wa ké kpeɖeín nɔ̀mɔ̀, ɓɛ́ wa ké waà dyú-ɓǎ ɓěɔ̀ xwíɖíi nì, ɓɛ́ nyɔ ɖò ní kɔ̃̀ ɖà Gèɖèpɔ́ɔ̀-wùɖùɔ̀ wuɖu gbà kɔ̃ún cɛ̃.

⁶ Kà dyúáɖòɔ̀ kǎà m̀ mɛ po gàa-dyù gmɔ̀ ɓěɔ̀ náún, ɓɛ́ wa ké wa mìɔùn dyí kpɔ̃.

⁷ M̀ mìɔùn mɛ jǔ dyí-tɛ̀mɛ̀ìn-ɖɛ̀ ɖé kũ̀à nɔ̀mɔ̀ dyíin mú, ɖé ɖɛ séín mú. M̀ dyi nyɔǔn ɖɛ tɛ̀mɛ̀ìn ní, nìí, m̀ mɛ nyu jǎà, ɓɛ́ nì hwòɖǒ ké mú ma.

⁸ M̀ mɛ po wuɖu nɔ̀mɔ̀ dyíin ɓɛ́ wa se ɖɛ gbà ɖò mú dyéɛ ɓɛ́ìn nyɛ. Nìí, nyɔ ɓě vɔ̃à m̀ gboɛɛ se ɖɛ gbà ɖò ɓéɖéɛ mu, ɓɛ́ wa kéɛ à kɔ̃ún cɛ̃, ké dɛ̃ mu wa nyuùn.

⁹ Gǐì ɓě ɓéɖé ɓɛ́ wa ké waà wuɖuí-kɔ̃̀-nyɔ̀ ɓěɔ̀ wuɖu nyu, ɓɛ́ wa kéɛ nyu ɓɛ́ wa hwòɖǒ ké dyi dè ɖé ɖɛ séín mú. Wa ní ɖá ɓɛ́ wa ké waà wuɖuí-kɔ̃̀-nyɔ̀ ɓěɔ̀ wĩín dyá.

¹⁰ Ké wa ní ɖá ɓɛ́ wa ké wa ɖɛ ɖò dyíɖí. Kɛɛ wa mɛ tɛ̀mɛ̀ìn wa dyí kà wa kpeɖe nɔ̀mɔ̀ dyíin, ké wa ɓɛ́ìn wa hwòɖǒ kɔ̃ dèɛ̀ teeɛ. Wa mɛ nyuɛ náa, ɓɛ́ nyɔǔn ké ɖɛ nɔ̀mɔ̀ dyíin ɓá tɛ̀mɛ̀ìn-ɖɛ̀ ɓɛ́ ɔ ɓá Gèɖèpɔ́ɔ̀ mɔ̀à à Póìn-nyɔ̀ɔ̀ kɛ dyíɛɛ jè cɛ̃ ɖé ɖɛ séín ɓě ɓɛ́ wa nyuɛɛ mú.

¹¹ Sepóɛɖé Gèɖèpɔ́ɔ̀ ɖǎ ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ nyɔǔn dyí tɛ̀mɛ̀ìn ɓó wa séín-sèǐn pó jè.

¹² Ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ nyuɛ ké ɔ po à náún, ɓɛ́ à ké se-Gèɖèpɔ́ɔ̀-dyí-dyuò-kpèɖèɔ̀ kè ɖɛ-gbà-nyu-tò nìà ɓóɖó-kpàà kɔ̃ɛɛ dyi táà, ɓɛ́ à ké à mìɔùn dyí kpɔ̃, ɓɛ́ à ké dyí sɛ́ɖɛ́ìn, ɓɛ́ à ké Gèɖèpɔ́ɔ̀ bìì cĩ́ nɔ̄ ɓóɖó-kpàà kɔ̃,

¹³ kà ɓɛ́ à muà múà-ɖɛ̀ ɓɛ́ à dèà hwòɖǒ kɔ̃ɛɛ fòɛ̌n nììn nyɛ. Ɔ mɔ̀ ti ɓɛ́ à Gèɖèpɔ́ɔ̀ vɛ̀nɛ̀ kè à Póìn-nyɔ̀ Jízɛ̀ Kɛ́ɖɛ́ì dĩ́ín-dĩ̀ìnɔ̀ muà xwáɖáún wóɖóùn wɛ̃.

¹⁴ Ɔ tò ɔ mìɔùn ɓó à bìì, ɓɛ́ ɔ ké à nàmàǔn séín ɓěɔ̀ xwaún póìn, ɓɛ́ ɔ ké à wáká po ɖé ɔ mìɔùn gbo, ɓɛ́ à ké ɔ ɖòùn nììn nyɔ ɓě jǔ. Ɔ mɔ̀ nyɔ ɓě ɓɛ́ wa hwòɖǒ fṹà ɓɛ́ wa ké ɖɛ nɔ̀mɔ̀ dyíin nyuɛ.

¹⁵ Cɛ̃ ɖɛ ɓě nìà kɛ nyɔ ɓěɔ̀ gbo. Po wa kpéí, ké po wa ɓɔ́í ɖé nì kpé séín mú. Mɔ̀ǔn wɔ̃́ ɓɛ́ nyɔ ɖò ké se m̀ ɖɛ ɖá.