Wɛ̀ɖɛ̀ɓèɖésĩ̀ɔ̀ 7 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ táázĩ̀ìn hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hĩinyɛ

¹ Ti ɖɛ nìà kɛ ɖǎ ma dyi ziɛɛ, ḿ dyé ma ínjà hĩinyɛ, ké wa nyànà ma ɖé ɓóɖó-kpàà gã hĩinyɛ ɓěɔ̀ gboi. Ké wa kpɔ̃ ma ɓóɖó-kpàà pìɔ̌ hĩinyɛ ɓěɔ̀ dyí, ɓɛ́ wa ní kɔ̃̀ ɖà ma ɓóɖó-kpàà kè dyóóɔ̀ ɔ kè cu ɓěɔ̀ ɖò ɓaɖa.

² Ké ḿ dyé ma ínjà ɖò mɔ̀ùn ɖe, ké ɔ sɔ̀ìn ma ɖé dyóɖó-xwáɖáún-wóɖóìn-naínɔ̀. Ké ɔ ɓéɖé ma nì-nì Gèɖèpɔ́ɔ̀ dyí-dyuòìn-bɛ̃̀-nyùìn-ɖɛ̀ɔ̀. Ké ɔ páná ma mú ɖé wuɖu zoo mú, ɖé ínjà hĩinyɛ ɓɛ́ Gèɖèpɔ́ɔ̀ nyí ma kpé, ɓɛ́ wa kéà ɓóɖó-kpàà kè dyóóɔ̀ dyíin nyìnììn nyɛɛ gbo.

³ Ɔ ɖá, “Ɓěǐn ɖá ɓɛ́ ɓě ké ɓóɖó-kpàɔ̀ kè dyóóɔ̀ ɔ kè cu ɓěɔ̀ dyíin nyìnììn, ɓɛ́ à ké à Gèɖèpɔ́ɔ̀ dyí-dyuòìn-bɛ̃̀ɔ̀ ɔ gbo-nì-nyɔ̀ ɓěɔ̀ dyúa-kpà ɓěɔ̀ kɔ̃ po hwɛ̀.”

⁴ Ké ḿ dyuò ma nyɔ jĩ̀ kà ɓɛ́ wa ɖǎ ma dyí-dyuòìn-bɛ̃̀ɔ̀ ɓéɖéɛɛ dyí. Ɔ mɔ̀ ma nyɔ-kpò táázĩ̀ìn hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hĩinyɛ sɔ̀ìn ɖé Éézùɖùɛ̀-nyɔ̀ ɓěɔ̀ xwéɖé-dù séín ɓěɔ̀ hwìɛ̀.

⁵ Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Júɖàà xwéɖé-dùɔ̀ mú. Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Wuɖuɓíínɛ̀ xwéɖé-dùɔ̀ mú. Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Gáà xwéɖé-dùɔ̀ mú.

⁶ Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Ásàà xwéɖé-dùɔ̀ mú. Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Náfátàɖìɛ̀ xwéɖé-dùɔ̀ mú. Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Mànásìɛ̀ xwéɖé-dùɔ̀ mú.

⁷ Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Símìɔ̀ɛ̀ xwéɖé-dùɔ̀ mú. Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Ɖíìváà xwéɖé-dùɔ̀ mú. Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Ɛ́sàkàà xwéɖé-dùɔ̀ mú.

⁸ Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Zɛ́ɓíúɖɔ̀ùnɛ̀ xwéɖé-dùɔ̀ mú. Nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Jòséɛ̀ xwéɖé-dùɔ̀ mú, ké nyɔ-kpò táázĩ̀ìn ɓaɖa-bùè sè sɔ̃́ sɔ̀ ma ɖé Bɛ̃́címàà xwéɖé-dùɔ̀ mú.

Nyɔ kúɖúú sɔ̀ìn ɓóɖó-dù séín kɔ̃

⁹ Ti ɖɛ nìà kɛ ɖǎ ma dyi ziɛɛ, ḿ gmɔ̀ ma ɖé, ké ḿ dyé ma nyɔ kúɖúú ɓě cá. Nyɔ ɖò se wa dyí gbɛ̌ìn ɓɛ́ìn. Wa sɔ̀ìn ma ɖé ɓóɖó-dù séín kè xwéɖé-dù séín kè nyɔ-dù kò-kò séín ɔ kè nyɔ ɓě po wuɖu kò-kò ɓěɛɛ hwìɛ̀. Wa nyànà ɖé zèèɔ̀ kè Ɓáɖáá-dyùɔ̀ dyúa dyi. Wa po ma ɖɔ púú mú. Wa ɓéɖé ma hwɛ̃-mì ɓě xwa.

¹⁰ Ké wa páná ma mú ɖé wuɖu zoo mú, ké wa ɖá, “À pó-póɔ̀ sɔ̀ìn ɖé à Gèɖèpɔ́ɔ̀ mɔ̀ nyɔ dèɖěà ɖé zèèɔ̀ kɔ̃ dyaa kè sɔ̀ìn ɖé Ɓáɖáá-dyùɔ̀ gbo.”

¹¹ Ké ínjà séín ɓěɔ̀ nyànà ma ɓó zèèɔ̀ kè nyɔ vɛ̀nɛ̀ ɓěɔ̀ ɔ kè mɛɛ-ɖɛ̀ cĩ́-cĩ́ hĩinyɛ ɓěɔ̀ ɖei. Ké wa ɓùɖùìn ma wa dyúa-kpà ɓěɔ̀ kɔ̃, ké wa ɓiè ma Gèɖèpɔ́ɔ̀.

¹² Ké wa ɖá, “Kǎà ɔ mɛ nì. À Gèɖèpɔ́ɔ̀ mɛ ɓéɖé ɓàìn-ɓàìn kè dĩ́ín-dĩ̀ìn kè hwòɖǒ-fɔ̀nɔ̀-fɔ̀nɔ̀ kè zùo-po-po kè dya-dè-dè kè kpé ɔ kè gana ɓó sè-ná-sèɛ̀ tiín. Kǎà ɔ mɛ nì.”

¹³ Ké nyɔ vɛ̀nɛ̀ ɓěɔ̀ dyúáɖò diè ma ḿ dyí, ké ɔ ɖá, “Nyɛ́ ɓě poà kà ɖé ɖɔ púú múɛ́? Ké dɛ̌ wa sɔ̀ìn nyɛ́?”

¹⁴ Ké ḿ cɛ̃ɛ ma ɔ gbo, ké ḿ ɖá, “Ɓɔ̌ɔ̀, mɔ̀ mɔ̀ nyɔ dyuòɛ̀.” Ké ɔ cɛ̃ɛ ḿ gbo, ké ɔ ɖá, “Nyɔ ɓě nìà kɛ mɔ̀ nyɔ ɓě ɓɛ́ wa ɖǎ gǎ-dyéìn-dyéìn vɛ̀nɛ̀ɔ̀ xwaún póɛ. Wa ɖǎ waà ɖɔ ɓěɔ̀ wɔɔ̀, ké Ɓáɖáá-dyùɔ̀ nyɔmɔɔ̀ ɖǎa nyu ké wa ɖǎ púú nì.

¹⁵ Ɔ jèɛɛ, wa nyànàà Gèɖèpɔ́ɔ̀ zèèɔ̀ dyúa dyiɛ̀, ké wa ɓièà ɔ ɓó máaún kè dyóɖóaún ɖé ɔ gbǒɔ̀ múɛ̀. Nyɔ mɔ̀ nyɔ dèɖěà ɖé zèèɔ̀ kɔ̃ dya kɛɛ mu wa dyí gmɔ̀ùn, sepóɛɖé ɔ nì ɖé wa gbo jè.

¹⁶ Mɔ́ kè ní-ná-tò ɖò se wa nyuɛ́ mu ɖe. Dyóɖóɔ̀ se wa fã̀ǐn mu, ké nyɛ ɖòɛ̀ zùzù se wa fɔ̃ɔ́ mu.

¹⁷ Sepóɛɖé Ɓáɖáá-dyù ɓɛ́ ɔ nìà ɖé zèèɔ̀ hwòɖǒǔn wɛ̃ɛ mu wa dyí gmɔ̀ùn kà nyɔ gmɔ̀à ɓáɖáá dyíɛ. Ké ɔ mu wa dɛ̀ cĩ́-cĩ́-nì ɓěɔ̀ síà kɛɛ kpaùn. Ké Gèɖèpɔ́ɔ̀ mu wa mícɛ̃̀ séín dyéɖéín dyi sámáùn.”