Wɛ̀ɖɛ̀ɓèɖésĩ̀ɔ̀ 8 - Ɓǎsɔ́ɔ̀ Báɓòɔ̀

Céè-ɖɛ̀-mìɔ̀ kã̀ìn-ɖɛ̀ mɛ̀nɛ̌ìn-sɔ̃́ɔ̀ kè góò-pǎniɔ̀

¹ Ké ti Ɓáɖáá-dyùɔ̀ nyìnììn ma kã̀ìn-ɖɛ̀ɔ̀ mɛ̀nɛ̌ìn-sɔ̃́ nììnɔ̀ dyíin nyɛɛ, xwiè-wùɖù ɖò se ma ɖé dyɔún nì tee, ké ɔ ɓɛ́ìn ma áɓà fáún-fáún nyuɛ.

² Ké ḿ dyé ma ínjà mɛ̀nɛ̌ìn-sɔ̃́ ɓě ɓɛ́ wa nyànà ma ɔ dyúa dyiɛ, ké wa ɓéɖé ma gã̀à mɛ̀nɛ̌ìn-sɔ̃́.

³ Ké ínjàɔ̀ ɖò ɓéɖé ma góò-pǎni ɖò, ɓɛ́ ɔ ké ma ɖé nyɔ́ún-nɔ̀mɔ̀-ɖɛ̀ fɔ̃̀ìn nyɛɛ dyi ma, ké ɔ nyànà ma ɓó sáa-kɔ̃-zàìn-gbààɔ̀ gbo dyi. Wa nyí ma ɔ nyɔ́ún-nɔ̀mɔ̀-ɖɛ̀ pàɖǎ, ɓɛ́ ɔ kéɛ ma Gèɖèpɔ́ɔ̀-nyɔ̀ séín ɓěɔ̀ ɓaà-ɓaàɔ̀ kɔ̃ po, ɓɛ́ ɔ kéɛ ma Gèɖèpɔ́ɔ̀ nyí ɓó sáa-kɔ̃-zàìn-gbàà ɓɛ́ wa nyùìn ma góò, ɓɛ́ ɔ nì ma ɓó zèèɔ̀ dyúa kɛɛ kɔ̃.

⁴ Ké ɖɛ ɓě ɓɛ́ wa fɔ̃ ma kà kɛɛ nyànà-sòɔ̀ kè Gèɖèpɔ́ɔ̀-nyɔ̀ ɓěɔ̀ ɓaà-ɓaàɔ̀ sɔ̀ìn ma ɖé ínjà nyànà ma kà ɓó Gèɖèpɔ́ɔ̀ dyúa dyiɛɛ xwaún, ké ɔ mu ma dyií.

⁵ Ké ínjàɔ̀ ɖú ma pániɔ̀ dyí, ké ɔ zà ma nyɛ ɓó sáa-kɔ̃-zàìn-gbààɔ̀ kɔ̃, ké ɔ dyíɛ̀n ma pániɔ̀ mú, ké ɔ wáɖáa ma ɓóɖó-kpàà kɔ̃. Ké zɛ ɖú ma páná kpàǐ, ké kuɖu-kuɖu ɓě nì ma ɖé. Wɛ́ɖɛ́-wɛ́ɖɛ́ po ma, ké ɓóɖó-kpàà túò ma dyi.

Gã̀à ɓěɔ̀

⁶ Ínjà mɛ̀nɛ̌ìn-sɔ̃́ ɓě ɓéɖé ma kà gã̀à mɛ̀nɛ̌ìn-sɔ̃́ ɓěɔ̀ xwaa nìǎ ma ti dyéɛń ɓɛ́ wa ké ma wa ɓaɖa.

⁷ Ké ínjàɔ̀ kĩ́ín-kĩ́ínɔ̀ ɓaɖa ma ɔ gã̀àɔ̀. Sɔ̃̀ɔ̀-kpò ɓě kè nyɛ caìn ma nyɔmɔɔ, ké wa wáɖá ma ɓíɖíi nɔ̄ ɓóɖó-kpàà kɔ̃. Ké ɓóɖó-kpàà wákáɔ̀ tã nììnɔ̀ sĩ ma, ké cu ɓěɔ̀ dúɔ̀ tã nììnɔ̀ sĩ ma, ké pìǐ séín sĩ ma.

⁸ Ké ínjàɔ̀ sɔ̃́ nììnɔ̀ ɓaɖa ma ɔ nììn gã̀àɔ̀. Ké wa po ma ɖɛ hwɔ toɖo vɛ̀nɛ̀ nì sĩɛń ɖò ɖé dyóóɔ̀ kɔ̃.

⁹ Ké dyóóɔ̀ wákáɔ̀ tã nììnɔ̀ zɛ̃̀ìn ma nyɔmɔɔ mú, ké ɖɛ ɓě nì cĩ́ɛń nì ma kà ɖé dyóóɔ̀ kɔ̃ɛɛ dúɔ̀ tã nììnɔ̀ mɛ́ ma. Ké séè-xwì-hwɔ̀ ɓěɔ̀ dúɔ̀ tã nììnɔ̀ gbɔɔ̀ ma mú.

¹⁰ Ké ínjàɔ̀ tã nììnɔ̀ ɓaɖa ma ɔ gã̀àɔ̀. Ké dɛ̀nɛ̀-dyù ɓɛ́ ɔ ɓúá dyí ké ɔ zi dɛ̀nɛ̀-dyù tɔ̀ɔ̀ ɓě dyíɛɛ ɓuɖu ma ɖé dyɔɔ̀ dyí. Ɔ nì ma wãuń kà dɔ̀ɔ̀ nìà kɛ, ké ɔ kpá ma ní ɓěɔ̀ dúɔ̀ tã nììnɔ̀ kè ní-dù ɓěɔ̀ kɔ̃.

¹¹ Dɛ̀nɛ̀-dyùɔ̀ nyɛ́nɛ́ mɔ̀ Ɖɛ Nɛɛ̀-nɛɛ̀. Ké níɔ̀ wákáɔ̀ tã nììnɔ̀ nɛɛ̀ ma, ké nyɔǔn ɓáún-ɓáún ɓě ná ma níɔ̀ kɛɛ mɛ́ ma, sepóɛɖé níɔ̀ nɛɛ̀ ma jè.

¹² Ké ínjàɔ̀ hĩinyɛ nììnɔ̀ ɓaɖa ma ɔ gã̀àɔ̀. Ɖɛ ɖò taɓa ma dyóɖóɔ̀ wákáɔ̀ tã nììnɔ̀ kè dɛ̀nɛ̀ɔ̀ wákáɔ̀ tã nììnɔ̀ ɔ kè dɛ̀nɛ̀-dyù ɓěɔ̀ dúɔ̀ tã nììnɔ̀, ké waà ceɔ̀ sɔ̀ ma kɔ̃. Ké ɓó zɔ̃-zɔ̃-ɓàɖà kɛɛ, ce se ma fɔ̀nɔ̀ ɓó áɓà hĩinyɛ xwíníín, ké kǎà ɔ nì ma ɓó máaún-kà.

¹³ Ké ḿ gmɔ̀ ma ɖé, ké ḿ wɔ̃́ ma ke ɖò nì ma ɖéé ɖé dyɔɔ̀ dyí ziɛń nyɛɛ wuɖu. Ké ɔ páná ma mú, ké ɔ ɖá, “Óó ɔ nì wìì, óó ɔ nì wìì, óó ɔ nì wìì. Ti ɓɛ́ gã̀à ɓɛ́ ínjà tã ɓě mɔ̀ùn sèà ɓíɖíiɛɛ muà ɓaɖaùn kàǔn wɛ̃ɛ mu wúɖúùn wɛ̃ɛ, nyɔ ɓě cĩ́à ɓóɖó-kpàà kɔ̃ɛɛ jè mɔ̀ wìì-ɖɛ̀.”