Wɛ̀ɖɛ̀ɓèɖésĩ̀ɔ̀ 9 - Ɓǎsɔ́ɔ̀ Báɓòɔ̀

¹ Ké ínjàɔ̀ hm̀m̌ nììnɔ̀ ɓaɖa ma ɔ gã̀àɔ̀. Ké ḿ dyé ma dɛ̀nɛ̀-dyù ɖò ɓɛ́ ɔ ɓuɖu ma ɖé dyɔɔ̀ dyí, ké ɔ kpá ma ɓíɖíi kɛ. Ké wa nyí ma ɔ ɓí vɛ̀nɛ̀ tɔ̀mɔ̀ǔn-tɔ̀mɔ̀ǔnɔ̀ kaàìn-ɖɛ̀ɔ̀.

² Ké ɔ kaà ma ɓíɔ̀, ké nyànà-sò sɔ̀ ma ɖé ɓíɔ̀ mú kà nyànà-sò sɔ̀à nyɛ-ɓɔ́ɔ́ vɛ̀nɛ̀ ɖò múɛ. Ké nyànà-sò sɔ̀ ma ɖé ɓíɔ̀ múɛɛ nyuɛ ké dyóɖóɔ̀ kè pìɔ̌ɔ̀ kpè ma mìɔ.

³ Ké kpã̌ùn vɛ̀nɛ̀-vɛ̀nɛ̀ ɓě sɔ̀ ma ɖé nyànà-sòɔ̀ mú, ké wa dyi ma ɓóɖó-kpàà kɔ̃. Wa ɓéɖé ma kpé kà gĩ́á nìà kɛ.

⁴ Wa cɛ̃ɛ ma wa gbo, ɓɛ́ wa ké se ma pìǐ ɓěɔ̀ kè cu ɓěɔ̀ ɔ kè ɓáá-ɖɛ̀ tɔ̀ɔ̀ séín ɓěɔ̀ ɖò dyíin nyìnììn. Wa ɓéɖé ɓɛ́ wa ké ma nyɔ ɓě se ma Gèɖèpɔ́ɔ̀ dyí-dyuòìn-bɛ̃̀ɔ̀ waà dyúa-kpàɔ̀ kɔ̃ ɓéɖéɛɛ ɖòùn gǎ dyéìn.

⁵ Kpã̌ùn ɓěɔ̀ se ɓéɖé ɓɛ́ wa ké ma nyɔ ɓěɔ̀ ɖáɓá, kɛɛ ɔ mɔ̀ ɓɛ́ wa ké ma wa gǎ dyéìn ɓó dɛ̀nɛ̀ hm̀m̌ xwíníín. Ké gǎ ɓɛ́ wa dyé ma kɛɛ nì ma pū kà gĩ́á dyià nyɔ sũín, kà ɔ nyuà nyɔ puàà kɛ.

⁶ Ké ɓó tia ɓaɖaa, nyɔǔn ɓě mu mɔ́ùn ɓɛ́ wa ké mɛ́, kɛɛ wa se mɛ́ɛ mu. Mɛ́-tò mu wa nyuùn, kɛɛ gĩɔ se wa kpaá mu.

⁷ Kpã̌ùn ɓěɔ̀ nì ma kà sǒ ɓě ɖǎà ti dyé ɓɛ́ wa kéà to vɔ̃ɛɛ nìà kɛ. Ké ɖɛ ɓě kè góò-gbàǎ hwɔìn nyɛɛ nì ma wa dú, ké wa dyúa-kpà ɓěɔ̀ nì ma kà nyɔǔn-dyùɛ̀ dyúa-kpà nìà kɛ.

⁸ Waà mí ɓěɔ̀ nì ma kà neě ɓěɛ̀ mí nìà kɛ. Waà nyɛ́nɛ́ ɓěɔ̀ nì ma kà ganìǎ ɓěɛ̀ nyɛ́nɛ́ nìà kɛ.

⁹ Ɖɛ ɓě nì ma wa kɛ́ín, ké ɔ nì ma kà dyí-gmɔ̀ìn-ɖɛ̀ ɓɛ́ wa nyùìn nɛɛ̀-kpà kɛ. Jĩ̌ ɓɛ́ wa pìɔ̌ ɓěɔ̀ nyu ma kɛɛ, ɔ nì ma kà hwíì-sǒ pàɖǎ ɓɛ́ wa nìà to gbo kpauń gana-kà kɛɛ jĩ̌ nìà kɛ.

¹⁰ Wa ɓéɖé ma vɔ̃ ɓě kà gĩ́á ɓě nìà kɛ, ɓɛ́ wa ké nyɔǔn sũ. Ké wa vɔ̃ ɓěɔ̀ mú, ɖéɛ̀ kpé ɓě ɓɛ́ wa ɓéɖéà, ɓɛ́ wa kéà nyɔǔn gǎ dyéìn ɓó dɛ̀nɛ̀ hm̀m̌ xwíníín nyɛɛ nìà kɛ̀.

¹¹ Wa ɓéɖé wa nììn wuɖuí-kɔ̃̀-nyɔ̀ ɖò. Ɔ mɔ̀ ínjà ɓɛ́ ɔ kɔ̃̀à ɓí vɛ̀nɛ̀ɔ̀ wuɖuíɛ. Ɔ Híìbúɖúù-nyɛ̀nɛ̀ mɔ̀ Àbáɖɔ̀ùn, ké ɔ Gíɖíì-nyɛ̀nɛ̀ mɔ̀ Àpɔ́ɖìɔ̀ùn. (Ɔ xwíníín mɔ̀ nyɔ-mú-gbɔɔ̀-nyɔ̀.)

¹² Wìì-ɖɛ̀ɔ̀ kĩ́ín-kĩ́ínɔ̀ ɖǎ dyi zi. Kɛɛ ḿ ɖáo, ɔ sɔ̃́ sè ɓó ɓɛ́ wa ké dyi ke.

¹³ Ké ínjàɔ̀ mɛ̀nɛ̌ìn-ɖò nììnɔ̀ ɓaɖa ma ɔ nììn gã̀àɔ̀. Ké ḿ wɔ̃́ ma wuɖu ɖò sɔ̀ìn ɖé sáa-kɔ̃-zàìn-gbàà ɓɛ́ wa nyùìn ma góò, ɓɛ́ ɔ nì ma kà ɓó Gèɖèpɔ́ɔ̀ dyúa kɛɛ gã hĩinyɛ ɓěɔ̀ kɔ̃.

¹⁴ Wuɖuɔ̀ cɛ̃ɛ ma ínjàɔ̀ mɛ̀nɛ̌ìn-ɖò nììn ɓɛ́ ɔ ɓéɖé ma kà gã̀àɔ̀ xwaa gbo, ké ɔ ɖá, “Buɛ̀ ínjà hĩinyɛ ɓě ɓɛ́ wa sãà, ké wa nìà ɖé ní vɛ̀nɛ̀ mɔ̀à Dyùféɖétì kɛɛ gboɛ.”

¹⁵ Ké ɔ buɛ̀ ma ínjà hĩinyɛ ɓěɔ̀. Wa ɖǎ ma wa ti dyéìn ɓó zɔ̃ jɛ́ɛ́ nìà kɛ kè dɛ̀nɛ̀ jɛ́ɛ́ nìà kɛ kè wé jɛ́ɛ́ nìà kɛ ɔ kè ti jɛ́ɛ́ nìà kɛ jè, ɓɛ́ wa ké nyɔǔn-dyù ɓěɔ̀ dúɔ̀ tã nììnɔ̀ ɖáɓá.

¹⁶ Ké ḿ dyuò ma sójà jĩ̀ kà ɓɛ́ wa nì ma sǒ kɔ̃ún wɛ̃ɛ dyí. Wa mɔ̀ ma méɖìɔ̀ùn hɔ̃dɛ̀ɖɛ̀ sɔ̃́.

¹⁷ Ké ɖé ní dyí-tɛ̀mɛ̀ìn-ɖɛ̀ɔ̀ múɛɛ, ḿ dyé ma sǒ ɓěɔ̀ kè waà nàìn-nyɔ̀ ɓěɔ̀. Dyí-gmɔ̀ìn-ɖɛ̀ ɓě nì ma wa kɛ́ín nyɛɛ bo ma kà nyɛ nìà kɛ, ké wa nì ma kà sɔ́ɔ́ dyéɖé ɖàɓàìn kpèɛ̀ mɔ̀à sááfɔ̀ kɛɛ nìà kɛ, ké wa nì ma kà sɔ́fà-sɔ̀ɔ̌ ɓɛ́ ɔ nì kà ɖaa-cànà nìà kɛ. Sǒ ɓěɔ̀ dú ɓěɔ̀ nì ma kà ganìǎ-dù nìà kɛ. Nyɛ kè nyànà-sò ɔ kè sɔ́fà-sɔ̀ɔ̌ sɔ̀ ma wa wɔ̃ ɓěɔ̀ mú.

¹⁸ Nyɔ-gǎ-dyéìn-ɖɛ̀ ɓě nìà kɛ ɖáɓá ma nyɔǔn-dyù ɓěɔ̀ dúɔ̀ tã nììnɔ̀. Ɔ mɔ̀ nyɛ kè nyànà-sò ɔ kè sɔ́fà-sɔ̀ɔ̌ ɓě sɔ̀ ma kà ɖé sǒ ɓěɔ̀ wĩín nyɛ.

¹⁹ Sepóɛɖé kpé ɓɛ́ sǒ ɓěɔ̀ ɓéɖé ma kà kɛɛ nì ma wa wĩín, ɔ kè ɖé wa vɔ̃ ɓěɔ̀ mú. Waà vɔ̃ ɓěɔ̀ nì ma kà sɛ nìà kɛ. Waà vɔ̃ ɓěɔ̀ ɓéɖé ma dú-ɓò ɓě, ké wa puàìn ma wa nyɔǔn ɓě.

²⁰ Nyɔ tɔ̀ɔ̀ ɓě ɓɛ́ nyɔǔn-gǎ-dyéìn-ɖɛ̀ ɓě nìà kɛ se ma ɖáɓáa, wa se ma ɖɛ ɓě ɓɛ́ wa mìɔùn ɖǎ ma kà nyuɛɛ kɔ̃ín pòìn. Wa se ma zùù gbà ɓièɛ̀ ɓɔ́, ké wa se kũùn-kpò ɓɛ́ wa nyùìn góò kè séɓàɖà kè bàɖàsǐ kè sɔ́ɔ́ ɔ kè cu, ɓɛ́ wa seà dyi dyéɛ ɓɛ́ìn, ké wa seà dyi wɔ̃́ɔ ɓɛ́ìn, ké wa seà nàà ɓɛ́ìn nyɛɛ ɓièɛ̀ ɓɔ́.

²¹ Ké kpeɖe ɓě ɓɛ́ wa nì ma kà nyuɛń, ɓɛ́ wa mɔ̀à kú-ɖáɓá-ɖáɓá kè hwĩɔ̀-nyu-nyu kè gbàɖàùn-po-po ɔ kè dyíɖí-dyíɖí kɛɛ, wa seɛ ma dyi táà.